පාර්ලිමේන්තු සංකීර්ණයේ පවතින වටිනා ගෘහ නිර්මාණ සංරක්ෂණය කිරීමේ වැඩපිළිවෙලක් ආරම්භ කරීම සදහා වන මූලික සාකච්ඡාවක් කථානායක මහින්ද යාපා අබේවර්ධන මහතාගේ ප්‍රධානත්වයෙන් පසුගිය 27දා පාර්ලිමේන්තුවේදී පැවැත්විණි. ශ්‍රී ලංකා පාර්ලිමේන්තුවේ යෝජනාවකට අනුව ක්‍රියාත්මක කිරීමට නියමිත මෙම වැඩපිළිවෙලට අදාළ මූලික සාකච්ඡාවට ආයතන කිහිපයකම නියෝජිතයො සහභාගී වූහ.
පාර්ලිමේන්තු සංකීර්ණයේ පවතින වටිනා ගෘහ නිර්මාණ වල ඇති සංස්කෘතික සංකේතාත්මක බව, භූමි අලංකරණය සහ වටපිටාව, ඓතිහාසික සන්දර්භය සහ ජාතික අනන්‍යතාවය යනාදී කරුණු හේතුවෙන් ඒවා අනාගත පරපුර වෙනුවෙන් සංරක්ෂණය කිරීමේ අවශ්‍යතාවය මෙහිදී අවධාරණය කෙරිණි.
ඒවා අනාගත පරපුර සඳහා සංස්කෘතික සංකේතයක් ලෙස ආරක්ෂා කිරීම, නිර්මාණකරුවන්ට නිසි පිළිගැනීමක් ලබාදෙන අතරම ඔවුන්ට හිමි කතෘ හිමිකම් ආරක්ෂා කිරීම මෙන්ම වාස්තු විද්‍යාත්මක හා කලාත්මක වටිනාකම් වලින් යුත් ව්‍යුහයන් විනාශවීමට ඉඩ නොදී සංරක්ෂණය කිරීම උක්ත වැඩපිළිවෙල මගින් අපේක්ෂිතය.
සාකච්ඡාව සඳහා බුද්ධශාසන ආගමික හා සංස්කෘතික කටයුතු අමාත්‍යාංශය, සංස්කෘතික කටයුතු දෙපාර්තමේන්තුව, ජාතික ලේඛනාරක්ෂක දෙපාර්තමේන්තුව, ජාතික කෞතුකාගාර දෙපාර්තමේන්තුව, මධ්‍යම සංස්කෘතික අරමුදල, පුරාවිද්‍යා දෙපාර්තමේන්තුව, ජාතික කලා මණ්ඩලය, රජයේ ප්‍රවෘත්ති දෙපාර්තමේන්තුව, ඊනා ද සිල්වා භාරකාර අරමුදල, ජෙෆ්රි බවා භාරකාර අරමුදල, ජාතික ශිල්ප සභාව, හස්ත කර්මාන්ත මණ්ඩලය සහ සෞන්දර්ය කලා විශ්වවිද්‍යාලය නියෝජනය කරමින් නිලධාරීහු සහභාගී වූහ.
ඒ අනුව පාර්ලිමේන්තු ගොඩනැගිල්ල, සෙන්කෝලය, රිදී දොරටුව, තඹ දොරටුව, සිංහ දොරටුව සභා ගර්භයේ සීමාව, පිත්තල කොඩි 18, පොකුරු පහණ, රැස්වීම් ශාලාවේ සිවිලිම, තඹ දොර ඉදිරිපිට සිවිලිම, උත්සව ධජ 18, රේඛා චිත්‍ර, මන්ත්‍රී පිවිසුමේ ලී බිතුසිතුවම, කාර්ය මණ්ඩල ප්‍රවේශයේ බිතුසිතුවම්, ප්‍රභූ ආලින්දයේ සිතුවම්, ගරු මන්ත්‍රීවරුන්ගේ පෞද්ගලික භෝජනාගාරයේ සිතුවම්, දෙවන මහලේ පොට්ට්‍රේට් ගැලරිය, බිම් මහලේ ඡායාරූප ගැලරිය සහ වෙනත් වැදගත් ඡායාරූප /චිත්‍ර මෙන්ම ප්‍රදර්ශන කුටියේ ඇති පුරාවස්තු සංරක්ෂණය කිරීමට යෝජිතය.
පාර්ලිමේන්තු සංකිර්ණයේ ඇති ගෘහ නිර්මාණ සංරක්ෂණය කිරීම සඳහා කෙටි කාලින, මධ්‍ය කාලීන හා දීර්ඝ කාලීන විසඳුම් ඇතුළත් යෝජනාවලියක් සැකසිමටත් අදාළ ගෘහ නිර්මාණ පිළිබඳ නිසි ගවේෂණයක් සිදු කොට වෙන් වෙන් වශයෙන් කමිටු කිහිපයක් පිහිටුවිමටත් කථානායකවරයා යෝජනා කළ අතර ඒ සඳහා පිරිසේ එකඟතාවය හිමි විය.
ඒ අනුව සම්පූර්ණ යෝජනාවලිය සහ ඉදිරි වැඩපිළිවෙල පිළිබඳ සාකච්ඡා කිරීමට නැවත දෙසැම්බර් 12 වැනිදා යළි රැස්වීමටත් මෙහිදී තීරණය විය.
