මෙරට තුළ ඖෂධ හිඟයක් පවතින බවට පැතිර යන ප්‍රචාර සම්බන්ධව සෞඛ්‍ය හා ජනමාධ්‍ය නියෝජ්‍ය අමාත්‍ය වෛද්‍ය හංසක විජේමුණි මහතා විසින් කරුණු දක්වා තිබේ.

නියෝජ්‍ය අමාත්‍යවරයා පැවසුවේ රජයේ රෝහල් තුළින් ලබා දෙන ප්‍රමුඛ පෙළේ ඖෂධ හිඟයක් ඇති බවට යම් යම් පාර්ශ්වයන් විසින් පවසා ඇති නමුත්

“අධි රුධිර පීඩනය, දියවැඩියාව වගේ දේවල්වලට දෙන ඖෂධ එහෙම හිඟයක් නෑ. නමුත් ඖෂධ වර්ග කිහිපයක සැපයුමේ යම් යම් බිඳ වැටීම් අපි නිරීක්ෂණය කරලා තියෙනවා සහ ඒවට අපි අවශ්‍ය ප්‍රතිකර්ම යොදලා තියෙනවා. ඒක අද ඊයේ ඇතිවුණ දෙයක් නෙමේ අවුරුදු ගණනාවක් පැවතුණු තත්ත්වයක්. එහෙම තත්ත්වයක් වුණත් ඇති නොවෙන්න අපි දැන් ක්‍රියාමාර්ග අරන් තියෙනවා. 2026 අවුරුද්ද වෙනකොට මේක සම්පූර්ණයෙන් වගේ මග හරවගන්න පුළුවන් කියලා අපි විශ්වාස කරනවා.

ඔවුන් මේ සඳහා යොදා ගන්නේ අපේ මධ්‍යම බෙහෙත් ගබඩාවේ තියෙන දත්ත පද්ධතිය. ඒ දත්ත පද්ධතියෙන් විතරක් අපේ  රෝහල්වල තියෙන ඖෂධ ගැන කොහොමද තියන්නේ කියන එක කියන්න බෑ.

යම් කිසි බෙහෙතක් නැත්නම් ඒ බෙහෙත ප්‍රාදේශීව මිලදී ගැනීමේ ක්‍රියාවලියක් අපිට තියෙනවා ඒ හරහා අපි ලබා දෙනවා. ඒ නිසා ඖෂධ 180ක් මධ්‍යම බෙහෙත් ගබඩාවේ නැති වුණා කියලා රෝගීන්ට බෙහෙත් නැති වෙන්නේ නෑ ඒ සඳහා වූ ප්‍රාදේශීය බෙහෙත් ගබඩාවල බෙහෙත් තියෙනවා.

මේ දවස්වල නිතර කතා වෙන බෙහෙතක් තියෙනවා ඒ බෙහෙත පිළිකා සඳහා ප්‍රතිකාර ලබා දීලා ඊට පසුව දෙන බෙහෙතක්. ඒ බෙහෙතේ පසුගිය සතියක දෙකක වගේ සප්ලයි චේන් එකේ බිඳ වැටීමක් සිද්ධ වුණා අපි දැන් ඒක නිවැරදි කරගෙන යනවා. අපිට මාස 10කට ආසන්න තොගයක් ළඟදීම ලැබෙනවා.

රෝහල්වලට එන නිදහස් සෞඛ්‍ය සේවය මත තමන්ගේ ජීවිත පවත්වාගෙන යන මිනිස්සුන්ව බය කරන්න එපා. මේවා ඉතාම සංවේදී කාරණා.”

(අද දෙරණ)

වැඩබලන උප තැපැල් ස්ථානාධිපතිවරුන් 378කට ස්ථිර පත්වීම් ප්‍රදානය කිරීමට නියමිතව තිබේ.

පත්වීම් පිරිනැමීම හෙට (15) සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතගේ ප්‍රධානත්වයෙන් සිදු කෙරේ.

සම්මුඛ පරීක්ෂණ මගින් තෝරාගත් 378 දෙනෙකු සඳහා ස්ථිර විශ්‍රාම වැටුප් සහිත පත්වීම් ලබාදීමට විශේෂ අමාත්‍ය මණ්ඩල අනුමැතියක් ලබා ගැනීමෙන් අනතුරුව මෙම පත්වීම් පිරිනැමීම සිදුකරනු ලබයි.

ශ්‍රී ලංකාවේ විදේශීය ණය බර 2023 වසරට සාපේක්ෂව 2024 දී ඉහළ ගොස් ඇතැයි ශ්‍රී ලංකා මහ බැංකුව පෙන්වා දී තිබේ.

 2023 වසරේදී මෙරට විදේශීය ණය බර ඇමෙරිකානු ඩොලර් බිලියන 63.4 කි.

එහෙත් 2024 දී ශ්‍රී ලංකාවේ විදේශීය ණය බර ඇමෙරිකානු ඩොලර් බිලියන 68 ක් දක්වා ඩොලර් බිලියන 5 කින් හෙවත් ඩොලර් කෝටි 500 කින් පමණ ඉහළ ගොස් තිබේ.

මෙලෙස විදේශ ණය බර ඉහළ ගොස් ඇත්තේ ජාත්‍යන්තර මූල්‍ය අරමුදල, ආසියානු සංවර්ධන බැංකුව සහ ලෝක බැංකුව විසින් ශ්‍රී ලංකාවට සපයන ලද විදේශීය ණය සහ වගකීම් ඉහළ යාම නිසා බවද මහ බැංකුව වැඩිදුරටත් පවසයි.

මූලාශ්‍රය – දේශය