ඉන්දීය පාකිස්තාන ගැටුමත් සමග පාකිස්තානයට මෙරට බුලත් අපනයනය නතර කිරීම හේතුවෙන් මෙරට බුලත් ගොවීන් දැඩි දුෂ්කරතාවට පත්ව ඇති බවට එම ගොවීහු මැසිවිලි නගති.

මෙම ගැටලුව විසඳෙන දිනයක් නිශ්චිතවම නොමැති වීම හේතුවෙන් ගොවීන්ට යළි වගාවන්වලට ප්‍රවේශවීමට නොහැකිව බලාසිටීමට සිදුව ඇතැයිද ඔවුහු පවසති.

මේ පිළිබඳව අදහස් දක්වමින් බුලත් ගොවීන් සුරැකීමේ සංවිධානයේ සභාපති ඩබ්ලිව්. එල්. සරත් චන්ද්‍රසිරි පැවසුවේ පාකිස්තානයට බුලත් කොළ දහසක් අපනයනය කරනු ලබන්නේ රුපියල් විසිපන්දහසකට වැනි මුදලකට බවය.

කෙසේ වෙතත් ඉන්දීය පාකිස්තාන ගැටුම අවසන් වන තෙක් බලා සිටීමට නොහැකි බැවින් බුලත් සඳහා එංගලන්තය, ජර්මනිය ආදී යුරෝපීය රටවල් ගණනාවක මෙන්ම මාලදිවයින, මැලේසියාව ආදී රටවලට විශාල ඉල්ලුමක් නිර්මාණය වී ඇති මොහොතක එම රටවලට බුලත් අපනයනය කිරීමට අවස්ථාව ලබාදෙන ලෙස සභාපතිවරයා රජයෙන් ඉල්ලීමක්ද කරයි.

“අපි ණය ඉල්ලන්නෙ නැහැ. වෙනත් සහනාධාර ඉල්ලන්නෙත් නැහැ. අපි සබඳතා ගොඩනගලා ඇතිකරගන්න වෙළෙඳ අවබෝධතා අනුව බුලත් අපනයනය කරන්න අවශ්‍ය යටිතල පහසුකම් සපයලා දෙන්න කියලා විතරයි ඉල්ලන්නෙ. ඒක කරල දුන්නම අපි රටට අපේ ශක්ති ප්‍රමාණයෙන් ඩොලර් ගෙන එන බව අපි රජයට කියනවා. අපිට අනුකම්පා කරන්න අවශ්‍ය නැහැ. රජයකට පමණක් කරන්න පුළුවන් කොටසක් තියනවානෙ අන්න ඒ ටික පමණයි අපි ඉල්ලන්නෙ. බුලත් රෝග, වෛරස් ගැටලු කළමනාකරණය කර ගන්න දැනට අපේ ගොවීන්ට පුළුවන්. ගොවීන් කිව්වහම බොහෝ දෙනෙක් හිතන්නෙ අමුඩය ගසාගන ඉන්න කෙනෙක් කියලා. ගොවිතැන වේලාවෙ ඒක එහෙම වුණත් එදිනෙදා ජීවිතයේ ඒ හැම කෙනෙක්ම කාටත් අතනොපා ලස්සනට ජීවත්වෙනවා. තොරතුරු තාක්‍ෂණය උපයෝගී කරගන විදෙස් රටවල සබඳතා අනුව වෙළෙඳපොළත් සොයාගන්නවා. රජයෙන් ඉල්ලන පොඩි දේ නොවුණොත් මේ තියන එකම පාකිස්තාන වෙළෙඳපොළ අහිමිවුවහොත් බුලත් වගාව ඉවරටම ඉවරයි.

මේ කර්මාන්තය එන්න එන්න දියුණු වෙමින් බුලත් ගොවීන් කාටත් අත නොපා ස්වයංව නැගිටිමින් මෙරටට ඩොලර් ගේන කාර්යාවලියට සක්‍රීය දායකත්වය දෙමින් ඉන්න අවස්ථාවෙ තමයි මේ යුද ගැටුම් නිර්මාණය වුණේ. අපේ බුලත්වලට තිබුණ හොඳම වෙළෙඳපොළ වෙලා තිබුණෙ පාකිස්තානය. එරට බොහෝ පිරිසක් බුලත් කනවා. එරට අවශ්‍යතාවයෙන් සියයට 35ක් පමණයි අපි බුලත් යවන්නෙ. ඉතිරි අවශ්‍යතාව ඉන්දියාවෙන් වගේම දැන් දැන් පාකිස්තානයේ බුලත් වවන්නත් පටන් අරගන. ඒත් භූගෝලීය සාධක හේතුවෙන් වෙන්න ඇති අපේ රටේ බුලත්වලටට තියන ඉල්ලුම හරිම ඉහළයි. බුලත් තියාගන්න බැහැ දින දෙකකට වඩා. ඒ නිසා තමයි ගුවණින් අපි බුලත් යවන්නෙ. අපේ රටේ අවශ්‍යතාවට වඩා බුලත් ප්‍රමාණයක් මේ රටේ දැන් පවත්නා නිසා තමයි මේ බුලත් ඉතාම අඩු මුදලට විකිණෙන්නේ.

