එල්.බී. ෆයිනෑන්ස් සමාගමේ ශාඛාවක් තුළ පැයකට ආසන්න කාලයක් අඹුසැමි යුවළක් සිරකර, සාපරාධී බිය ගැන්වීමක් කළැයි එම ආයතනයේ පිරිසක් අත්අඩංගුවට ගැනීමට විමර්ශනයක් පවත්වන බව කුරුඳුවත්ත පොලිසිය, කොළම ප්‍රධාන මහෙස්ත්‍රාත් තිලිණ ගමගේ මහතා වෙත ඊයේ (04) දන්වා සිටියේය.
අදාළ ආයතනයේ ආරක්ෂිත සී.සී.ටී.වී. කැමරා දර්ශන පරීක්ෂා කරමින් සැකකරුවන් කඩිනමින් අත්අඩංගුවට ගැනීමට විමර්ශන පවත්වන බවද කුරුඳුවත්ත පොලිසියේ නිලධාරින් අධිකරණයට දැන්වීය.
උත්සව කටයුතු සඳහා වාහන දීමේ ව්‍යාපාරයක නිරත ගනේමුල්ල, බොල්ලත, ගල්පොත්ත පාර පදිංචි අශාන් ද සිල්වා මහතා විසින් කරන ලද පැමිණිල්ලක් මත, විමර්ශන කටයුතු ආරම්භ කළ බව කුරුඳුවත්ත පොලිසියේ සැරයන් සමන් රාජපක්ෂ මහතා අධිකරණය වෙත දන්වා සිටියේය.
තමා අදාළ ලීසිං සමාගමේ ගනේමුල්ල පිහිටි ශාඛාවෙන් රුපියල් ලක්ෂ 20 ක ලීසිං පහසුකමක් වසර 05 ක් දක්වා ගෙවීමට ගත් බවත්, ඊට අදාළ මුදල් සහ පොලිය 2024 අප්‍රේල් 08 වැනිදා වන විට ගෙවා අවසන් කළ බවත් පැමිණිලිකරු කරන ලද පැමිණිල්ලේ සඳහන් වේ.
පැමිණිලිකරුගේ කාර් රථයට අදාළ ලීසිං පහසුකම ගෙන අවසන් හෙයින්, ඊට අදාළ ලිපි ලේඛන දෙන ලෙස ඉල්ලා සිටි අවස්ථාවේදී ලීසිං සමාගමේ ගනේමුල්ල ශාඛාවේ නිලධාරින් දන්වා ඇත්තේ එම ලේඛන කුරුඳුවත්තේ පිහිටි ශාඛාවෙන් ගන්නා ලෙස බව දන්වා සිටි කුරුඳුවත්ත පොලිසියේ නිලධාරින් ඒ පිළිබඳ විමසීමට පැමිණිලිකරු සිය බිරිඳ සමග එල්.බී. ෆයිනෑන්ස් සමාගමේ කුරුඳුවත්තේ පිහිටි ණය පියවීමේ ශාඛාව (සෙට්ල්මන්ට්) ආයතනයට ගොස් ඇතැයි දන්වා සිටියේය.
එම අවස්ථාවේදී ලීසිං සමාගමේ කුරුඳුවත්ත ශාඛාවේ ප්‍රධාන කළමනාකරු බව කියන ගිහාන් නමැති අය පිමිණිලිකරුගේ බිරිඳට “තමුසෙලාගේ යතුරක් මම ගත්තෙ නැහැ. ඒක ගත්ත කෙනාගෙන් ඉල්ලගන්නවා.” යනුවෙන් බැණ තර්ජනය කළ බවත්, එහි සිටි පිරිසක් ආයතනයේ ඉබි යතුරු දමා වසා දමමින් පැමිණිලිකරුට සහ ඔහුගේ බිරිඳට පිටතට යෑමට නොදී සිරකර තබා ඇති බවත්, පසුව 119 දුරකථන අංකයට ලද ඇමතුමක් පරිදි පොලිසිය පැමිණ දෙපාර්ශ්වයම කුරුඳුවත්ත පොලිසිය වෙත රැගෙන ගොස් ඇති බවත් සැරයන් සමන් රාජපක්ෂ මහතා අධිකරණයට දන්වා සිටියේය.
මෙම සිද්ධිය සම්බන්ධයෙන් කරන විමර්ශනයේ ප්‍රගතිය වාර්තා කරන ලෙස කොළඹ ප්‍රධාන මහෙස්ත්‍රාත් තිළිණ ගමගේ මහතා කුරුඳුවත්ත පොලිසියට නියම කළේය.
