ඉන්දීය මහ කොමසාරිස් කාර්යාලය ‘ඉන්දීය රුපියල් –  ශ්‍රී ලංකා රුපියල් වෙළඳ පියවීම්: ද්විපාර්ශ්වික ආර්ථික සබඳතා ශක්තිමත් කිරීම’ යන මැයෙන් වූ විද්වත් සාකච්ඡාවක් ඊයේ (25) කොළඹ දී පැවැත්වුණි. 

ශ්‍රී ලංකා රජය, ශ්‍රී ලංකා සහ ඉන්දීය බැංකු මෙන්ම විවිධ වෙළඳ මණ්ඩල, මාධ්‍ය සහ විද්වත් සංවිධාන වැනි ආයතන නියෝජනය කරමින් ප්‍රධාන පාර්ශ්වකරුවන් රැසක් මේ සඳහා සහභාගී විය. 

ශ්‍රී ලංකාවේ ඉන්දීය මහ කොමසාරිස් සන්තෝෂ් ජා මහතා සහ ශ්‍රී ලංකා මහ බැංකු අධිපති ආචාර්ය පී. නන්දලාල් වීරසිංහ මහතා ද මෙම අවස්ථාවට එක්විය.

ඉන්දීය මහ කොමසාරිස් සන්තෝෂ් ජා මහතා පිළිගැනීමේ කතාව සිදු කරමින් අදහස් දැක්වූ අතර ඉන් අනතුරුව ඉන්දීය සංචිත බැංකුවේ ප්‍රධාන සාමාන්‍යාධිකාරී ආදිත්‍ය ගයිහා මහතා විසින් ඉන්දීය රුපියල ජාත්‍යන්තරකරණය සහ ඉන්දීය රුපියල් – ශ්‍රී ලංකා වෙළඳ පියවීම් පිළිබඳ සවිස්තරාත්මක ඉදිරිපත් කිරීමක් සිදු කරන ලදී. එතුමා අන්තර් දේශසීමා ගනුදෙනු වලදී ඉන්දීය රුපියල් සහ ශ්‍රී ලංකා රුපියල් භාවිතා කිරීම ඉහළ නැංවීම අරමුණු කරගෙන ඉන්දීය සංචිත බැංකුව විසින් මෑතක දී විදේශ විනිමය කළමනාකරණ පනතට සිදු කරන ලද සංශෝධන සම්බන්ධයෙන් ද විස්තර කළේය.

ශ්‍රී ලංකා මහ බැංකු අධිපති ආචාර්ය පී. නන්දලාල් වීරසිංහ මහතා ඉන්දීය රුපියල් –  ශ්‍රී ලංකා රුපියල් වෙළඳ පියවීම් රාමුව සම්බන්ධයෙන් වැදගත් කරුණු රැසක් ඉදිරිපත් කළේය. 

මෙම යාන්ත්‍රණයේ වැදගත්කම අවධාරණය කළ එතුමා යාන්ත්‍රණය සංවිධිතකරණයෙහිලා දෙරටෙහිම ප්‍රතිපත්ති සම්පාදකයන් සහ මහ බැංකු සමඟ නියැළෙන ලෙස බැංකු දිරිමත් කළේය.

මෙම මුලපිරීම ශ්‍රී ලංකා ජනාධිපති අනුර කුමාර දිසානායක මැතිතුමා විසින් මෑතකදී සිදු කරන ලද ඉන්දීය සංචාරය අතරතුරදී ඉහළම මට්ටමේ නායකත්වය විසින් අවධාරණය කළ කැපවීම හා සමපාත වේ. 

එම සංචාරය අතරතුරදී ජනාධිපති අනුර කුමාර දිසානායක මහතා අග්‍රාමාත්‍ය නරේන්ද්‍ර මෝදි මැතිතුමා හමු වූ අතර නායකයන් දෙපළ අතර පැවති සාකච්ඡාවන් හිදි දෙරට අතර වෙළඳ සහ ආයෝජන සබඳතා ගැඹුරු කිරීම සඳහා ඉන්දීය රුපියල් –  ශ්‍රී ලංකා රුපියල් වෙළඳ පියවීම් ඉහළ නැංවීම සම්බන්ධයෙන් ඉහළ අවධානයක් යොමු විය.