Connect with us

පුවත්

ඉන්ධන ප්‍රමාද ගාස්තු ඩොලර් ‌කෝටි 17ක් ගෙවලා

Published

on

ප්‍රසම්පාදන ක්‍රියාවලියෙන් බැහැරව හා හදිසි මිලදී ගැනීම් යටතේ 2021-2022 වසරවල් දෙකේ මෙරටට ගෙනා ඉන්ධන නෞකා වෙත ප්‍රමාද ගාස්තු ලෙස ඇමෙරිකානු ඩොලර් දාහත් කෝටි අට ලක්‍ෂ හැත්තෑතුන් දහස් අටසීය දහසයක (170,873,816) මුදලක් ගෙවා දැමීමට තෙල් සංස්ථාවට සිදුව ඇතැයි රජයේ විගණනයේදී තහවුරු වී තිබේ.

ඒ අනුව 2021 වසරේදී කොළඹ වරායට පැමිණි ඉන්ධන නෞකාවලින් තෙල් ගොඩබෑම ප්‍රමාදවීම නිසා ඩෙමරේජ් ලෙස ඇමෙරිකානු ඩොලර් දහසය ලක්‍ෂ පනස් එක්දහස් හාරසීය හැත්තෑවක මුදලක් (1,651,470) අදාළ සමාගම් වෙත ගෙවා ඇත.

2022 වසරේදී ප්‍රමාද ගාස්තු ලෙස ඇමෙරිකානු ඩොලර් දහසය කෝටි අනූදෙලක්‍ෂ විසි දෙදහස් තුන්සිය හතළිස් හයක් (169,222,346) ගෙවා ඇතැයි රජයේ විගණකාධිපති සිදුකළ විගණනයේදී තහවුරු වී තිබේ. ගාස්තු 2021 ට සාපේක්‍ෂව 2022 වසරේ ප්‍රමාද ගෙවීම් ඉහළ යෑමේ ප්‍රතිශතය සියයට නවසීය විසිහතරකි.

ප්‍රසම්පාදන හෝ හදිසි මිලදී ගැනීම් යටතේ ඉන්ධන නෞකා මෙරටට ගෙන ඒමේදී දින හතරක් පහක් යනතුරු ඒවා ගොඩබාගත නොහැකිවීම නිසා එම දින හතර පහට ප්‍රමාද ගාස්තු ගෙවීම ගැටලුවක් නොවූවත් 2021-2022 වසරවලදී ගබඩාවල තෙල් තොග ගබඩා කර තිබියදී හා සපුගස්කන්ද තෙල් පිරිපහදුව වසා තිබියදී පවා අනවශ්‍ය ලෙස පිරිපහදු හා බොරතෙල් ඇනවුම් කිරීම නිසා මේසා විශාල මුදලක් ප්‍රමාද ගාස්තු ලෙස සමාගම් වෙත ගෙවීමට සිදුව තිබේ.

ඒ අනුව කොළඹ වරායට සේන්දු වූ ඇතැම් ඉන්ධන නෞකා දින 55, 61 ආදී ලෙස නිකරුණේ නැංගුරම් ලා තිබීම නිසා මෙලෙස ප්‍රමාද ගාස්තු ගෙවා ඇත.

නෞකාවලට ප්‍රමාද ගාස්තු ලෙස මේසා විශාල ඩොලර් ප්‍රමාණයක් ගෙවා දැමීමට අමතරව ප්‍රීමියම් (රක්‍ෂණ හා වරාය ගාස්තු) ලෙස තවත් විශාල මුදලක් ගෙවා ඇත.

මේ අතර ඉකුත්දා පැවති කෝප් (පාර්ලිමේන්තු පොදු ව්‍යාපාර පිළිබඳ කාරක සභාව) කමිටුවේදී හෙළි වූයේ බොර තෙල් මෙරටට සැපයීමට ගිවිසුම් ගතවූ සමාගම් බොරතෙල් ලබානොදීම නිසා අයකරගත යුතු ඇමෙරිකානු ඩොලර් මිලියන 21ක මුදලක් අයකරගෙන නැති බවයි.

