අනුර කුමාර දිසානායක මහතා ජනාධිපතිවරයා ලෙස අද (23) දින සිට එම ධුරයේ වැඩ බාර ගැනීමත් සමඟ පුරප්පාඩු වූ ඔහුගේ පාර්ලිමේන්තු මන්ත්‍රී ධුරය සඳහා ජාතික ජනබලවේගයේ ලක්ෂ්මන් නිපුනආරච්චි මහතා පත් කළ බවට විශේෂ ගැසට් නිවේදනය නිකුත් කර තිබේ.
(පෙර පුවත 2024 සැප්තැම්බර් 23, ප.ව. 1:48)
පුරප්පාඩු වූ මන්ත්‍රී ධුරය ලක්ෂ්මන් නිපුනආරච්චිට (Update)
අභිනව ජනාධිපතිවරයා ලෙස ජනාධිපති අනුර කුමාර දිසානායක මහතා තේරී පත්වීමෙන් පසු පුරප්පාඩු වූ පාර්ලිමෙන්තු මන්ත්‍රී ධුරය සඳහා ජාතික ජනබලවේගයේ ලක්ෂ්මන් නිපුනආරච්චි මහතා තොරා පත් කරගෙන තිබේ.
ඒ සඳහා පාර්ලිමෙන්තු මහ ලේකම්තුමියගේ ලිපිය ලැබී තිබෙන බව ශ්‍රී ලංකා මැතිවරණ කොමිෂන් සභාවේ කොමසාරිස් ජනරාල් සමන් ශ්‍රී රත්නායක මහතා සඳහන් කලේය.
පුරප්පාඩු වූ මන්ත්‍රී ධුරය සඳහා අදාළ පත් කිරීම සිදු කිරීමට අවශ්‍ය ගැසට් නිවේදනය පල කිරීම සඳහා කටයුතු සූදානම් කරමින් සිටින බව ඔහු වැඩිදුරටත් පැවසුවේය.
සබැඳි පුවත්
(පෙර පුවත 2024 සැප්තැම්බර් 23, ප.ව. 12:47)
අනුරගේ ඉල්ලා අස්වීම පාර්ලිමේන්තුව මැතිවරණ කොමිෂන් සභාවට දන්වයි
ගරු අනුර කුමාර දිසානායක මහතා සිය මන්ත්‍රී ධුරයෙන් ඉල්ලා අස්වීම හේතුවෙන් නවවැනි පාර්ලිමේන්තුවේ මන්ත්‍රී ධුරයක පුරප්පාඩුවක් පවතින බව පාර්ලිමේන්තුව මැතිවරණ කොමිෂන් සභාවට දන්වයි.
කොළඹ මැතිවරණ කොට්ඨාසයේ පාර්ලිමේන්තු මන්ත්‍රී ගරු අනුර කුමාර දිසානායක මහතා ශ්‍රී ලංකා ප්‍රජාතන්ත්‍රික සමාජවාදී ජනරජයේ ජනාධිපතිවරයා ලෙස එම ධුරය 2024 සැප්තැම්බර් මස 23 වැනි දින සිට භාර ගන්නා ලද හෙයින්, තමා වෙත එවන ලද ලිපියක් මගින් එදින සිට බලපැවැත්වෙන පරිදි තම පාර්ලිමේන්තු අසුනෙන් ඉල්ලා අස්වී ඇති නිසාවෙන් නවවැනි පාර්ලිමේන්තුවේ මන්ත්‍රී ධුරයක පුරප්පාඩුවක් ඇතිවී තිබෙන බව පාර්ලිමේන්තුවේ මහ ලේකම් කුෂානි රෝහණදීර මහත්මිය මැතිවරණ කොමිෂන් සභාව වෙත දන්වා තිබේ.
ආණ්ඩුක්‍රම ව්‍යවස්ථාවේ 66 (ඇ) ව්‍යවස්ථාව සහ 1988 අංක 35 දරන ඡන්ද විමසීමේ විශේෂ විධිවිධාන පණතින් සංශෝධිත 1981 අංක 1 දරන පාර්ලිමේන්තු මැතිවරණ පනතේ 64 (1) වගන්තිය ප්‍රකාරව මෙම දැනුම්දීම සිදු කරන බවද මහ ලේකම්තුමිය සිය ලිපියේ වැඩිදුරටත් සඳහන් කර සිටී.
