තෙදින නිල සංචාරයක් සඳහා දිවයිනට පැමිණ සිටින ඉන්දීය මුදල් අමාත්‍ය නිර්මලා සීතාරාමන් මහත්මිය මල්වතු අස්ගිරි මහා නාහිමිවරු බැහැදැක ආශිර්වාද ලබාගෙන තිබේ.

දෙරට අතර ගැඹුරු සංස්කෘතික බැඳීම් හා පොදු උරුමයන් පිළිබඳව අදහස් දැක්වූ මල්වතු පාර්ශ්වයේ මහ නාහිමියන් – අතිපූජ්‍ය පූජ්‍ය. තිබ්බටුවාවේ ශ්‍රී සිද්ධාර්ථ සුමංගල හිමියෝ, ආර්ථික අර්බුදකාරී අවස්ථාවේදී ඉන්දියාව ලබා දුන් ආර්ථික සහය පිළිබඳව ස්තුතිය පුද කළහ.

අස්ගිරි පාර්ශ්වයේ මහනායක හිමි –  වරකාගොඩ ශ්‍රී ඤාණරතන මහනායක හිමියන්ව බැහැදුටු අවස්ථාවේදී සීතාරාමන් මහත්මිය විසින් මෙරට ආගමික ස්ථාන වලට සූර්ය බල විදුලිය ලබාදීම සඳහා අද දින අත්සන් තැබීමට නියමිත අවබෝධතා ගිවිසුම පිළිබඳව ද අදහස් පළ කළාය. මේ සඳහා බෞද්ධ සබඳතා ප්‍රවර්ධනය කිරීම වෙනුවෙන් ඉන්දීය රජය විසින් වෙන් කර ඇති ඉන්දීය රු. කෝටි 107.47ක   ප්‍රදානයකින් ඉන්දීය රු. කෝටි 82.4ක් ලබාදීමට නියමිතය.

අමාත්‍යවරයාට සහ ඉන්දියාවට ස්තුතිය පුද කළ අස්ගිරි මහනාහිමියන් පවසා තිබුණේ මෙම පියවර, ඔවුන්ගේ බලශක්ති අවශ්‍යතා සඳහා කාලෝචිත සහ සහයෝගය දක්වන පියවරක් බවයි.

එසේම, ඉන්දීය මුදල් අමාත්‍යවරිය අනුරාධපුර ජය ශ්‍රී මහබෝ උඩමළුවටම ගොස් වැඳපුදාගෙන ආශිර්වාද ලබාගෙන තිබේ.

තෙදින නිල සංචාරයක් සඳහා ඊයේ (01) පෙරවරුවේ ඉන්දීය මුදල් අමාත්‍ය නිර්මලා සීතාරාමන් මහත්මිය දිවයිනට පැමිණියාය.

ඇය අද (02) දින ඉන්දීය සම්භවයක් සහිත දෙමළ ජනතාව ශ්‍රී ලංකාවට පැමිණ වසර 200ක් සපිරීමේ උත්සවයේ ප්‍රධාන ආරාධිත අමුත්තා වශයෙන් සහභාගී වීමට නියමිතය.

ඊට අමතරව ඇය අද දිනයේ ඉන්දු – ලංකා වාණිජ හා කර්මාන්ත මණ්ඩලය සහ ශ්‍රී ලංකා වාණිජ මණ්ඩලය එක්ව සංවිධානය කරන ශ්‍රී ලංකා ව්‍යාපාරික සමුළුවේ ප්‍රධාන දේශනය සිදුකිරීමට ද නියමිත බව ඉන්දීය විදේශ කටයුතු අමාත්‍යාංශය සඳහන් කළේය.

ජනාධිපති රනිල් වික්‍රමසිංහ මහතා සහ අග්‍රාමාත්‍ය දිනේෂ් ගුණවර්ධන මහතා සමග ද නිර්මලා සීතාරාමන් මහත්මිය සාකච්ඡා පැවැත්වීමට නියමිතව තිබේ.

ඉන්දීය රජයේ ආධාර යටතේ මෙරට ආගමික ස්ථාන සඳහා සූර්ය කෝෂ ලබාදීමේ ව්‍යාපෘතියට අදාළ අවබෝධතා ගිවිසුම අත්සන් කිරීම ද අද දිනයේ සිදුකිරීමට නියමිත බව වාර්තා වේ.

ඊට අමතරව ඉන්දීය මුදල් අමාත්‍ය නිර්මලා සීතාරාමන් මහත්මිය සිය සංචාරය තුළ දී ත්‍රීකුණාමලය සහ යාපනයේ සංචාරයක නිරත වීමට නියමිතව තිබේ.

ඡායාරූප – ඉන්දීය මහ කොමසාරිස් කාර්යාල ට්විටර් ගිනුමෙනි