පසුගිය රජයේ හිටපු ක්‍රීඩා ඇමැති හරින් ප්‍රනාන්දු විසින් ක්‍රීඩා පනත සංශෝධනය කරමින් නිකුත් කර තිබූ ගැසට් පත්‍රය බල රහිත කර වත්මන් ක්‍රීඩා ඇමැති සුනිල් කුමාර ගමගේ මහතා විසින් නැවත වරක් ක්‍රීඩා පනත සංශෝධනය කර තිබේ.

මෙම නව සංශෝධන අනුව හරින් ප්‍රනාන්දු මහතාගේ ගැසට්ටුවෙන් ක්‍රීඩා සංගම්වල නිලධාරීන්ට වසර ගණනක් නිලතල දැරීමට දී තිබූ ඉඩකඩ ඉවත් කර ප්‍රධාන නිලතලවල වසර අටක් කටයුතු කර තිබේ නම් යළි තරග කළ නොහැකි වන ලෙස නීතියක් පනවා ඇත.

එමෙන්ම මෙම නීතිය නිසා වත්මන් ක්‍රිකට් විධායක සභාවේ වැඩි දෙනකුට ද යළි තරග කිරීමට හැකියාව ද නොහැක.

තව ද 2025 නිලවරණය පවත්වා නොමැති ක්‍රීඩා සංගම් සියල්ලටම නව නීතිය අනුව නිලවරණ පැවැත්විය යුතු වීම ද විශේෂත්වයකි.

මූලාශ්‍රය – දිවයින

සබැඳි පුවත්

හෙළ සිනමාවේ නිළි රැජින, අභාවප්‍රාප්ත මාලිනී ෆොන්සේකා මහත්මියගේ දේහය පිළිබඳ අවසන් කටයුතු අද (26) පස්වරුවේ සිදුකිරීමට නියමිතව තිබේ.

දේහය පිළිබඳ අවසන් කටයුතු රාජ්‍ය අනුග්‍රහය සහිතව කොළඹ නිදහස් චතුරස්‍ර පරිශ්‍රයේ දී සිදුකිරීමට නියමිතව ඇත.

‘හෙල සිනමාවේ නිළි රැජිණ‘ ලෙස විරුදාවලිය ලත් ප්‍රවීණ රංගන ශිලිපිණී මාලිනී ෆොන්සේකා මහත්මිය පසුගිය සෙනසුරාදා සිය දිවි සැරිය නිම කළාය.

අභාවප්‍රාප්ත වන විට 78 වන වියේ පසුවු මාලනී ෆොන්සේකා මහත්මිය, ‘වන්නි ආරච්චිගේ මාලනී සෙනෙහෙලතා ෆොන්සේකා’ නමින් 1947 අප්‍රේල් මස 30 වනදා කැළණියේ දී උපත ලැබීය.

1963 වසරේ ‘නොරත රථ‘ වේදිකා නාට්‍යයෙන් සිය රංගන දිවිය ආරම්භ කළ මාලනී ෆොන්සේකා මහත්මිය 1968 වසරේදී තිරගත වූ ‘පුංචි බාබා‘ චිත්‍රපටයෙන් සිනමාවට පිවිසුණි.

අනතුරුව ගතවූ දශක 06කට ආසන්න කාලය තුළ චිත්‍රපට 150කට ආසන්න සංඛ්‍යාවකට රංගනයෙන් දායක වී විශිෂ්ට සිනමා නිර්මාණ රැසක් මෙරට සිනමා ක්ෂේත්‍රයට දායාද කිරීමට මාලිනි ෆොන්සේකා මහත්මිය සමත්විය.

නිධානය, බඹරු ඇවිත්, එයා දැන් ලොකු ළමයෙක්, වෑකන්දේ වලව්ව, ආරාධනා, අම්මාවරුනේ, අපේක්ෂා, ආකාස කුසුම්, ඇතුළු විත්‍රපට හරහා සිය රංගන හැකියාව මනාව ප්‍රකට කළ ඇය පිටගම්කාරයෝ, කෙම්මුර, අඹු දරුවෝ ඇතුළු ටෙලි නාට්‍ය සඳහා ද රංගනයෙන් දායක විය.

මාලනී ෆොන්සේකා මහත්මියගේ විශිෂ්ඨ රංග කුසලතා හේතුවෙන් අවස්ථා ගණනාවක දී ඇය දෙස් විදෙස් සම්මාන රැසකින් ද පිදුම් ලැබීය.

හෙළ සිනමාවේ නිළි රැජිණ, අභාවප්‍රාප්ත මාලනී ෆොන්සේකා මහත්මියගේ දේහය දැනට ජාතික චිත්‍රපට සංස්ථාවේ තරංගනී ශාලාවේ තැන්පත් කර ඇති අතර දේහය අද පෙරවරු 8.00ට කොළඹ 07 නිදහස් චතුරස්‍රය වෙත රැගෙන යාමට නියමිතව තිබේ.

පසුව පෙරවරු 9.00 සිට පස්වරු 3.00 දක්වා මහජන ගෞරවය සඳහා අවස්ථාව සලසාදීමට නියමිතය.

