අන්තර්ජාල වංචා සිදුකළ සැකකරුවන් ලෙස චීන ජාතිකයන් ඇතුළු විදේශිකයින් අත්අඩංගුවට ගැනීම සම්බන්ධ වාර්තා පිළිබඳව අවධානය යොමු කර ඇති බව ශ්‍රී ලංකාවේ චීන තානාපති කාර්යාලය පවසයි.
මේ සම්බන්ධයෙන් විශේෂ නිවේදනයක් නිකුත් කරමින් චීන තානාපති කාර්යාලය පවසා ඇත්තේ මෙවැනි වංචා හේතුවෙන් දෙරට ජනතාවගේ වත්කම් වලට එල්ල වන තර්ජනයට අමතරව, දෙරට අතර පවතින මිතුදමටත්, චීනයේ ප්‍රතිරූපයටත් බරපතල හානියක් සිදුවන බවයි.
අන්තර්ජාල වංචා පිළිබඳ ලාංකික මහජනතාවගේ අඩු අවබෝධය මෙන්ම විදුලි සංදේශ යටිතල පහසුකම්, භූගෝලීය පිහිටීම හා චීනය සමඟ ඇති මිත්‍ර සබඳතා සම්බන්ධයෙන් ශ්‍රී ලංකාවේ පවතින වාසි සහගත තත්ත්වයන් හේතුවෙන් ලංකාවට පැමිණ ඇති අපරාධ වංචා කල්ලි, දෙස් විදෙස් රටවල සිටින චීන පුරවැසියන් ඉලක්ක කර ගනිමින්, දිගින් දිගටම මෙවැනි ක්‍රියා වල නිරත වන බව තානාපති කාර්යාලය පවසයි.
මෙය, මෑත කාලයේදී ශ්‍රී ලංකාව තුළ ටෙලිකොම් වංචා සිද්ධීන් ඉහළ යාමටද හේතුවක් වී ඇති බවත් එහි දැක්වේ.
මෙම සැකකරුවන්ගේ නීත්‍යානුකූල අයිතිවාසිකම් සහ අවශ්‍යතා ආරක්ෂා කරන අතරම, ඔවුන්ව කොටු කරගැනීමට ශ්‍රී ලංකා නීතිය ක්‍රියාත්මක කරන ආයතනවලට පූර්ණ සහය ලබා දෙන බව චීන තානාපති කාර්යාලය කියා සිටියි.
චීනයේ ටෙලිකොම් හා අන්තර්ජාල වංචා මුලින්ම වාර්තා වූයේ 1990 ගණන් වල බවත්, මෑතකාලීනව ගෙන ඇති පියවර හේතුවෙන් මේ වන විට චීනය තුළ එවැනි අපරාධ විශාල වශයෙන් අඩු කරගැනීමට හැකි වී ඇති බවත් එහි දැක්වේ.
මේ වන විට ගෝලීය ගැටළුවක් බවට පත්ව ඇති මෙම වංචා මැඩලීම සඳහා මියන්මාරය, කාම්බෝජය, එක්සත් අරාබි එමීර් රාජ්‍යය ඇතුළු රටවල් රැසක් සමගද චීන බලධාරීන් සහයෝගීතාවය වැඩි කර ඇති බවත් තානාපති කාර්යාලය සඳහන් කරයි.
අන්තර්ජාල වංචා මැඩපැවැත්වීම සඳහා චීනයේ මහජන ආරක්ෂක අමාත්‍යාංශය විසින් 2024 සැප්තැම්බර් මාසයේදී ශ්‍රී ලංකා පොලිසිය සමඟ ඒකාබද්ධව විශේෂ මෙහෙයුමක් සිදු කිරීමට ක්‍රියාකාරී කණ්ඩායමක්ද පත්කළ බවත් මේ යටතේ අත්අඩංගුවට ගැනුනු සැකකරුවන් විශාල පිරිසක් යළි චීනයට යැවීම සඳහා අවශ්‍ය කටයුතු ක්‍රමයෙන් සිදුවෙමින් පවතින බවත් එහි දැක්වේ.
ශ්‍රී ලංකාව සමග නීතිය ක්‍රියාත්මක කිරීමේ සහයෝගීතාව තවදුරටත් ශක්තිමත් කිරීමටත්, මෙම ගැටලුව ඒකාබද්ධව විසඳීම සඳහා කඩිනම් හා ඵලදායී ක්‍රියාමාර්ග ගැනීමටත් සූදානමින් සිටින බව පවසන චීනය, මේ සඳහා ශ්‍රී ලංකා රජය, ජනතාව, ජනමාධ්‍ය සහ විශේෂයෙන් ආරක්ෂක අංශවල සහයෝගය නිරතුරුව අපේක්ෂා කරන බවද වැඩිදුරටත් කියා සිටියි.
