ජනාධිපතිවරණයේ තේරීම් භාර නිලධාරීන් ද සහභාගී කරගනිමින් අගමැතිවරයාට ආශීර්වාද පළ කිරීම සඳහා කතරගම කිරි වෙහෙරේදී පැවැත්වීමට නියමිත ආශිර්වාද පූජාවක් සම්බන්ධයෙන් පැෆ්රල් සංවිධානය මැතිවරණ කොමිසමට පැමිණිල්ලක් ඉදිරිපත් කර ඇති බවට පුවතක් ‘මව්බිම’ වාර්තා කරයි.
ලිඛිතව පැමිණිල්ලක් ඉදිරිපත් කරමින් මැතිවරණ කොමිසමෙන් පැෆ්රල් සංවිධානය ඉල්ලා ඇත්තේ මෙම පූජාවට තේරීම් භාර නිලධාරීන් සහභාගී වීම වළක්වන ලෙසය.
මැතිවරණ ක්රියාවලියේ සුවිශේෂී කාර්යභාරයක් පැවරී ඇති තේරීම් භාර නිලධාරීන් මෙවැනි අවස්ථාවකට සහභාගී වීම හේතුවෙන් සමාජය තුළ ඔවුන් පිළිබඳ සැක සංකා ජනිත වුවහොත් මැතිවරණයේ සුජාතභාවයට ඉන් බරපතළ හානියක් සිදුවනු ඇති බව එම සංවිධානයේ විධායක අධ්යක්ෂ රෝහණ හෙට්ටිආරච්චි මහතා විසින් පෙන්වා දී තිබේ.
මැතිවරණ කාලසීමාවේදී දිස්ත්රික් ලේකම්වරුන් සහ ප්රාදේශීය ලේකම්වරුන් දිස්ත්රික් තේරීම් භාර නිලධාරීන් සහ සහකාර තේරීම් භාර නිලධාරීන් බවට පත්වන හෙයින් දිස්ත්රික් තේරීම් භාර නිලධාරීන් යටතේ රාජකාරි සිදු කරන අනෙක් නිලධාරීන්ට තම ආයතන ප්රධානියා ගැන අවිශ්වාසයක් මතු වුවහොත් එම තත්ත්වය ද මැතිවරණ ක්රියාවලියට හානිදායක යැයිද මෙම පැමිණිල්ල මඟින් අවධාරණය කර ඇති බව සඳහන්ය.
තේරීම් භාර නිලධාරීන් අපක්ෂපාතී වීම සමාජයට දැනෙන, හැඟෙන අයුරින් සිදුවිය යුතු බවත් ඒ අනුව, මෙම පූජාව සඳහා තේරීම් භාර නිලධාරීන් කැඳවීම නතර කර ඒ ගැන සොයා බලන ලෙසත් හෙට්ටිආරච්චි මහතා පැෆ්රල් සංවිධානය තවදුරටත් ඉල්ලා තිබේ.