පස්වරු 03.30ට ඇය අධ්‍යාපනය ලැබු කැලණිය ගුරුකුල විද්‍යාලයේ ආදි ශිෂ්‍ය ශිෂ්‍යාවන් සහ කලාකරුවන් විසින් දේහය බෞද්ධ ආගමික වතාවත් සිදුකිරීම සඳහා ඉදිකළ විශේෂ වේදිකාව වෙත රැගෙන යාමට නියමිතව තිබේ.

පස්වරු 5.45ට දේහය චිතකය වෙත රැගෙන යාම සිදුකිරීමට නියමිතය.

මේ අතර මාලනී ෆොන්සේකා මහත්මියගේ අවමගුල් උත්සවය හේතුවෙන්  නිදහස් චතුරශ්‍රය අවට ප්‍රදේශයේ රථවාහන ගමනාගමනය සීමා කරන බව පොලීසිය පවසයි.

ඒ අනුව අවමංගල්‍ය පෙරහැර හා උත්සවය වෙනුවෙන් මාර්ග වසා තැබීමක් සිදුනොකරන අතර අවමංගල්‍ය පෙරහැර රාජ්‍ය පරිපාලන අමාත්‍යංශ හන්දියේ සිට නිදහස් මාවත ඔස්සේ නිදහස් චතුරශ්‍රය දක්වා ගමන් කිරීමේදී විනාඩි 15 ක පමණ කාලයක් සඳහා නිදහස් වටරවුම සිට නිදහස් මාවතට ඇතුළුවන රථවාහන සීමා කිරීමට නියමිත බව සඳහන් වේ.

අවමංගල්‍ය උත්සවය පැවැත්වෙන අවස්ථාවේ ඒ අවට පිහිටා ඇති නිදහස් මාවත සහ ශ්‍රී ලංකා රූපවාහිනී සංස්ථාව ඉදිරියෙන් දිවෙන ප්‍රේමකීර්ති ද අල්විස් මාවත යන මාර්ගයන්හි අවහිරතාවයක් ඇති වීමට ඉඩ ඇති බැවින් විකල්ප මාර්ග භාවිතා කරන ලෙස පොලීසිය දැනුම් දී ඇත.

මාතර මහේස්ත්‍රාත් අරුණ බුද්ධදාස මහතා ඉකුත් 21 වැනිදා අධිකරණයේ පෙනී සිටින්නැයි ශ්‍රී ලංකා පොදු ජන පෙරමුණේ නිර්මාතෘ හා හිටපු මුදල් අමාත්‍යවරයකු වූ බැසිල් රාජපක්ෂ මහතාට කර තිබූ නියෝගයකට ඒ මහතා පෙනී සිට නැතැයි වාර්තා වේ.මේ නඩුව, 

2017 වසරේ දී FCID ය විසින් ගොනුකර ඇති අතර, නීත්‍යානුකූල නොවන ආකාරයකින් උපයාගන්නා ලද රුපියල් ලක්ෂ පන්සියයක් භාවිත කරමින් මාතර, එළියකන්ද ප්‍රදේශයේ අක්කර එකහමාරක ඉඩමක් බිරියගේ සහෝදරියගේ නමට මිල දී ගැනීමේ සිද්ධියට අදාළව පවතී.

මෙම නඩුවේ පළමු සැකකරු ලෙස තිස්ස ගලප්පත්ති යන අයත්, දෙවැනි සැකකරු ලෙස මුදිත ජයකොඩි යන අයත්, තුන්වැනි සැකකරු ලෙස හිටපු අමාත්‍ය බැසිල් රාජපක්ෂ මහතාත්, සිවුවැනි සැකකාරිය ලෙස අමාත්‍යවරයාගේ බිරියගේ සහෝදරියක වන අයෝමි ගලප්පත්ති මහත්මියත් නම් කර ඇත.

නඩුව කැඳවූ අවස්ථාවේ ඇප මත මුදා හැර සිටින සැකකරුවන් දෙදෙනකු අධිකරණයේ පෙනී සිටිය ද හිටපු අමාත්‍ය බැසිල් රාජපක්ෂ සහ ඔහුගේ බිරියගේ සහෝදරිය වන අයෝමා ගලප්පත්ති යන අය අධිකරණයේ පෙනී නොසිටියහ. 

මෙහි දී නීතිපති දෙපාර්තමේන්තුව වෙනුවෙන් අධිකරණය ඉදිරියේ කරුණු දැක්වූ නියෝජ්‍ය සොලිසිටර් ජෙනරාල් ලක්මිණි ගිරිහාගම මෙනවිය මෙලෙස පැවසුවා ය.

