ඇල්පිටිය ප්‍රාදේශිය සභා මැතිවරණයේ ඡන්දය ප්‍රකාශ කිරීම සාමාකාමීව සිදුවන බව දිස්ත්‍රික් තේරීම්භාර නිලධාරී ඩබ්ලිව්. ඒ. ධර්මසිරි මහතා පවසයි.
ඇල්පිටිය ප්‍රාදේශීය සභාව සඳහා මන්ත්‍රීවරුන් 28 දෙනෙකු තෝරා ගැනීම සඳහා වන ඡන්ද විමසීම අද (26) පෙ.ව. 7.00ට මධ්‍යස්ථාන 48කදී ආරම්භ විය.
ඒ අනුව අද පෙ.ව. 10.30 වනවිට 30%ක පමණ ඡන්ද දායකයින් පිරිසක් ඡන්දය භාවිත කර තිබේ.
දිස්ත්‍රික් තේරීම්භාර නිලධාරීවරයා සඳහන් කළේ ඡන්ද විමසීම ප.ව. 4ට අවසන් වූ පසු අදාළ ඡන්ද මධ්‍යස්ථානවලදීම ගණන්කිරීමේ කටයුතු ආරම්භ කරන බවය.
ඇල්පිටිය ප්‍රාදේශීය සභා ඡන්ද විමසීම සඳහා සුදුසුකම් ලබා ඇති ඡන්ද දායකයින් සංඛ්‍යාව 55,643කි.
(පෙර පුවත 2024 ඔක්තෝබර් 26 පෙ.ව.7:15)
ඇල්පිටියේ ඡන්දය අද; ඡන්ද ප්‍රතිඵලය රාත්‍රි 10ට ප්‍රථම
ඇල්පිටිය ප්‍රාදේශීය සභා ඡන්ද විමසීම අද (26) පෙරවරු 7.00 සිට පස්වරු 4.00 දක්වා ඡන්ද මධ්‍යස්ථාන 48කදී සිදු කිරීමට නියමිතය.
ඡන්ද කොට්ඨාස 17කින් සමන්විත ප්‍රාදේශීය සභා ඡන්ද බල ප්‍රදේශයේ ඡන්ද දායකයෝ 55643 දෙනෙක් ඡන්දය ප්‍රකාශ කිරීමට සුදුසුකම් ලබා සිටිති.
ජාතික ජන බලවේගය, සමගි ජන බලවේගය ඇතුළු පිළිගත් පක්‍ෂ 8ක් හා ස්වාධීන කණ්ඩායමක් මැතිවරණයට තරග කළ අතර ඉන් නියෝජිතයන් 28දෙනකු තෝරා පත්කර ගැනීමට නියමිතය.
ඡන්ද සලකුණු කිරීම සවස 4.00ට අවසන් කිරීමෙන් අනතුරුව එම මධ්‍යස්ථානවලදීම ඡන්ද ගණන් කිරීම සිදුවෙයි.
පසුව එම ගණන් කළ ප්‍රතිඵල ඡන්ද කොට්ඨාස 17 තුළ පිහිටුවා ඇති ගණන් කිරීමේ මධ්‍යස්ථානයකට රැගෙන ඒමට නියමිතය.
ඉන් අනතුරුව කොට්ඨාස මට්ටමින් ප්‍රතිඵල ගණන් කිරීම සිදුවෙයි.
එම ප්‍රතිඵල තේරීම් භාර නිලධාරිවරයා විසින් සහතික කිරීමෙන් අනතුරුව මැතිවරණ කොමිසම මගින් නිල වශයෙන් අද රාත්‍රි 10 පමණ වනවිට නිකුත් කිරීමට නියමිතය.
කොට්ඨාස මට්ටමින් නියෝජිතයන් 17 දෙනකු හා සමානුපාතිකව 11 දෙනකු තෝරා ගැනීමට නියමිතය.
ඒ ඒ පක්‍ෂ හා කණ්ඩායම් ලබා ගන්නා ඡන්ද ප්‍රතිශත අනුව සමානුපාතික නියෝජිතයන් ප්‍රමාණයෙන් සියයට 25ක කාන්තා නියෝජනයක් තීරණය කරන බව මැතිවරණ කොමිසම සඳහන් කරයි.
මැතිවරණ රාජකාරි සඳහා නිලධාරීන් 600ක් පමණ ද ඡන්ද මධ්‍යස්ථාන ආරක්‍ෂාවට පොලිස් නිලධාරීන් 500ක් පමණ ද යෙදවීමට නියමිතය.
ඇල්පිටිය ඡන්ද විමසීම සම්පූර්ණයෙන්ම නිරීක්‍ෂණය කරන බව පැෆරල් සංවිධානය පවසයි. ඡන්ද මධ්‍යස්ථාන 48ට නිරීක්‍ෂකයන් 48 දෙනකු යෙදවීමටත්, ජංගම නිරීක්‍ෂණ රථ යෙදවීමටත් පියවර ගත් බව එහි විධායක අධ්‍යක්‍ෂ රෝහණ හෙට්ටිආරච්චි මහතා පැවැසීය.
