අපරාධ පරික්ෂණ දෙපාර්තමේන්තු කණ්ඩායම් බන්ධනාගාරවල අඛණ්ඩ විමර්ශන සිදුකරන බව, මහජන ආරක්ෂක අමාත්‍යංශය පවසයි.

ඒ සඳහා පත් කෙරුණු අපරාධ පරික්ෂණ දෙපාර්තමේන්තු කණ්ඩායම් සංඛ්‍යාව, 28 කි.

ඔවුන් විසින්  ඊයේ(12) සියලුම බන්ධනාගාර පරික්ෂා කිරීම ආරම්භ කරන ලදී.

පොලීසිය සඳහන් කළේ, බන්ධනාගාර වල ලේඛණ පරික්ෂාව සඳහා එහිදී විශේෂ අවධානයක් යොමු කරන බවය.

එම කටයුතු අවසන් කිරීම සඳහා ඊයේ දිනය ප්‍රමාණවත් නොවීම හේතුවෙන්, අදත් ඊට අදාළ පරික්ෂා කිරීම් සිදු වේ.

එලෙස දිවයිනේ සියලු බන්ධනාගාර පරික්ෂා කෙරෙන්නේ, ජනාධිපති සමාව අනීතිකව භාවිත කර රැඳවියන් නිදහස් කර ඇතැයි කියන සිද්ධිය සම්බන්ධයෙන් සිදු කෙරෙන විමර්ශන වලට අදාළවය.

ජනාධිපති සමාව නොලැබූ අනුරාධපුර බන්ධනාගාරයේ රැඳවියෙකු වෙසක් පොහෝදා නිදහස් කිරීමේ සිද්ධිය සම්බන්ධයෙන් අත්අඩංගුවට ගත් බන්ධනාගාර කොමසාරිස් ජනරාල් තුෂාර උපුල්දෙනිය මහතා මේ වන විට කොළඹ බන්ධනාගාරයක ආරක්ෂිතව රඳවා සිටියි.

අත්අඩංගුවට ගෙන රක්ෂිත බන්ධනාගාර ගතකර සිටින අනුරාධපුර බන්ධනාගාර අධිකාරි මොහාන් කරුණාරත්න මහතා, අද(13) යළි අධිකරණයට ඉදිරිපත් කිරීමට නියමිතය.

ඉන්දියාවට ඔබ්බෙන් වූ මුහුදු තීරයේදී එනම් කේරළ සමුද්‍ර තීරයේදී පසුගියදා අනතුරට ලක්වූ MSC Elsa 3 නෞකාවේ අන්තරායකර බහාලුම් 13ක් තිබී ඇති බව පරිසර අමාත්‍යාංශය විසින් අනාවරණය කර තිබේ.

එහි අතිරේක ලේකම් ආර්. එච්.එම්.බී. අබේකෝන් මහත්මිය පැවසුවේ එම නෞකාවේ තිබූ ඇතැම් ද්‍රව්‍ය මේ වනවිට මෙරට වෙරළ තීරයන්ට ගොඩගසා ඇති බවය.

පවතින අයහපත් කාලගුණය හේතුවෙන් එම නෞකාවේ තිබෙන ද්‍රව්‍යයන් මෙරට වෙරළ තීරයට ගොඩගැසීම තවදුරටත්  ඉහළ යාහැකි බවද පරිසර අමාත්‍යාංශයේ පැවති මාධ්‍ය හමුවකට එක්වෙමින් එහි අතිරේක ලේකම් ආර්.එච්.එම්.බී. අබේකෝන් මහත්මිය විසින් තවදුරටත් පවසන ලදී.

එම මාධ්‍ය හමුවට එක්වූ සමුද්‍රීය පරිසර ආරක්ෂණ අධිකාරීයේ සාමාන්‍යාධිකාරී ජගත් ගුණසේකර මහතා පැවසුවේ වෙරළට ගොඩගසන ද්‍රව්‍යයන් ඉවත්කිරීමේ කටයුතු අද (13) සිට ආරම්භ කරන බවය.

හිටපු යුද හමුදාපතිවරයෙකු වූ ජෙනරාල් හැමිල්ටන් වනසිංහ මහතා අභාවප්‍රාප්ත වී තිබේ.

මිය යන විට ඒ මහතා 92 වන වියේ පසු වූ අතර ඔහු නාරාහේන්පිට යුද හමුදා රෝහලේ ප්‍රතිකාර ලබමින් සිටියදී මෙසේ මියගොස් ඇත.

ශ්‍රී ලංකා යුද හමුදාවේ 11 වන යුද හමුදාපතිවරයා වන හැමිල්ටන් වනසිංහ මහතා ඒකාබද්ධ මෙහෙයුම් අණ දෙන නිලධාරි තනතුරේ මෙන්ම ආරක්ෂක ලේකම් ධූරයේ ද කටයුතු කර ඇත.

ඒ මහතා සිය සේවා කාලය තුළ විශිෂ්ට සේවා විභූෂණ පදක්කම, උත්තම සේවා පදක්කම ඇතුළු සේවයේ විශිෂ්ටත්වය වෙනුවෙන් පිරිනැමෙන සම්මාන ගණනාවකින් ද පිදුම් ලබා තිබේ.