තැන්පතු ලබාදීමකින් තොරව මාර්ගගත ක්‍රමයට (Online) ණය ලබාදෙන ආයතන සම්බන්ධව කටයුතු කිරීමට සිය ආයතනයට බලයක් නොමැති බව ශ්‍රී ලංකා මහ බැංකුව කියයි. 

ඊට හේතුව, තැන්පතු ලබා ගැනීමකින් තොරව ණය දීමට නීතිමය තහනමක් නොමැතිවීම බව මහ බැංකුව සඳහන් කරයි.

මාර්ගගත ක්‍රමයට ණය ලබාදෙන ඇතැම් ආයතන සියයට 42 ත් සියයට 50 ත් අතර මාසික පොලියකට ණය ලබාදෙන බවට මහ බැංකුවට තොරතුරු ලැබී තිබේ.

එමෙන්ම මෙම ආයතන ණය ලබාදෙන සියලු පුද්ගලයන්ගේ ජාතික හැඳුනුම්පත්, බැංකු ගිණුම් ආදී සියලු තොරතුරු ලබාගන්නා අතර, අදාළ ණය මුදල් නොගෙවන පුද්ගලයන්ට සමාජ මාධ්‍ය යොදාගෙන විවිධාකාරයෙන් අපවාද සිදු කරන්නේය.

මෙලෙස අධික පොලී මත ණය මුදල් නිකුත් කරන ආයතන සම්බන්ධව කටයුතු කිරීමට අදාළව ක්ෂුද්‍ර මූල්‍ය හා ණය නියාමන අධිකාරී පනත් කෙටුම්පත ඉකුත් 2019 වසරේදී සකස් කරනු ලැබිණි. 

එය අනුමැතිය සඳහා දෙවරක් කැබිනට් මණ්ඩලයට ඉදිරිපත් කෙරිණි. 

මෙම කෙටුම්පත ඉකුත් වසරේ (2024) ජනවාරි මාසයේ දී පළමු වරට පාර්ලිමේන්තුවේ කියවීම සිදු කරනු ලැබීය.

කෙසේ නමුත් මෙම කෙටුම්පත නැවත වරක් මේ මාසයේ දී කැබිනට් මණ්ඩලයට ඉදිරිපත් කිරීමට කටයුතු යොදා ඇත. 

අදාළ ණය දෙන ආයතන මුදල් අමාත්‍යාංශය පිහිටුවන වෙනම අධිකාරියක් හරහා අධීක්ෂණය කිරීමට නියමිතය.

(අරුණ)

මෙවර පළාත් පාලන මැතිවරණයට අපේක්ෂකයන් 71,000කට අධික සංඛ්‍යාවක් ඉදිරිපත්ව ඇතැයි මැතිවරණ කොමසාරිස් ජනරාල් සමන් ශ්‍රී රත්නායක මහතා කියා සිටී.

කොට්ඨාස 4,917ක් සඳහා මැතිවරණය පැවැත්වීමට නියමිත වුවද මෙවර මැතිවරණය පැවැත්වෙන්නේ කොට්ඨාස 4,877කට පමණක් බවද ඔහු සඳහන් කරයි.

සෙසු මැතිවරණ කොට්ඨාසවල මැතිවරණය පැවැත්වීම පසු කලකදී සිදු කෙරෙන බවද ඔහු වැඩිදුරටත් පෙන්වා දුන්නේය. 

ප්‍රතික්ෂේප වූ නාමයෝජනා හමුවේ අධිකරණයට ගිය පාර්ශ්වයන්ගේ නාමයෝජනා භාර ගන්නා ලෙස අධිකරණය දුන් තීන්දුවට අනුව ඒ නාමයෝජනා භාර ගෙන, යළිත් ඡන්ද පත්‍රිකා සකස් කිරීමට සිදු වූ බවත් ඔහු පෙන්වා දුන්නේය.

මෙවර පළාත් පාලන ආයතනවලට තෝරා පත් කරගනු ලබන සභිකයන් සංඛ්‍යාව පිළිබඳව ස්ථිරවම ප්‍රකාශ කළ නොහැකි බවත් පැවසූ කොමසාරිස් ජනරාල්වරයා මෙවර මනාප ලකුණු කිරීමකින් තොරව මැතිවරණය පැවැත්වෙන හෙයින් කොට්ඨාස මට්ටමින් සභිකයන් තෝරාගන්නා බවද ප්‍රකාශ කළේය.

මෙවර මැතිවරණයෙන් කොට්ඨාස මට්ටමින් නියෝජිතයන් 60%ක් සහ සමානුපාතික පදනම යටතේ නියෝජිතයන් 40%ක් තෝරා පත් කර ගනු ලැබේ. 

එමෙන්ම කාන්තා නියෝජනයද 25%ක් වන ලෙස අපේක්ෂකයන් ඉදිරිපත් කර ඇත.

මූලාශ්‍රය – සිළුමිණ

යුද හමුදාව විසින් පසුගිය කාලයේ විවිධ විමර්ශන කටයුතු සඳහා රදවාගෙන තිබූ භාණ්ඩ තොගයක් අදාළ විමර්ශන නිමවීමෙන් අනතුරුව රජය වෙත භාරදීම යුද හමුදා මූලස්ථානයේදී අද (2) සිදුවිය.

යුද්ධය අවසන්වීමෙන් අනතුරුව LTTE සංවිධානයේ බැංකුවල හා එම සංවිධානය සතුව තිබී යුද හමුදාව මගින් තම භාරයට ගෙන විමර්ශන සඳහා මෙතෙක් රඳවා තබාගෙන තිබූ රත්‍රං, රීදී හා මැණික් ඇතුළු ස්වර්ණාභරණ  මෙලෙස භාරදුන් භාණ්ඩ අතර විය.

ඒ අනුව ස්වර්ණාභරණ සහිත පාර්සල් 120ක් අද දිනයේදී පොලීසිය වෙත භාරදී තිබේ.

නීතිපතිවරයාගේ උපදෙස් මත මෙම භාණ්ඩ පාර්සල් පොලිස් ආරක්‍ෂාව යටතේ ශ්‍රී ලංකා මැණික හා ස්වර්ණාභරණ අධිකාරියේ මගින් පරීක්ෂාවට ලක් කිරීමෙන් අනතුරුව ශ්‍රී ලංකා මහ බැංකුව වෙත භාරදීමට නියමිතව ඇත.

මෙම අවස්ථාවට ශ්‍රී ලංකා යුද හමුදා බුද්ධි අංශ අධ්‍යක්ෂ ජෙනරාල් මේජර් ජෙනරාල් දීප්ත ආරියසිංහ, වැඩබලන පොලිස්පති ප්‍රියන්ත විරසූරිය හා මැණික් හා ස්වර්ණාභරණ අධිකාරියේ සභාපති නවීන් සූර්යආරච්චි යන මහත්වරුන් සහභාගි වූහ.

මෙම රන් භාණ්ඩ ස්වර්ණාභරණ අධිකාරිය මගින් පරීක්ෂාවට ලක්කිරීම අනතුරුව එහි වටිනාකම හා බර ප්‍රමාණය ප්‍රකාශයට පත්කර මාධ්‍යයට දැනුවත් කිරීමට නියමිතව ඇත.

මෙම රන් භාණ්ඩවල හිමිකරුවන්ට සිය අනන්‍යතාව තහවුරු කිරීමෙන් අනතුරුව යළි භාරදීමට කටයුතු කිරීමට උත්සාහ කරන බව මෙහිදී අදහස් දක්වමින් වැඩබලන පොලිස්පතිවරයා පැවසීය.

(අද දෙරණ)