මේ සියලු ගෙවීම් අවසානයේදී ඉන්ධන මිලට එක්කාසු කොට පාරිභෝගිකයා වෙත පැටවීමට සංස්ථාවට සිදුවූ බව එහි උසස් නිලධාරියෙක් කියා සිටියේය.

රජයේ විගණකාධිපතිවරයාගේ විගණන වාර්තාව ඉදිරි සති කිහිපය තුළ කෝප් කමිටුව වෙත ලබාදීමට නියමිතය.

(දිවයින)

පුවත්

රනිල් යද්දී චන්ද්‍රිකාත් බාලි ;  අමරවීර, දුමින්ද, ලසන්ත, අනුර හා ලන්සයිත් ඉඳලා

Published

on

By

පසුගිය සතියේ ජනාධිපති රනිල් වික්‍රමසිංහ මහතා බාලි දූපතේ සංචාරයක යෙදී සිටින අතර චන්ද්‍රිකා කුමාරතුංග මහත්මිය ද එහි ගොස් සිට ඇති බව වාර්තා වේ.

මෙම සංචාරයේදී රනිල් වික්‍රමසිංහ මහතා සමඟ මහින්ද අමරවීර, දුමින්ද දිසානායක, ලසන්ත අලගියවන්න සහ අනුර යාපා යන ශ්‍රී ලංකා නිදහස් පක්ෂයේ කණ්ඩායමක් ද රැගෙන ගොස් සිටි බව වාර්තා වේ. 

එම සිව්දෙනා බණ්ඩාරනායකවාදීන් ලෙස මෑතක් වනතුරු ම කැපී පෙනුණු අතර ඔවුන්ට අමතරව නිමල් ලන්සා මහතා ද රනිල් වික්‍රමසිංහ මහතා සමඟ සංචාරයට එක්වී ඇති බව මේ වනවිට හෙළිවී තිබේ.

රනිල් වික්‍රමසිංහ ඇතුළු පිරිස මෙන් ම, චන්ද්‍රිකා කුමාරතුංග අතර කිනම් මට්ටමක සාකච්ඡා පැවැත්වූයේ දැයි මේ දක්වා හෙළිවී නැත. 

කෙසේවුවද,, ජනාධිපති රනිල් වික්‍රමසිංහ මහතා ලෝක ජල දිනයට සහභාගී වන බව පවසා ඉන්දුනීසියාව බලා යාම පිළිබඳව මුල සිටම දේශපාලන නිරීක්ෂකයන්ගේ දැඩි අවධානය යොමු වී තිබුණ බව ලංකා ටෲත් වාර්තා කර ඇත.

මූලාශ්‍රය – ලංකා ටෲත් 

Continue Reading

පුවත්

ණය ‍ගෙවීම ගැන පැරිස් සමාජය සහ චීනයේ එක්සිම් බැංකුව හා අවබෝධතා ගිවිසුමක

Published

on

By

ජාත්‍යන්තර මූල්‍ය අරමුදලේ විධායක සභා රැස්වීම අවසන් වීමට පෙර රටේ ණය ප්‍රතිව්‍යුහගත කිරීම සඳහා පැරිස් සමාජය සහ චීනයේ ආනයන – අපනයන බැංකුව (එක්සිම් – EXIM) සමඟ අවබෝධතා ගිවිසුම් අත්සන් කිරීමට උත්සහ දරමින් සිටින බව මුදල් රාජ්‍ය ඇමැති ශෙහාන් සේමසිංහ මහතා කියයි.

ඒ මහතා දිනමිණ පුවත්පතට පවසා ඇත්තේ ණය ප්‍රතිව්‍යුහගතකරණය සම්බන්ධයෙන් එකඟතාවට පැමිණි පසුව මෙලෙස අවබෝධතා ගිවිසුමට අත්සන් කරන බවයි.

