2022 ආර්ථික අර්බුදය උත්සන්න සමයේ මෙරට කොහිල පරිභෝජනය සියයට 40කින් ඉහළ නැඟ තිබු බව හෙක්ටර් කොබ්බෑකඩුව ‌ගොවි කටයුතු පුහුණු හා පර්යේෂණ ආයතනය විසින් ඊයේ (29) එළිදක්වනු ලැබූ පර්යේෂණ වාර්තාවක දැක්වේ.

2021 වර්ෂයේ සිට ම මෙරට ආරම්භ වූ ආර්ථික අර්බුදය සම්බන්ධව සිදු කළ Economic Crisis and Household food Security in Sri Lanka- 2022 පර්යේෂණ වාර්තාව මෙරට පැවැති ආර්ථික අර්බුදය නිසා රටේ ජනතාවගේ ආහාර පරිභෝජන රටාවට සිදු කළ හානිය පිළිබඳව හෙළිදරව් කර තිබේ.

2021 සැප්තැම්බර් මස සිට 2022 අවසානය දක්වා මෙරට ආහාර උද්ධමනය සියයට 95ක් දක්වා ඉහළ ගිය අතර එය නිදහසින් පසු මෙරට ඇති වූ දරුණුතම ආර්ථික අර්බුදය බව ද එම වාර්තාවේ දැක්වේ.

ආර්ථික අර්බුදය පැවැති 2021 හා 2022 කාලයේ ගෘහස්ථ එළවළු පරිභෝජනය ගත් කළ කොහිල  ව්‍යංජන සදහා  ඉල්ලුම සියයට 45ක් දක්වා ඉහළ ගොස් තිබුණ බවත් වැඩි දෙනෙක් අවටින් සපයා ගත හැකි කුමක් හෝ එළවළුවක් ආහාර සඳහා යොදා ගෙන ඇති බවත් එම වාර්තාව පෙන්වා දෙයි.

ඊට සාපේක්ෂව බෝංචි සියයට 30කින්, කැරට් සියයට 29කින්, වට්ටක්කා සියයට 27කින්, වම්බටු සියයට 27කින් , කොළ සහිත එලවළු සියයට 10කින්  වශයෙන් පරිභෝජනයට ගැනීම පහත වැටී තිබේ.

පෝෂණය අදාලව සළකා බලන විට නාගරිකව සියයට 25ක්, ග්‍රාමීය අංශයේ සියයට 03ක් හා වතු අංශයේ සියයට 07කට ප්‍රෝටීන් බහුල ආහාර නොලැබිනු බවත්, විටමින් A සහිත ආහාර පරිබෝජනය ගත් කළ නාගරිකව සියයට 66ක්, ග්‍රාමීය අංශයේ සියයට 46ක් හා වතු අංශයේ සියයට 41ක් විටමින් A සහිත ආහාර හිඟකමින් පෙළුනු බවත් එහි දැක්වේ.

සමීක්ෂණ කාලය තුළ ජනගහනයෙන් සියයට 56කට Heme Iron සහිත ආහාර කිසිවක් ලබා ගෙන නැති බවත්, එයිනුත් වතු අංශයේ සියයට 78ක් හීම් යකඩ සහිත ආහාර වන මස්, හා මාළු පරිභෝජනය නොකළ බව ද සමීක්ෂණ වාර්තාව තහවුරු කරයි.