මූලාශ්‍රය – අරුණ

ලුණු ආනයනය ප්‍රමාද වීම හේතුවෙන් වෙළෙඳපොළ තුළ ලුණු හිඟයක් මතුව ඇති බව ලුණු නිෂ්පාදකයින්ගේ සංගමය පවසයි.

එම සංගමයේ සභාපති ගණක අමරසිංහ මහතා සඳහන් කළේ ලුණු මෙට්‍රික් ටොන් 30ක් ආනයනය කිරීමට රජය තීරණය කර තිබුණ ද  එය ප්‍රමාද වී ඇති බවය.

එම නිසා වෙළෙඳපොළ තුළ ලුණු හිඟයක් දක්නට ලැබෙන බව ගණක අමරසිංහ මහතා සඳහන් කළේය.

ඉදිරි සතිය තුළ අදාළ ලුණු තොග දිවයිනට ලැබීමට සමග පවතින ලුණු හිඟය පාලනය වනු ඇති බව ලුණු නිෂ්පාදකයින්ගේ සංගමයේ සභාපති ගණක අමරසිංහ මහතා සඳහන් කළේය.

මේ අතර වෙළෙඳපොළ තුළ ලුණු මිල ද ඉහළ ගොස් ඇති බවට පාරිභෝගිකයින් සහ වෙළෙඳුන් චෝදනා කරයි.

කැට ලුණු කිලෝ ග්‍රෑම් 1ක පැකැට්ටුවක මිල රුපියල් 450ත් 500ත් අතර මිලකට අලෙවි කිරීමට වෙළෙඳුන් කටයුතු කරමින් සිටින බව ද වාර්තා වෙයි.

ඇතැම් පාරිභෝගිකයින් ඒ සම්බන්ධයෙන් සිය සමාජ මාධ්‍ය ගිණුම් ඔස්සේ ද අදහස් පළකර තිබුණි.

මේ සම්බන්ධයෙන් අද දෙරණ පාරිභෝගික පිළිබඳ අධිකාරියෙන් විමසීමක් කළේය.

එහිදී පාරිභෝගික කටයුතු සහ තොරතුරු අධ්‍යක්ෂ අසේල බණ්ඩාර මහතා සඳහන් කළේ ලුණු මිල ගණන් සම්බන්ධයෙන් පාරිභෝගික අධිකාරියට ද පැමිණිලි ලැබී ඇති බවය.

ඒ අනුව අවශ්‍ය ක්‍රියාමාර්ග ගන්නා ලෙස වැටලීම් නිලධාරීන්ට උපදෙස් ලබා දී ඇති බව අසේල බණ්ඩාර මහතා සඳහන් කළේය.

පසුගිය දා කැනඩාවේ ටොරොන්ටෝහි පැවති SIAL Canada 2025 වෙළෙඳ ප්‍රදර්ශනයට ශ්‍රී ලංකාව ද සහභාගි විය.

විදේශ කටයුතු අමාත්‍යාංශය පවසන්නේ ටොරොන්ටෝහි එනර්කෙයාර් ප්‍රදර්ශන මධ්‍යස්ථානයේ පැවති මේ වෙළෙඳ ප්‍රදර්ශනයට ශ්‍රී ලාංකේය ආහාර පාන අපනයන සමාගම් 15කට වැඩි ප්‍රමාණයක් සහභාගි වී තිබෙන බවය.

අප්‍රේල් 29 සිට මැයි 1 දක්වා ටොරොන්ටෝ හි එනර්කෙයාර් ප්‍රදර්ශන මධ්‍යස්ථානයේ දී මෙම ප්‍රදර්ශනය පැවැත්විණි.

SIAL කැනඩා යනු කැනඩාවේ ආහාර පාන අංශයේ ප්‍රධාන වාර්ෂික වෙළෙඳ ප්‍රදර්ශනවලින් එකක් වන අතර,රටවල් 44කින් ප්‍රදර්ශකයන් සහ වෙළෙඳ නාම 1,000කට අධික සංඛ්‍යාවක් ආකර්ෂණය කර ගනී. රටවල් 77කින් වෘත්තිකයන් 21,000කට වැඩි පිරිසක් සහභාගි වන අතර සියලු කැනේඩියානු පළාත් නියෝජනය වේ.

ටොරොන්ටෝහි ශ්‍රී ලංකා කොන්සල් ජෙනරාල්වරයා වෙළෙඳ ප්‍රදර්ශනය නැරඹීමට එක්ව තිබෙන අතර,කැනේඩියානු වෙළෙඳපොළේ ප්‍රධාන සැපයුම්දාම සහ ප්‍රමුඛපෙළේ සිල්ලර ව්‍යාපාරික ආයතන සමඟ ඔවුන්ගේ ව්‍යාපාරික ජාලය පුළුල් කිරීමට දරන උත්සාහයන්ට සහාය දක්වන ශ්‍රී ලාංකික සමාගම්වල නියෝජිතයන් ද හමු වී තිබේ.