අධ්‍යක්ෂ මණ්ඩලය විසින් ශ්‍රී ලංකාවේ විස්තීරණ අරමුදල් පහසුකම් විධිවිධාන පිළිබඳ කඩිනමින් සමාලෝචනය කරනු ඇති අතර එම සමාලෝචනයට පෙර ශ්‍රී ලංකාව අවබෝධතා ගිවිසුම අත්සන් කිරීමට බලාපොරොත්තු වන බව ද ඒ මහතා පෙන්වා දී ඇත.

අන්තර්ජාතික මූල්‍ය අරමුදලේ අධ්‍යක්ෂ මණ්ඩලය විසින් අනුමත කරන මෙම සමාලෝචනය මඟින් ශ්‍රී ලංකාවට ඩොලර් මිලියන 330ක අරමුදල් නිකුත් කරනු ඇති බව සඳහන් කර ඇති ඇමැතිවරයා ඒ අනුව එම ණය වාරිකය ජාත්‍යන්තර මූල්‍ය අරමුදල මඟින් ශ්‍රී ලංකාවට ලබාදෙන විස්තීරණ ණය වැඩසටහනේ තෙවැනි වාරිකය බව ද කියා තිබේ.

ද්විපාර්ශ්වික ණයහිමියන් සමඟ ප්‍රතිව්‍යුහගත කිරීමේ ක්‍රියාවලිය ඉතා ඉක්මනින් අවසන් වනු ඇති බවට ද හෙතෙම විශ්වාසය පළ කර ඇත.

මේ අතර, 2022 සැප්තැම්බර් මාසයේ ශ්‍රී ලංකා මුදල් අමාත්‍යංශය කළ ගණනය කිරීම්වලට අනුව, ශ්‍රී ලංකාව, චීනය වෙත ගෙවිය යුතු ණය ප්‍රමාණය ඇමෙරිකානු ඩොලර් බිලියන 07 ඉක්මවා ඇති බවද පැවසේ.

එය ශ්‍රී ලංකාව මේ මොහොතේ ප්‍රතිව්‍යුහගතකරණය කරවාගත යුතු ණය ප්‍රමාණයෙන් 52%ක තරම් විශාල අගයකි.

චීනය මේ වන විට එකඟත්වය පළකර ඇත්තේ, සිය සමස්ත ණය ප්‍රමාණයෙන්, චීන එක්සිම් බැංකුව විසින් ලබාදී ඇති ඩොලර් බිලියන 02ක ණය සඳහා පමණක්, 2023 සහ 2024 යන වසර 02 වෙනුවෙන් ණය නොගෙවා සිටීමේ සහනයක් ලබාදීමට පමණක් බවද මුදල් අමාත්‍යංශ අභ්‍යන්තර ආරංචි මාර්ගවලින් වාර්තා වේ.

ඉන්දියාව හෝ ජපානය මේ වනතුරු සිය මූල්‍ය සහනයේ පරිමාව ප්‍රකාශයට පත්කර නැති නමුත්, පැරිස් සමාජය විසින් යෝජනා කර ඇති ‘වසර 10ක ණය නොගෙවා සිටීමේ සහනය සහ වසර 15ක ආපසු ගෙවීමේ සහන කාලය’ යන ක්‍රියාමාර්ගය ආසන්නයට ඒමට, එම ප්‍රධාන ණයහිමි පාර්ශව දෙකම කැමැත්තෙන් සිටින බවට ඉඟි පළවී ඇතැයි ද පැවසේ.

Continue Reading

පුවත්

ණය නොගෙවා බ්ලැක් ලිස්ට් වූ ව්‍යාපාරිකයන්ට තව ණයක් ගන්න අවස්ථාවක්

Published

on

By

ආර්ථික අර්බුදය හේතුවෙන් බැංකු ණය ආපසු ගෙවා ගැනීමට නොහැකිව සහ ණය තොරතුරු කාර්යාංශයේ අසාධු ලේඛනගතව සිටින ක්ෂුද්‍ර, සුළු හා මධ්‍ය පරිමාණ ව්‍යවසායකයන්ට හා කර්මාන්තකරුවන්ට යළි නඟා සිටුවීමට රුපියල් කෝටි 500ක ණය සහන පැකේජයක් ලබා දීමට ආණ්ඩුව තීරණය කර ඇතැයි වාර්තා වේ.