“ස්වාමීනී, මෙම නඩුවේ තුන්වැනි සැකකරු වන බැසිල් රාජපක්ෂට 2024 සැප්තැම්බර් මස 18 වැනි දින විදේශගතවීමට අවසර ලබා දී ඇත්තේ අද (23) දක්වා පමණයි. එවැනි පසුබිමක ඔහු අද අධිකරණය ඉදිරියේ පෙනී සිටියේ නැහැ. එබැවින් සාධාරණ හේතු දැක්වීමකින් තොරව අධිකරණය මඟහැරීම සම්බන්ධයෙන් ඔහුගේ ඇප අවලංගු කර වරෙන්තු නිකුත් කරන ලෙස මා ඉල්ලා සිටිනවා.”

මෙහි දී බැසිල් රාජපක්‍ෂ මහතා වෙනුවෙන් අධිකරණයේ කරුණු දැක්වූ ජනාධිපති නීතිඥ අනිල් සිල්වා මහතා මෙලෙස පැවසුවේය.

“ස්වාමීනී, මගේ සේවාදායකයා මැයි මස 18 සහ 19 දින යළි මෙරටට එන්න ගුවන් ටිකට්පත් වෙන් කරලයි තිබුණේ. නමුත් අමෙරිකාවේ සිටිය දී ඔහු පුටුවකින් ඇදවැටී අනතුරකට ලක්වෙලා ගෙල සහ ස්නායු ආශ්‍රිතව ආබාධ මතුවෙලා තිබෙනවා. මාස හයක් (06) ගුවන් ගමන්වල යෙදෙන්න එපා කියලා අමෙරිකාවේ වෛද්‍යවරුන් නිර්දේශ කර තිබෙනවා”

එම අවස්ථාවේ දී නීතිපති දෙපාර්තමේන්තුව වෙනුවෙන් යළිත් කරුණු දැක්වූ නියෝජ්‍ය සොලිසිටර් ජනරාල් ලක්මිණී ගිරිහාගම මෙනෙවිය පවසා සිටියේ ඉදිරිපත් කර ඇති වෛද්‍ය වාර්තාවල පරස්පරතා ඇති බවයි.

“ස්වාමීනී. මේ එක්ස්-රේ වාර්තා බැලුවාම බෙල්ලේ උලුක්කුවක්, වැරදි ඉරියව්වක් නිසා මාංස පේශිවල සුළු ඇඳීමක් පිළිබඳ විතරයි සටහන් වෙන්නේ. එසේම එය සතියකින් දෙකකින් සුවවෙන බවට වෛද්‍යවරුන් පවසා තිබෙනවා. වෛද්‍ය වාර්තා නිකුත් වී ඇත්තේ 2025 මාර්තු මස 18. ඔය කියන විදිහට මාස හයක් (06) ගුවන් ගමන්වලින් වළකින්න කියලා වෛද්‍ය වාර්තා නිර්දේශයක් තිබුණා නම් ඇයි මැයි මස 18, 19 දිනයන්හි ගුවන් ටිකට්පත් වෙන් කළේ. එම නිසා ස්වාමීනි, මෙම වෛද්‍ය වාර්තා පිළිනොගෙන සැකකරුගේ ඇප අවලංගු කරන ලෙස මා ඉල්ලා සිටිනවා” 

ජනාධිපති නීතිඥ අනිල් සිල්වා මහතා – 

“ස්වාමීනී, මගේ සේවාදායකයා ලෙඩක් නැතුවවත් ආවේ නැහැ කියලා පෙන්වන්න හදන්නේ හොරෙක් කියලා හිතල ද? නමුත් මේවා අමෙරිකාවේ වෛද්‍ය වාර්තා. අපේ වෛද්‍යවරුන් වගේ හොර නැහැ. ඊළඟ නඩු දිනයේ දී අධිකරණයට පැමිණෙනවා. නීතිපති දෙපාර්තමේන්තුව හරි කැමැතියි මගේ සේවාදායකයා, රාජපක්ෂලා ලොකු ලෙඩක් හැදිලා මැරිලා යනවා නම්. හොඳ වුණත් නරක වුණත් ඒ මිනිස්සුත් ලංකාවේ ඉන්න ඕනේ. මගේ සේවාදායකයා අද ආවේ නැත්තේ අසනීප තත්ත්වය නිසා. ඉදිරි නඩු දිනයේ ඔහු අධිකරණයට එනවා. ඒ නිසා ස්වාමිනී මේ අවස්ථාවේ ඔහුට වරෙන්තු නිකුත් කිරීමක් හෝ ඇප අවලංගු කිරීමක් සිදු කිරීමේ අවශ්‍යතාවක් නෑ.”

දෙපාර්ශ්වයේ කරුණු සලකා බැලූ මාතර මහෙස්ත්‍රාත් අරුණ බුද්ධදාස මහතා

ඉදිරිපත් වූ කරුණු සැලකිල්ලට ගනිමින් සැකකරුට වරෙන්තු නිකුත් කිරීමක් හෝ ඇප අවලංගු කිරීමක් නොකරන බව සඳහන් කරමින් ඉදිරි නඩු දිනයේ දී අධිකරණයේ පෙනී සිටින ලෙසට දැනුම් දෙමින් නඩුව ලබන නොවැම්බර් 21 දක්වා කල් තැබීය.

මූලාශ්‍රය – දිනමිණ