වසර 50කට අධික කාලයක් පුරාවට ඉඩම් හිමිකරුවන්ට ඔප්පු ලබාදීම ප්‍රමාද වී ඇතැයි වාර්තා වේ.
මේ පිලිබඳ හෙළිදරව් වී ඇත්තේ සංචාරක හා ඉඩම් කටයුතු පිළිබඳ අමාත්‍යාංශයීය උපදේශක කාරක සභාව අමාත්‍ය හරීන් ප්‍රනාන්දු මහතාගේ සභාපතිත්වයෙන් පසුගිය (09) වැනිදා පාර්ලිමේන්තුවේදී රැස් වූ අවස්ථාවේදීය.
මේ සම්බන්ධයෙන් ඉඩම් ප්‍රතිසංස්කරණ කොමිෂන් සභාවේ නිලධාරීන්ගෙන් විමසූ විටදී එම නිලධාරීන් ප්‍රකාශ කර ඇත්තේ මෙම ඉඩම් විවිධ පාර්ශ්වයන්ට පවරා දී ඇති බවත් දැනට එම පැවරුම්කරුවන්ගේ දරු මුනුබුරන් විසින් විසින් එම ඉඩම් භාවිත කරන බවත්ය.
එබැවින් ලේඛණ ඉදිරිපත් කිරීමේදී ගැටලූවක් මතුව ඇති බවද එම නිලධාරීන් ප්‍රකාශ කළ අතරම මේ වනවිට එම කටයුතු විධිමත් කරමින් පවතින බවද ඔවුහු පෙන්වා දී ඇත.
කමිටු සභාපති අමාත්‍ය හරීන් ප්‍රනාන්දු මහතා පෙන්වා දී ඇත්තේ පවත්නා ක්‍රියාමාර්ගයන් වෙනුවට ක්ෂණික ක්‍රියාමාර්ග ගැනිම වැදගත් වන බවයි.
ඒ අනුව, ගැටලුව විසඳීම සඳහා නියමු ව්‍යාපෘතියක් මහනුවර දිස්ත්‍රික්කයෙන් ආරම්භ කර, ක්‍රමානුකූලව වෙනත් දිස්ත්‍රික්කවලටද ගොස් ඔප්පු නිවැරදිව ලබාදීමේ වැඩසටහන් ආරම්භ කරන ලෙස අමාත්‍යවරයා නිලධාරීන්ට උපදෙස් ලබාදී ඇත.
එසේම ඉඩම් ප්‍රතිසංස්කරණ කොමිෂන් සභාව මෙවැනි කරුණු සම්බන්ධයෙන් ඉක්මනින් සොයා බැලා කටයුතු කළ යුතු බවද අමාත්‍යවරයා වැඩිදුරටත් ප්‍රකාශ කර ඇත.
තවද, පාරම්පරිකව කළු ගල් කැණීමේ කර්මාන්තයේ නියැළෙන බලංගොඩ දමන ප්‍රදේශයේ 7000 පමණ පිරිසකට කළු ගල් කැඩීම සඳහා වාර්ෂිකව නව බලපත්‍රයක් ලබාදීම සම්බන්ධයෙන් කරන ලද ඉල්ලීම පිළිබඳවද කමිටුවේ සාකච්ඡාවට ලක් විය.
තවද, නව සංචාරක ස්ථාන හඳුනා ගැනීමින් ප්‍රවර්ධනය කිරීම සඳහා සෑම සංචාරක ප්‍රදේශයකම පාර්ලිමේන්තු මන්ත්‍රීවරුන්ගේ සහභාගීත්වයෙන් පවත්වන ලද සියලුම කමිටුවල ප්‍රගතිය සේම දෙණියාය පාරිසරික සංචාරක කලාප සංවර්ධනයේ ප්‍රගතිය පිලිබඳව වැඩිදුරටත් සාකච්ඡා විය.
මෙකි කාරක සභාව සඳහා රාජ්‍ය අමාත්‍ය ගීතා සමන්මලී කුමාරසිංහ මෙන්ම කපිල අතුකෝරල, සෙල්වම් අඩෛයිකලනාදන් ඇතුළු පාර්ලිමේන්තු මන්ත්‍රීවරු රැසක් එක්ව සිටියහ.
