පුවත්
වැඩිමිලට බෙහෙත් විකුණූ ආසිරි රෝහල් අධ්‍යක්ෂ මණ්ඩලයට දඩ
ජාතික ඖෂධ නියාමන අධිකාරි පනතට අනුව ඖෂධ සඳහා පනවා ඇති උපරිම සිල්ලර මිල ඉක්මවා ඖෂධ 11ක් අලෙවි කිරීම සම්බන්ධයෙන් නගා තිබූ චෝදනා සියල්ලටම වරද පිළිගත් ආසිරි මෙඩිකල් රෝහලේ අධ්‍යක්ෂ මණ්ඩලයට මාලිගාකන්ද මහේස්ත්‍රාත් අධිකරණය විසින් රුපියල් 25,000/- ක දඩ මුදලක් ගෙවන ලෙස නියෝග කළේය.
පසුගිය 17 වැනිදා නීතීඥ දනුෂ්ක වීරසිංහ මහතා මෝසමක් ඉදිරිපත් කරමින් චූදිතයන් වන අධ්‍යක්ෂවරුන් වෙනුවෙන් බලය ලත් නියෝජිත කැලුම් ගිමෙන්ත්‍ර ජයසූරිය යන අය පෙනී සිටිමින් අදාළ නඩුවේ සියලු චෝදනා පිළිගැනීමෙන් පසුව වැඩබලන මහේස්ත්‍රාත්වරයා විසින් මේ දඩය නියම කළේය.
2015 අංක 5 දරණ ජාතික ඖෂධ නියාමන අධිකාරි පන‍ට අනුව ගොනුකර තිබූ මේ නඩුවේ විත්තකරුවන් ලෙස ආසිරි හොස්පිට්ල්ස් හෝල්ඩිංග්ස් පීඑල්සී ආයතනය, එහි අධ්‍යක්ෂවරුන් වන විශාල් බාලි, අශෝක කාරියවසම් පතිරගේ, අන්කුර් නාන්ද් තදානි, කරුණාමුනි මංජුල ප්‍රසන්න කරුණාරත්න, සුදර්ශන් අහංගම, ගාර්දියර් ලොකුගේ හැරීස් ප්‍රේමරත්න, සිවකුමාර් සෙල්ලයියා, හරේෂ් කුමාර් කයිමාල්, අජිත් කරුණාරත්න හා බී.ඩී. සදතිසරු (සහකාර කළමනාකාරීනී බිල්පත්) ඇතුළු පිරිස නම් කර තිබිණි.
සිය මවට ප්‍රතිකාර ලබාගැනීම සඳහා ආසිරි රෝහලට ඇතුළත් කිරීමෙන් අනතුරුව ලබාදුන් ඖෂධ 11කට නියමිත මිලට වඩා වැඩි මුදලක් අය කිරීම සම්බන්ධයෙන් නුගේගොඩ පදිංචි සනත් කුමාර අතුකෝරාළ යන අය විසින් ජාතික ඖෂධ නියාමන අධිකාරිය වෙත පැමිණිල්ලක් කර තිබිණි.
එම පැමිණිල්ලට අනුව පරීක්ෂණයක් පැවැත්වීමෙන් අනතුරුව ජාතික ඖෂධ නියාමන අධිකාරිය විසින් 2023 දෙසැම්බර් 15 වැනිදා ආසිරි පෞද්ගලික රෝහල සහ එහි අධ්‍යක්ෂ මණ්ඩල සාමාජිකයන් 10 දෙනා විත්තිකරුවන් ලෙස නම් කරමින් මාලිගාකන්ද මහෙස්ත්‍රාත් අධිකරණය හමුවේ නඩු පවරන ලදී.
ආසිරි රෝහල විසින් උපරිම සිල්ලර මිල ඉක්මවා රෝගියකුට ඖෂධ අලෙවි කිරීම මගින් අදාළ රෝහල සහ අධ්‍යක්ෂ මණ්ඩලය ජාතික ඖෂධ නියාමන අධිකාරි පනත යටතේ දඬුවම් ලැබිය හැකි වරදක් සිදු කර ඇති බව සඳහන් කරමින් චෝදනා 11ක් යටතේ මෙම නඩුව පවරා තිබිණි.
මෙම නඩුවේ සාක්ෂිකරුවන් ලෙස ජාතික ඖෂධ නියාමන අධිකාරියේ ප්‍රධාන ආහාර හා ඖෂධ පරීක්ෂක අමිත් පෙරේරා ඇතුළු 7 දෙනෙකු නම් කර තිබූ අතර නඩුවට ඉදිරිපත් කිරීමට බලාපොරොත්තු වන ආසිරි රෝහල විසින් උපරිම සිල්ලර මිල ඉක්මවා අලෙවි කරන ලද ඖෂධවලට අදාළ බිල්පත් සහ වෛද්‍ය වාර්තා පිළිබඳවද ජාතික ඖෂධ නියාමන අධිකාරිය නඩු පවරන අවස්ථාවේදී අධිකරණය වෙත දැනුම් දී තිබිණි.
