කොවිඩ්-19 වෛරස ව්‍යාප්ති සමයේ දී ජාතික ඖෂධ නියාමන අධිකාරියේ (NMRA) අනුමැතිය නොමැති සමාගමකින්, රුපියල් මිලියන 2200කට අධික වටිනාකමකින් යුත් රැපිඩ් ඇන්ටිජන් කට්ටල මිලදී ගෙන ඇති බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා ඊයේ (18) පාර්ලිමේන්තුවේදී අනාවරණය කළේය.
විපක්ෂයේ පාර්ලිමේන්තු මන්ත්‍රී රවුෆ් හකීම් විසින් නගන ලද ප්‍රශ්නයකට පිළිතුරු ලබාදෙමින් සෞඛ්‍ය අමාත්‍යවරයා සඳහන් කළේ, ජාතික ඖෂධ නියාමන අධිකාරියේ අනුමැතිය ලබාදී නොමැති දිවැස ෆාමා කලම්බු නම් සමාගමකින් රැපිඩ් ඇන්ටිජන් කට්ටල මිලියන 2ක සංඛ්‍යාවක් මිලදීගෙ ඇති බවයි.
එහි දී අදාළ සමාගම එක් ඇන්ටිජන් කට්ටලයක් සඳහා රුපියල් 1146 සිට 937 දක්වා මුදලකට මිල දී ගෙන තිබෙන බව අමාත්‍යවරයා පැවසීය.
මෙම රැපිඩ් ඇන්ටිජන් කට්ටල තොගය වෙනුවෙන් වැයකර ඇති මුදල රුපියල් මිලියන 2200ක් බවද අමාත්‍යවරයා කීය.
අදාළ සමාගම 2021 ජුනි 01 වැනි දා NMRA හි ලියාපදිංචියට අවසර ඉල්ලා තිබුණත් ඒ සඳහා වන සුදුසුකම් සපුරා නැති හෙයින් එය ලියාපදිංචි කර නොමැති බවද ඔහු කියා සිටී.
ඒ අනුව මෙම අයථා ක්‍රියාව සම්බන්ධයෙන් සෞඛ්‍ය අමත්‍යංශය මට්ටමින් පරීක්ෂණයක් පවත්වන බව ද ඇමැතිවරයා පාර්ලිමේන්තුවේ දී වැඩිදුරටත් කියා සිටියේය.
කෙසේ නමුත් අමාත්‍යවරයා පාර්ලිමේන්තුවට අනාවරණය කළේ, අදාළ කාල වකවානුවේ දී රුපියල් මිලියන 6442ක් වැයකරමින් PCR සහ රැපිඩ් ඇන්ටිජන් කට්ටල මෙරටට ආනයනය කර ඇති බවයි.
මෙහි ටෙන්ඩරය ජෝර්ජ් ස්ටුවර්ට් ආයතනය විසින් ලබා ගෙන ඇතත් ඔවුන් ගෙන්වා ඇත්තේ ඉතා සුළු ඇන්ටිජන් ප්‍රමාණයක් බවත්, එයට විශාල සැපයුමක් කළ “දිවැස ෆාමා කලම්බු” කාගෙදැයි සෙවීම මේවන විට ආරම්භ කර ඇති බව සෞඛ්‍ය අමාත්‍යංශ අභ්‍යන්තර ආරංචි මාර්ගවලින් මේ අතර වාර්තා වේ.
