2015 ජනවාරි 08 දිනෙන් ආරම්භ වී 2019 නොවැම්බර් මස 16 දිනෙන් අවසන් වූ කාලසීමාව තුළ සිදු වී ඇතැයි කියන දේශපාලන පළිගැනීම් පිළිබඳ පරීක්ෂා කර තොරතුරු ලබා ගැනීම සඳහා පත් කළ උපාලි අබේරත්න කොමිසම් සභාව 2020 හා 2021 වර්ෂය දක්වා ඒ සඳහා වැය කර ඇති මුළු මුදල රු. 84,265,810.75ක් බව වාර්තා වේ.
2020 ජනවාරි මස 09 වැනිදා මේ ත්‍රිපුද්ගල ජනාධිපති පරීක්ෂණ කොමිෂන් සභාව පත් කෙරිණ.
අල්ලස් හෝ දූෂණ චෝදනා විමර්ශන කොමිෂන් සභාව, FCID, CID සහ පොලිස් විශේෂ විමර්ශන ඒකකය යන ආයතන විසින් සිදු කරන ලද විමර්ශන නිසා 2015 ජනවාරි මස 08 වැනිදා සිට 2019 නොවැම්බර් 16 වැනිදා දක්වා දේශපාලන පලිගැනීමට ලක්වූවන් පිළිබඳව සහ ආශ්‍රිත පසුබිම සොයා බැලීම කොමිෂන් සභාව වෙත පැවරිණි.
කොම්සම් වාර්තාව 2020 දෙසැම්බර් 08 දා එවකට ජනාධිපති ගෝඨාභය රාජපක්ෂ මහතාට භාර දුන් අතර එහි සොයා ගැනීම් සහ නිර්දේශ බලරහිත කරන ලෙස ඉල්ලා ශ්‍රේෂ්ඨාධිකරණයට පෙත්සම් ඉදිරිපත් කෙරිණි.
මෙම කොමිසම සිය විමර්ශන සිදුකළ ආකාරය 1948 අංක 17 දරණ කොමිෂන් සභා පනතේ 7(2)දරණ වගන්තිය ට පටහැනි බවට පෙත්සම් මගින් පෙන්වා දී තිබේ.
මෙම පෙත්සම්වල විභාග පසුගිය මාර්තු මස 15 දා අවසන් වූ අතර ඒ පිළිබඳව තීන්දුව ප්‍රකාශයට පත් කිරීම දින නියමයක් නොමැතිව කල් දමන ලදී.
ජනාධිපති ලේකම් සමන් ඒකනායක, හිටපු නාවික හමුදාපති ටි.සින්නයියා, හිටපු නාවික හමුදා වයිස් අද්මිරාල් එස්.එම්.ඩී. වීරසේකර, අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර, අපරාධ පරීක්ෂණ දෙපාර්තමේන්තුව භාරව සිටි ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න , සන්ධ්‍යා එක්නැලිගොඩ ඇතුළු පිරිසක් විසින් මෙම පෙත්සම් ගොනුකර තිබුණි.
කොමිසමේ සභාපති උපාලි අබේරත්න වගඋත්තරකරුවකු වූ රිට් පෙත්සම් රැසක තීන්දුව අභියාචනාධිකරණය විසින් ප්‍රකාශයට පත් කර ඇති අතර ජනාධිපති කොමිෂන් සභාවේ නිගමන සහ නිර්දේශ අහෝසි කරමින් කොමිසමේ ක්‍රියාකලාපය නීති විරෝධී බව අභියාචනාධිකරණය තීන්දු කළේය.
මූලාශ්‍රය – සිළුමිණ
