කථානායකවරයාගේ ප්‍රධානත්වයෙන් අද (08) පාර්ලිමේන්තු කටයුතු ආරම්භ කර තිබේ.

ජූලි මස පළමුවන රැස්වීම් සතියේ පළමු රැස්වීම අද යි.

පෙ.ව. 9.30 – පෙ.ව. 10.00 කාලය ස්ථාවර නියෝග 22හි 1 සිට 6 දක්වා සඳහන් පාර්ලිමේන්තු කටයුතු සඳහා වෙන්කර ඇත.

පෙ.ව. 10.00 – 11.00  කාලය වාචික පිළිතුරු අපේක්ෂා කරන ප්‍රශ්න සඳහා වෙන් කර තිබේ.

පෙ.ව. 11.00 -11.30 කාලය ස්ථාවර නියෝග 27(2) යටතේ ප්‍රශ්න සඳහා වෙන් කර ඇත.

අනතුරුව පෙ.ව. 11.30 සිට ප.ව. 5.00 දක්වා ආනයන හා අපනයන පාලන පනත යටතේ අංක 2437/04 දරන ගැසට් නිවේදනයේ පළකර ඇති නියමයන් විවාදයට ගැනීමට නියමිතය.

කතානායක වෛද්‍ය ජගත් වික්‍රමරත්න මහතාට එරෙහිව විශ්වාසභංග යෝජනාවක් ඉදිරිපත් කිරීමට විපක්ෂයේ දේශපාලන පක්ෂ සූදානම් වන බවට ආරංචියක් පැතිර තිබේ.

මේ සඳහා විපක්ෂයේ බොහෝ දේශපාලන පක්ෂ එකඟ වී ඇතැයි ද එම ආරංචි මාර්ග  වැඩිදුරටත් සඳහන් කළේය.

මේ සම්බන්ධයෙන් අද (08) ස්ථිර  තීරණයකට එළඹීමට නියමිත බවද පැවසේ.

කතානායකවරයා ලබාගෙන ඇතැයි පැවසෙන යම් යම් පහසුකම් සම්බන්ධයෙන් කොළඹදී ඊයේ (07) පැවැති සමගි ජන බලවේගයේ කණ්ඩායම් රැස්වීමේදීද ඇතැම් මන්ත්‍රීවරුන් විවේචනාත්මකව කතා කර ඇතැයි ද වාර්තා වේ.

තමන්ට හිමි  පහසුකම් වලට අමතරව වෙනත්  පහසුකම්ලබාගැනීම, ධූරයේ බලය අයුතු ලෙස පරිහරණය කිරීම සහ ආණ්ඩු පක්ෂයට වැඩි පක්ෂග්‍රාහීත්වයෙන් කටයුතු කිරීම යනාදී චෝදනා පදනම් කරගෙන මෙම විශ්වාසභංග යෝජනාව ඉදිරිපත් කෙරුණු ඇතැයි දැනගන්නට ඇත.

දයාසිරි ජයසේකර මහතා ඇතුළු විපක්ෂයේ මන්ත්‍රීවරුන්  ගණනාවක් පසුගිය කාලයේදී මැතිසභයේදීද කතානායකවරයා දැඩි ලෙස විවේචනය කරනු දැක ගත හැකිවිය.
සබැඳි පුවත්

බලශක්ති අමාත්‍යංශයට අයත් සුඛෝපභෝගී වාහන 14ක් විකිණීමට අදාළව ටෙන්ඩර් පත්‍ කැඳවා තිබේ.

අනවශ්‍ය ලෙස මහජන මුදල් නාස්තිය වළක්වන රජයේ ප්‍රතිපත්තියට අනුව මෙලෙස අදාළ වාහන විකිණීමට පියවර ගන්නා ලෙස බලශක්ති අමාත්‍ය කුමාර ජයකොඩි මහතා ලබාදුන් උපදෙස් මත මෙම පියවර ගන්නා බව බලශක්ති අමාත්‍යංශය පවසයි.

ඒ අනුව ඊට අදාළ අයදුම්පත් බලශක්ති අමාත්‍යංශයෙන් ලබා ගැනීමේ හැකියාව පවතින අතර අයදුම්පත් ලබාගත් පුද්ගලයින්ට එම වාහන පරීක්ෂාකර බැලීමේ හැකියාව පවතින බව බලශක්ති අමාත්‍යංශය පෙන්වා දෙයි.

මේ සම්බන්ධයෙන් වැඩිදුර තොරතුරු 0112 574 740 සහ 0112 574 941 යන දුරකතන අංක ඔස්සේ ලබාගත හැකි බව එම අමාත්‍යංශය සඳහන් කළේය.