මෙතෙක් කාලයක් කිසිම රංගන ශිල්පියෙක් ශිල්පිනියක් නොලැබූ ආකාරයේ රසික ප්‍රසාදයක්, ගරුත්වයක් මාලනී ෆොන්සේකාට ලැබුණ ද ජාතියක් වශයෙන් ඇයට ලබා දිය යුතු ගරුත්වය ලැබුණාදැයි විටෙක සිතෙන බව ප්‍රවීණ රංගන ශිල්පී ආචාර්ය රවීන්ද්‍ර රන්දෙණිය මහතා නිළි රැජින මාලිනී ෆොන්සේකා මහත්මියගේ අවමංගල්‍ය උත්සවයේදී කියා සිටියේය.
එහිදී රංගවේදි රවීන්ද්‍ර රන්දෙණිය මෙසේද සඳහන් කළේය.
‘‘මම මේ විවේචනයක් කරනවා නොවෙයි. ඒත් ඇයට මීටත් වඩා මහා ගරුත්වයකින් මේ රට සැලකිය යුතුව තිබුණා කියලා මට හිතෙනවා. ඇය ඉන්දියාවේ හිටියා නම් පද්ම ශ්‍රී සම්මානයෙන් විතරක් නොවෙයි භාරත රත්න සම්මානෙනුත් පිදුම් ලබනවා. ඒ තරම් මහා සේවයක් එතුමිය සිනමාව වෙනුවෙන් කළා. අපි ඇයට අඩුම තරමේ ඊට සමීප සම්මානයක්වත් දුන්නේ නැහැ. මට මතකයි කාලයකට කලින් ඇයට යම්කිසි රාජ්‍ය ගරුත්වයක් ලැබුණා. මේ රටේ ජනතාව නම් ඇයට දරාගන්න බැරි, ජීවිතයේ කිසිම කෙනෙක්ට ලබන්න බැරි මහා සම්මාන ගොන්නකින් එතුමියට පුද උපහාර දැක්වූවා. කලාකරුවන් අතින් ජාතියට කෙරෙන මෙහෙවර පිළිබඳව අපි යම්කිසි ආකාරයකින් කල්පනාවට ගත යුතුයි කියලා මට හිතෙනවා. මහාචාර්ය සරච්චන්ද්‍රයන්, නන්දා මාලනියන් වැනි ලෝක පූජිත විය යුතු කලාකරුවන් මොනතරම් අපේ රටෙන් බිහිවෙලා තියෙනවද? නමුත් අපි ජාතියක් වශයෙන් නිසි ප්‍රණාමයක් පුද කරලා තියෙනවද?
මාලනීගේ අවමගුලේදී කියන්න ඕන නැති ඒවා…..
“මම මේ කියන දේවල් මාලනියගේ අවමංගල උත්සවයේදී කතා කළ යුතු දේවල් නොවෙයි කියලත් කෙනෙකුට හිතෙන්න පුළුවන්. දේශීය සිනමාවේ ශිල්පීන් වෙනුවෙන්, දේශීය සිනමාවේ උන්නතිය වෙනුවෙන් මාලනී ෆොන්සේකා මහත්මිය තමන්ගේ ජීවිත කාලයම කැප කළා. තමන්ගේ කාලය, ශ්‍රමය, ධනය වැය කරමින් වෙහෙස මහන්සි වෙමින් මේ රටේ කලාකරුවන්ගේ සියලු ගැටලුවලදී ඉතාමත් ප්‍රබලව ක්‍රියාකාරීව ඉදිරිපත් වෙලා මාලිනී ෆොන්සේකා මහත්මිය සටන් කරලා තියෙනවා. එතුමියට උපහාරයක් වශයෙනුයි මම මේ අදහස් ප්‍රකාශ කළේ.”
කලා කාරයන්ට විශේෂ වරප්‍රසාද නෑ…
“කලාවේ නියුතු අයට අනෙකුත් රැකියාවලින් ලැබෙනවා වගේ විශේෂ වරප්‍රසාද හිමිවෙන්නේ නැහැ. අර්ථසාධක හෝ රාජ්‍ය අනුග්‍රහයෙන් ලැබෙන ප්‍රතිපාදන කිසිවක් ඔවුන්ට ලැබෙන්නේ නැහැ. රැකියාව අහිමිවන දාට ඔවුන් අසරණ තත්ත්වයට පත්වෙනවා. මේ තත්ත්වය වෙනස් කරන්න කවර හෝ වැඩපිළිවෙලක් මේ රටේ කලාකරුවන් වෙනුවෙන් විය යුතුයි කියන එකත් මාලනී ෆොන්සේකා මහත්මියගේ සිහිනයක් වෙලා තිබුණා. ඇයගේ බලාපොරොත්තුව ඉටුවේවා කියලත් ඇයට සමුදෙන මොහොතේ මම ප්‍රාර්ථනා කරනවා.”
රජය කලා කාරයින්ට රාජ්‍ය ගෞරවයදීල සැලැකිය යුතුයි
“මාලනිය කියන්නේ රංගනය පමණක් කළ ශිල්පිනියක් නොවෙයි. ඇය කලාව තුළින් මුළු රටක්, ලෝකයක් වසඟ කළ මුළු ලෝකයේම ගෞරවය දිනාගත් කෙනෙක්. සමස්ත ලෝකයේම සම්භාවනාවට පාත්‍ර වූ වෙනත් කලාකරුවෙක් හෝ කලාකාරිනියක ශ්‍රී ලංකාවෙන් බිහිවෙලා නැහැ. එතුමියට ජාතියක් වශයෙන් සමුදෙන ඓතිහාසික මොහොතේ මොනතරම් රික්තයක් රට තුළ ඇතිවෙනවාද? එතුමිය කළ මහාර්ඝ සේවය දේශීය සිනමාව පවතින තාක් කල් වෙන කෙනෙක්ට කරන්න බැහැ. ඒ මහා සේවය වෙනුවෙන් මුළු ජාතියේම ප්‍රණාමය ඇයට හිමි විය යුතුයි. රාජ්‍ය ගෞරව සහිතව මේ අවමංගල්‍ය උත්සවය පැවැත්වීමට තීරණය කළාට මම රජයට මගේ ගෞරවය ආචාර්ය පළ කරනවා. කලාකරුවන්ට සැලකිය යුත්තේ එලෙසයි.’’