මෙම නඩුව 2023 දෙසැම්බර් 15 වැනිදා සලකා බැලූ මාලිගාකන්ද ප්‍රධාන මහෙස්ත්‍රාත් ලෝචනී අබේවික්‍රම මහත්මිය, එම පෞද්ගලික රෝහලට සහ අධ්‍යක්ෂ මණ්ඩලයේ සියලුදෙනාම, 2024 ජනවාරි 23 වැනිදා අධිකරණය හමුවේ පෙනී සිටින ලෙස දන්වමින් නොතිසි නිකුත් කළාය.
ඒ අනුව මෙම නඩුව ඉකුත් 23 වැනිදා මාලිගාකන්ද මහෙස්ත්‍රාත් අධිකරණය හමුවේ කැඳවීමට නියමිතව තිබූ බැවින් ජාතික ඖෂධ නියාමන අධිකාරියේ නිලධාරීහු සිය නීතිඥවරු සමඟ පැමිණිලිකරුද අධිකරණය වෙත පැමිණ සිටියහ.
එහිදී ඔවුන්ට අධිකරණයේ රෙජිස්ටාර් කාර්යාලයෙන් දැන ගැනීමට ලැබී ඇත්තේ අදාළ නඩුව ජනවාරි 17 වැනිදා කැඳවූ බවයි.
විත්තිකාර පාර්ශ්වය වෙනුවෙන් නීතිඥ ධනුෂ්ක වීරසිංහ විසින් ගොනු කරන ලද මෝසමකට අනුව නඩුව කැඳවා තිබෙන බවත්, වැඩබලන මහෙස්ත්‍රාත් ඉදිරියේ සියලු චෝදනාවන්ට වරද පිළිගෙන ඇති බවත් ජාතික ඖෂධ නියාමන අධිකාරියේ නිලධාරීන්ට සහ පැමිණිලි පාර්ශ්වයට දැන ගැනීමට ලැබී තිබේ.
අදාළ පෞද්ගලික රෝහලේ සියලුම විත්තිකාර අධ්‍යක්ෂවරුන් වෙනුවෙන් ඔවුන්ගේ බලයලත් නියෝජිත කැලුම් ගිමේන්ත්‍ර ජයසූරිය අධිකරණය හමුවේ එදින පෙනී සිට තිබේ.
ඒ අනුව වැඩබලන මහෙස්ත්‍රාත් ඉදිරියේ විත්තිකාර අධ්‍යක්ෂ මණ්ඩලයට එරෙහිව ජාතික ඖෂධ නියාමන අධිකාරිය විසින් නගා තිබූ චෝදනා කියවා දීමෙන් අනතුරුව, එම චෝදනා සියල්ලටම වරද පිළිගෙන තිබේ.
අනතුරුව වැඩබලන මහෙස්ත්‍රාත් විත්තිකරුවන්ට අදාළ චෝදනා සියල්ලටම දඩ නියම කර ඇත.
ඒ අනුව විත්තිකරුවන් වරද පිළිගත් චෝදනා 11ට අදාළ රුපියල් 25,000 දඩ මුදල මාලිගාකන්ද මහෙස්ත්‍රාත් අධිකරණය වෙත ගෙවා තිබේ.
* මාලිගාකන්ද මහේස්ත්‍රාත් අධිකරණය විසින් ලබාදී ඇති තින්දුව පහත දැක්වේ.
* ආසිරි අධ්‍යක්ෂ මණ්ඩලය වෙනුවෙන් පෙනී සිටීමට කැලුම් ගිමෙන්ත්‍ර ජයසූරිය යන අයට බලය පවැරූ ලියවිල්ල.
*වැඩිමිලට විකුණන ලබ ඖෂධ ලයිස්තුව.
සබරගමුව සරසවියේ අවුල් හොයන්න ස්වාධීන කමිටුවක්!
බස්නාහිර පළාතට නව ප්‍රධාන ලේකම්වරයෙක්
හඳුන්නෙත්ති චාමරගෙන් සපෝට් එකක් ඉල්ලයි (වීඩියෝ)
-
පුවත්6 days agoකඩුවෙල NSB බැංකු ශාඛාවේ කෝටි 13ක වංචාවේ කත රිමාන්ඩ්
-
කැබිනට් තීරණ4 days agoබඩඉරිඟු ආනයනයට කැබිනට් අනුමැතිය
-
පුවත්1 week ago“පත්තර මල්ලී” හෙටින් ඉවරයි
-
පුවත්1 week agoNEXTට පසු සේවක බිල්ල වැලිගම MICHELIN?; MICHELIN හි වැඩි කොටස ඉන්දියානු සියැට් ගනියි
-
පුවත්1 week agoආනයනික පළමු පොල් කිරි තොගය හෙට මුදා හැරේ