ජාතික ඖෂධ නියාමන අධිකාරි පනතට පටහැනිව වැඩි මිලට ඖෂධ 11 ක් අලෙවි කිරීම සම්බන්ධයෙන් වරද පිළිගත් ආසිරි මෙඩිකල් රෝහලේ අධ්‍යක්ෂ මණ්ඩලයට එරෙහිව පවරා ඇති නඩුවට අදාළව මාර්තු 12 වැනිදා තෙක් පියවරක් නොගන්නා බව නීතිපතිවරයා අභියාචනාධිකරණයට දැනුම් දුන්නේය.

මාලිගාකන්ද මහෙස්ත්‍රාත් අධිකරණය හමුවේ අංක 52624/23 යටතේ ගොනුකර ඇති නඩුවේ විත්තිකරුවන් ලෙස අදාළ රෝහල සහ එහි අධ්‍යක්ෂ මණ්ඩල සාමාජිකයන් වන විශාල් බාලි, අශෝක පතිරගේ, අන්කූර් නාන්ද් තදානි, කරුණාමුනි මංජුල ප්‍රසන්න, සුදර්ශන් අහංගම, ගාර්දිය ලොකුගේ, හැරිස් ප්‍රේමරත්න, සිවකුමාර් සෙල්ලයියා, හරේෂ් කුමාර් කයිමාල්, අජිත් කරුණාරත්න සහ ඩී. බී. සඳතිසරු නම්කර තිබේ.

මෙම විත්තිකරුවන්ට ඉකුත් පෙබරවාරි 21 වැනිදා අධිකරණය හමුවේ නිසි පරිදි පෙනී සිටින ලෙස දන්වා මාලිගාකන්ද මහෙස්ත්‍රාත් ලෝචනී අබේවික්‍රම විසින් නොතිසි නිකුත් කර තිබිණි.

අධිකරණය හමුවේ පෙනී සිටීමට නොතිසි නිකුත් කර තිබූ ආසිරි මෙඩිකල් රෝහලේ අධ්‍යක්ෂ මණ්ඩලය තමන්ට එරෙහිව දුන් අධිකරණ නියෝග අභියෝගයකට ලක් කරමින් අභියාචනාධිකරණය හමුවේ රිට් පෙත්සමක් ගොනු කළේ ය.

මාලිගාකන්ද මහෙස්ත්‍රාත් අධිකරණය හමුවේ පෙනී සිටින ලෙස නියෝග කරමින් මහෙස්ත්‍රාත් ලෝචනී අබේවික්‍රම කළ නියෝගය ඉවත දමන්නැයි ඉල්ලා  ආසිරි මෙඩිකල් රෝහලේ අධ්‍යක්ෂ මණ්ඩලය විසින් එම රිට් පෙත්සම අභියාචනාධිකරණය හමුවේ ගෙනුකර තිබිණි.

මෙම පෙත්සමේ වගඋත්තරකරුවන් වශයෙන් ජාතික ඖෂධ නියාමන අධිකාරිය වැඩි මිලට ඖෂධ ගැනීමට සිදුවීමෙන් අගතියට පත් සනත් කුමාර අතුකෝරල මෙන්ම, මාලිගාකන්ද මහෙස්ත්‍රාත් ලෝචනී අබේවික්‍රම ද නම් කර තිබිණි. 

මහෙස්ත්‍රාත්වරිය අදාළ පෙත්සමේ 08 වැනි වගඋත්තරකාරිය ලෙස නම්කර තිබේ.

අදාළ රිට් පෙත්සමේ, පෙත්සම්කරුවන් වෙනුවෙන් ජනාධිපති නීතිඥ රොමේෂ් ද සිල්වා පෙනී සිටින අතර, අගතියට පත් පාර්ශ්වයේ සනත් කුමාර අතුකෝරල වෙනුවෙන් ශ්‍රී ලංකා නීතිඥ සංගමයේ හිටපු සභාපති, ජනාධිපති නීතිඥ සාලිය පීරිස් පෙනී සිටියි.

අභියාචනාධිකරණය හමුවේ ගොනුකර තිබෙන රිට් පෙත්සම ලබන 12 වැනිදා කැඳවීමට නියමිත අතර, මාලිගාකන්ද මහෙස්ත්‍රාත් අධිකරණය හමුවේ අදාළ රෝහල සහ අධ්‍යක්ෂ මණ්ඩලයට එරෙහිව ජාතික ඖෂධ නියාමන අධිකාරිය පවරා තිබෙන නඩුව ලබන 14 වැනිදා කැඳවීමට නියමිතය.

උපරිම සිල්ලර මිල රුපියල් 23.65 ක් වූ ඔලන්සපින් (Olanzapine 5mg – OLAN) නමැති ඖෂධ පෙත්තක් රුපියල් 101.73 ක මිලකට විකිණීම, උපරිම සිල්ලර මිල රුපියල් 7.08 ක් වූ ඇස්පිරින් (Aspirain 75mg – ECOSPRIN) නමැති ඖෂධ පෙත්තක් උපරිම සිල්ලර මිල ඉක්මවා රුපියල් 30.25 ක මිලකට විකිණීම, උපරිම සිල්ලර මිල රුපියල් 4.16 ක් වූ පැරසිටමෝල් Paracetamol 500 mg- panadol) නමැති ඖෂධ පෙත්තක් රුපියල් 19.05 කට විකිණීම ඇතුළු ඖෂධ වර්ග 11 ක් උපරිම සිල්ලර මිල ඉක්මවා විකිණීම මගින් ජාතික ඖෂධ නියාමන අධිකාරි පනත යටතේ දඬුවම් ලැබිය හැකි වරදවල් කර ඇති බව සඳහන් කරමින් චෝදනා 11 ක් යටතේ කොළඹ පිහිටි පෞද්ගලික රෝහලට එරෙහිව මාලිගාකන්ද මහෙස්ත්‍රාත් අධිකරණය හමුවේ අංක 52624/23 දරන නඩුව පවරා තිබිණි.

මූලාශ්‍රය – අරුණ