කීරි සම්බා සහල් වෙනුවට ඊට සමාන GR 11 නැමති සහල් මෙට්‍රික් ටොන් 50,000ක් පෞද්ගලික අංශය මඟින් ආනයනය කිරීමට අමාත්‍ය මණ්ඩල අනුමැතිය හිමිව තිබේ.

වෙළෙඳපොළේ සහල් මිල පාලනය සඳහා ආහාර ප්‍රතිපත්ති කමිටුවේ නිර්දේශය පරිදි එසේ සහල් ආනයනය කිරීම පිණිස  2023.11.20 වන දින පැවති අමාත්‍ය මණ්ඩල රැස්වීමේ දී එයට අනුමැතිය ලබා දී තිබුණි.

දේශීය වෙළෙඳපොළ තුළ කීරි සම්බා සහ සම්බා සහල් වල මිලෙහි තරඟකාරීත්වයක් ඇති කරමින්, මිලෙහි වාසිය පාරිභෝගිකයාට ලබාදීමේ අරමුණින් මෙම සහල් තොගය ආනයනය කිරීමට වාණිජ හා ආහාර සුරක්ෂිතතා අමාත්‍යවරයා ඉදිරිපත් කළ එම යෝජනාවට එලෙස අමාත්‍ය මණ්ඩල අනුමැතිය හිමිව තිබේ.

බඩ ඉරිඟු ගෙන්වන්නත් අනුමැතිය

මීට අමතරව සීමා සහිත ශ්‍රී ලංකා රාජ්‍ය වාණිජ විවිධ නීතිගත සංස්ථාව මගින් බඩ ඉරිඟු ආනයනය කිරීම සඳහා ද කැබිනට් අනුමැතිය ලබා දී ඇත.

විවෘත වෙළෙඳපොලේ ප්‍රමාණවත් බඩ ඉරිඟු තොග නොමැති වීම හේතුවෙන් කුකුළු කෑම නිෂ්පාදන සඳහා අවශ්‍ය අමුද්‍රව්‍යවල හිඟයක් පවතින බව රජය පවසයි.

ඒ සඳහා තාවකාලික පියවරක් ලෙස සත්ව නිෂ්පාදන හා සෞඛ්‍ය දෙපාර්තමේන්තුව මඟින් බඩ ඉරිඟු මෙට්‍රික් ටොන් 15000ක් ආනයනය කිරීම සඳහා රාජ්‍ය විවිධ නීතිගත සංස්ථාවට අවශ්‍ය බලපත්‍ර ලබා දී ඇත.

ඒ අනුව රාජ්‍ය විවිධ නීතිගත සංස්ථාව මඟින් ලියාපදිංචි විදේශ සැපයුම්කරුවන් වෙතින් බඩ ඉරිඟු මෙට්‍රික් ටොන් 15000ක උපරිමයකට යටත්ව ආනයනය කිරීම සඳහා මුදල් ආර්ථික ස්ථායීකරණ හා ජාතික ප්‍රතිපත්ති අමාත්‍ය වශයෙන් ජනාධිපතිවරයා ඉදිරිපත් කළ යෝජනාව කැබිනට් මණ්ඩලය විසින් අනුමත කර ඇත.

ඉන්දියාවෙන් තවත් බිත්තර ගෙන්වන්න අනුමැතිය

මේ අතර දේශීය වෙළඳපොළේ බිත්තර මිල සීඝ්‍රයෙන් ඉහළ යාමේ ප්‍රවනතාවක් පවතින බැවින්, බිත්තර මිල ස්ථාවර කරීම සඳහා බිත්තර ආනයනය කිරිමට 2023.08.14 පැවැති කැබිනට් රැස්වීමේදී අනුමැතිය ලැබී තිබිණි.

ඒ අනුව සත්ව නිෂ්පාදන සහ සෞඛ්‍ය දෙපාර්තමේන්තුව විසින් නිර්දේශ කර ඇති ඉන්දීය ගොවිපොළ වලින් තවත් බිත්තර මිලියන 18ක ප්‍රමාණයක් ආනයනය කිරීම සඳහා වෙළෙඳ අමාත්‍යවරයා ඉදිරිපත් කළ යෝජනාව කැබිනට් මණ්ඩලය විසින් අනුමත කර තිබේ.

මේ වන විට සීමා සහිත ශ්‍රී ලංකා රාජ්‍ය වාණිජ (විවිධ) නීතිගත සංස්ථාව මගින් බිත්තර මිලියන 155ක් ආනයනය කර ඇති අතර 2023.12.31 දිනට පෙර තවත් බිත්තර තොගයක් ආනයනය කිරීම සඳහා මේ වන විටත් කටයුතු කර ඇත.