මහ බැංකුවේ බැඳුම්කර වංචාව සිදු වී 2024 පෙබරවාරි 27 වැනිදාට වසර නවයක් ගතවී ඇතත් නීතිපති දෙපාර්තමේන්තුව චූදිතයන්ට නඩු නොදමන්නේ ඇයිදැයි පාර්ලිමේන්තු මන්ත්‍රී ඉරාන් වික්රමරත්න මහතා විමසා සිටී.

කොළඹ වීපක්ෂ නායක කාර්යාලයේ පැවති මාධ්‍ය හමුවකදී ඒ මහතා මේ බව විමසා සිටියේය.

ස්වාධීන නඩු පැවරීමේ කාර්යාලයක් මේ රටට අවශ්‍ය බව තමා ප්‍රකාශ කරන්නේ එම නිසා යැයි අවධාරණය කළ හෙතම විපක්ෂයේ ඉන්නා විට රට වටා ගොස් බැඳුම්කර හොරු අල්ලනවා යැයි බෙරිහන් දුන් අය ආණ්ඩු පක්ෂයට පැමිණි දා සිට ඒවා යට ගසා නිශ්ශබ්දව සිටිනවා යැයි ද ඔහු කීය.

ඔහු වැඩිදුරටත් මෙසේද කීය.

“මහ බැංකුව විසින් පාලිත අර්ථ සාධක අරමුදල පිළිබඳව වෝහාරික පරීක්ෂණත් පැවත්වූවා. 2002 සිට 2015 ට බැඳුම්කර වෙලඳපොළ තුළ රුපියල් බිලියන 9.8 ක අලාභයක් තිබූ බව වාර්තාවකින් හෙළිකර තිබුණා. ඒ වගේම 1998 සිට 2017 වන තෙක් කොටස් වෙළඳපොළේ රු බිලියන 9.9 ක අලාභයක් සිදු වූ බව වෝහාරික විගණන පරීක්ෂණ වාර්තාවේ සඳහන් වුණා.

මහ බැංකුවේ මහ දවාලේ මහා මංකොල්ලය යැයි එදා විපක්ෂයේ සිටි රාජපක්ෂවරු හා ඔවුන්ගේ සහචරයන්, එකල රජයේ අගමැති හා වත්මන් ජනපති රනිල් වික්‍රමසිංහ මහතාට, මහ බැංකුවේ අධිපතිතුමාට චෝදනා එල්ල කළහ. නමුත් අද වන විට ඔවුන් සියලු දෙනා, එනම් බැඳුම්කර සොරකමට  චෝදනා කළ අයයි චෝදනාවට ලක්වූ අයයි එකට ආණ්ඩු කරනවා

අපේ රටේ නීතිපතිදෙපාර් තමේන්තුව ස්වාධීන නම් අනිවාර් යයෙන් බැඳුම්කර චූදිතයන්ට නඩු දැමිය යුතුව තිබුණි. නීතිපති දෙපාර් තමේන්තුව සොරුන් ආරක්ෂා කරන වැඩ පිළිවෙලක ද ඉන්නේ.?. මහ බැංකුවේ බැඳුමකර සොරකම සිදුවී වසර නවයක් ගතවී ඇතත් තවමත් නඩු නොපවරන්නේ ඇයි දැයි ඉරාන් වික්‍රමරත්න මහතා ප්‍රශ්න කළේය.”