පොල් ආශ්‍රිත නිෂ්පාදන කර්මාන්තය සඳහා අවම වශයෙන් පොල් මිලියන 100 ක් වත් කඩිනමින් ආනයනය කිරීමට කටයුතු නොකළහොත්, කර්මාන්තකරුවන් වැඩි මිලට හෝ පොල් මිලදී ගැනීමට කටයුතු කිරීම නිසා වෙළෙඳ පොළේ පොල් ගෙඩියක් රුපියල් 250 ත් 300 ත් අතර මිලක් දක්වා ඉහළ යාමේ අවදානමක් ඇතිවිය හැකි බව ලංකා පොල් කර්මාන්ත මණ්ඩලයේ සභාපති ජයන්ත සමරකෝන් මහතා කීය.
කර්මාන්ත අංශය සඳහා පොල් ගෙඩි මිලියන 100 ක පොල් කිරි, ශීත කළ පොල් මද හෝ කැබලි කරන ලද වියළි පොල් කඩිනමින් ආනයනය කළයුතු බවට රජයට දැනුම්දී ඇතැයිද, රජයෙන් ඊට ධනාත්මක ප්‍රතිචාර ලැබී ඇති බවද සභාපතිවරයා පැවසීය.
කැබලි කරන ලද වියළි පොල් යොදාගෙන පොල් තෙල් නිෂ්පාදනය සඳහා යොදාගත හැකි බවද ඔහු කීවේය.
පොල් පර්යේෂණායතනයේ දත්තවලට අනුව ඉකුත් 2021 වසරේ සිට ඉකුත් වසර (2024) දක්වා වූ කාලය තුලදී මෙරට පොල් අස්වැන්නේ අඩුවීම ගෙඩි මිලියන 700 කට වැඩි බවත්, දැනටත් පවතින පොල් හිඟය හේතුවෙන් පොල් මිල ඉහළ ගොස් ඇතැයිද ඔහු කීවේය.
කෙසේවුවද, මෙරටට පොල් ගෙන්වීමට කිසිදු තීරණයක් ගෙන නැතැයි කර්මාන්ත සහ ව්‍යවසායකත්ව සංවර්ධන නියෝජ්‍ය ඇමැති චතුරංග අබේසිංහ මහතා ඊයේ (22) පාර්ලිමේන්තුවේ දී පැවසීය.
ක්ලීන් ශ්‍රී ලංකා වැඩසටහන සම්බන්ධයෙන් පැවැති විවාදයේදී ඔහු මේ බව කීය.
ඒ මහතා මෙසේද පැවසීය.
‘‘මිලියන අටසියයක් වූ පොල් නිෂ්පාදනය විශාල වශයෙන් අඩු වෙලා තිබෙනවා. මේ නිසා පොල් අපනයනකරුවන්ට ඔවුන්ගේ අපනයන කටයුතු කරගන්න බැරිවී තිබෙනවා. ඒ නිසා ඔවුන්ගේ අපනයන ක්‍රියාවලියට ගැටලු ඇති වෙලා. ඒ නිසා පොල් කිරි, මද සහ පොල්තෙල් නිෂ්පාදනයට අවශ්‍ය අමුද්‍රව්‍ය ගෙනෙන්න ඔවුන් ඉල්ලීමක් කරලා තිබෙනවා. ඒ සම්බන්ධයෙන් සාකච්ඡා කරමින් සිටිනවා. එහෙම නැතිව පොල් ගෙන්වන්න කිසිම තීරණයක් අරගෙන නෑ.’’
