ඊශ්‍රායලයේදී මියගිය අනුලා රත්නායක මහත්මියගේ දේහය පිළිබඳ අවසන් කටයුතු අද (30) පස්වරුවේ සිදු කෙරේ.
මේ වනවිට දේහය තැන්පත් කර තිබෙන්නේ, දළුගම පිහිටි ඇයගේ නිවසේ ය.
පසුගිය 7 වැනිදා ඊශ්‍රායලයට එල්ල වූ හමාස් ප්‍රහාරයෙන් පසුව අනුලා රත්නායක මහත්මිය අතුරුදන්ව සිටියේ ය.
පසුව අනාවරණය වූයේ, යුධ ගැටුම් අතරතුර ඇය මිය ගිය බවයි.
වසර 10 ක් ඊශ්‍රාලයේ සේවය කර ඇති 49 හැවිරිදි අනුලා රත්නායක මහත්මිය, දෙදරු මවකි.
මේ අතර, අනුලා රත්නායක ජයතිලක මහත්මිය වෙඩි වැදීමකින් ජිවිතක්ෂයට පත්ව ඇති බව මීගමුව දිස්ත්‍රික් මහරෝහලේදී සිදුකරන ලද පශ්චාත් මරණ පරීක්ෂණයේදී අනාවරණය වී ඇත.
වැඩබලන මහේස්ත්‍රාත් පද්මලතා ගිනිගේ මහත්මිය ඉදිරියේ මීගමුව රෝහලේ 28 වැනිදා පැවති මහේස්ත්‍රාත් පරීක්ෂණයේදී මරණකාරියගේ ස්වාමිපුරුෂයා කැලුම් වීරසිං සහ වැඩිමල් පුතු වන හේසව වීරසිංහ යන දෙදෙනා විසින් මෘතදේහය හදුනාගෙන ඇත.
පශ්චාත් මරණ පරීක්ෂණයක් පවත්වා අධිකරණයට කරුණු වාර්තා කරන ලෙස මීගමුව රෝහලේ ප්‍රධාන අධිකරණ වෛද්‍ය වරයාට වැඩබලන මහේස්ත්‍රාත්තුමිය දෙන ලද නියෝගයට අනුව අධිකරණ වෛද්‍ය ඩබ්ලිව්. එස්. එම්. ප්‍රනාන්දු මහතා විසින් පශ්චාත් මරණ පරීක්ෂණය පවත්වා ඇත.
මෙම මරණය උස් ස්ථානයකින් ඇද වැටීමකින් හෝ යමක් ශරීරය මතට කඩාවැටීමෙන් සිදුවූ මරණයක් නොවන බවත්, මෘතදේහය තුළ තිබී මුනිස්සම් කැබලි කිහිපයක් සොයාගෙන ගත් බවත්, මෙම මරණය වෙඩි වැදීමකින් සිදුවී ඇති බවත්, මරණයට පෙර කිසිදු ශාරීරික වද හිංසාවකට ලක්වී නොමැති බවත්, සිරුර තුළ තිබී සොයාගත් මුනිස්සම් රජයේ රසපරීක්ෂක වෙත යොමුකරන බවත් අධිකරණ වෛද්‍ය වරයා විසින් ප්‍රකාශයට පත්කර තිබේ.
