මීට පෙර ඇතිකර ගෙන තිබු අනුමැතීන්ට යටත්ව, මන්නාරම සුළං විදුලි ව්‍යාපෘතිය ඉදිරියට ගෙනයාමට කැමැත්තෙන් පසුවන බව අදානි ග්‍රීන් එනර්ජි ශ්‍රී ලංකා සමාගම බලශක්ති අමාත්‍යාංශයට දැනුම්දී ඇතැයි වාර්තා වේ.

මෙගාවොට් 484 ක විදුලි ව්‍යාපෘතියක් වන මෙය අති නවීන තාක්ෂණයෙන් ක්‍රියාත්මක කිරීමටත් ඊට අනුබද්ධිත සම්ප්‍රේෂණ පද්ධතිය ද සංවර්ධනය කිරීමටත් තමන් අපේක්ෂා කළ බවද අදානි ග්‍රීන් එනර්ජි ශ්‍රී ලංකා සමාගම දන්වා ඇතැයි පැවසේ.

වසර දෙකකට අධික කාලයක සාකච්ඡාවලින් අනතුරුව පුනර්ජනනීය බලශක්තිවල මිල ගණන්ද අනුමත වූ බව, එම සමාගම සඳහන් කර ඇත.

ඔවුන් පෙන්වාදී ඇත්තේ, එම අනුමැතීන් ශ්‍රී ලංකා රජය පාර්ශ්වයෙන් නිල වශයෙන්  සිදුවන තෙක් ඉවසීමෙන් බලා සිටින අතර කිසිදු ආකාරයක නිල සන්නිවේදනයක් සිදුනොවූ පසුබිමක මෙම ව්‍යාපෘතියෙන් ඉවත් වීමට තීරණය කළ බවයි.

ඩොලර් බිලියනයක් වූ මෙම සුළං බලශක්ති ව්‍යාපෘතියෙන් ඉවත් වීමට තමන් තීරණය කළ බව මීට පෙර අදානි ග්‍රීන් එනර්ජි ශ්‍රී ලංකා ආයෝජන මණ්ඩලයට ලිපියක් මගින් දන්වා තිබිණි.

2025 ජනවාරි 02දා ශ්‍රී ලංකා කැබිනට් මණ්ඩලය විසින් 2024 මැයි මාසයේදී අනුමත කරන ලද ගාස්තු, නැවත ඇගයීමට නව රජය විසින් තීන්දු කරන ලදී.

පුනරින් හා මන්නාරම ප්‍රදේශයේ ඉදිකිරීමට නියමිතව පැවති මෙම සුළං බල ව්‍යාපෘති වලින් විදුලිය කිලෝවොට් පැයක විදුලිය ඇමෙරිකානු ඩොලර් 0.0826කට මිලදී ගැනීමට පසුගිය 2024 මැයි මාසයේදී ශ්‍රී ලංකා බලධාරීන් එකගත්වය පළ කර තිබුණද, වඩාත් කුඩා පුනර්ජනනීය ව්‍යාපෘති විසින් ඊට වඩා අඩු මිලට දැනටමත් විදුලිය ලබාදෙන බවට විවිධ පාර්ශව වලින් චෝදනා එල්ල වී තිබීම රජය විසින් අදාළ සමාලෝචනයට හේතු විය.

ඊට අමතරව, මෙම ව්‍යාපෘති සම්බන්ධයෙන් පරිසරවේදීන් ද ගැටළු රැසක් ඉදිරිපත් කර තිබුණි.

සබැඳි පුවත්