ඒ අනුව බැංකු හා මූල්‍ය ආයතනවලට රුපියල් ලක්ෂ පනහට නොවැඩි මුදලක් ගෙවිය යුතු ව්‍යවසායකයන් සහ කර්මාන්තකරුවන් දහසක් තෝරාගෙන ඔවුන්ට රුපියල් මිලියන පහ බැගින් ණය සහන ලබා දීමට ආණ්ඩුව කටයුතු කිරීමට නියමිත බව පැවසේ.

මෙම ණය මුදල ආපසු ගෙවීම සඳහා වසර දෙකක සහන කාලයක් සහ ඉතා අඩු පොලී අනුපාතයක් යටතේ එය ආපසු ගෙවීමට හැකිවන ලෙස සහන සලසා දී ඇතැයි ද වාර්තා වේ.

මුදල් ඇමැතිවරයාද වන ජනාධිපති රනිල් වික්‍රමසිංහ මහතා මේ වසර සඳහා වූ අය වැය යෝජනා ඉදිරිපත් කරමින් බිඳ වැටුණු ව්‍යාපාර යළි නැංවීමට රුපියල් කෝටි 2000ක මුදලක් වෙන් කර තිබේ.

එම මුදලින් මුල් අදියර සඳහා මෙලෙස රුපියල් කෝටි පන්සීයක් යොදා ගනිමින් මෙම කාරක ප්‍රාග්ධන ණය සහන පැකේජය මුදල් අමාත්‍යාංශය, කර්මාන්ත අමාත්‍යාංශය එකට එක්ව ක්‍රියාත්මක කරනු ඇත.

ඒ සඳහා රට පුරා විසිරී සිටින දැනට යම් තරමකින් ව්‍යාපාර පවත්වාගෙන යනු ලබන ව්‍යවසායකයින් සහ කර්මාන්තකරුවන් තෝරා ගැනීමේ මූලික කටයුත්ත ආරම්භ කොට ඇති අතර කර්මාන්ත අමාත්‍යාංශයේ අධ්‍යක්ෂ (ආංශික සංවර්ධන අංශය) වෙත තොරතුරු ලබාදීමට පියවර ගන්නා ලෙස ව්‍යවසායකයින් දැනුම්වත් කොට ඇතැයි Ceylon Federation Of MSME උප සභාපතිනී සශිකා ද සිල්වා මහත්මිය මාධ්‍යට පවසා ඇත.

මෙලෙස ණය සහන පැකේජයක් ලබා ගනිමින් බිඳ වැටුණු ව්‍යාපාර නැංවිමට අවශ්‍ය වැඩකටයුතු සංවිධානය සහ සැලසුම් කිරීමේදී ඒ සඳහා කර්මාන්ත ඇමැති වෛද්‍ය රමේෂ් පතිරණ, අධිකරණ ඇමැති ආචාර්ය විජයදාස රාජපක්ෂ, මුදල් රාජ්‍ය ඇමැතිවරුන් වන ආචාර්ය රංජිත් සියඹලාපිටිය, ශෙහාන් සේමසිංහ යන මහත්වරු සහ මුදල් අමාත්‍යාංශයේ ලේකම්වරයා ප්‍රධාන නිලධාරීන් සහ කර්මාන්ත සංවර්ධන මණ්ඩලයේ සභාපති වෛද්‍ය සාරංග අලහප්පෙරුම තම සම්මේලනය ඇතුළු සියලු ආයතනික රාමුව සමඟ එක්ව කටයුතු කරන බව සිල්වා මහත්මිය සඳහන් කර තිබේ.

මෙම ණය සහනය ලබා ගැනීම සඳහා සුදුස්සන් ඉල්ලුම්පත් කැඳවා ස්වාධීන විද්වත් කමිටුවක් මඟින් තෝරා ගන්නා අතර වඩාත් විනිවිදභාවයෙන් යුතුව සුදුස්සන්ටම මෙම පහසුකම පිරිනැමීමට ක්‍රියාකරන බව ද ඇය පවසා ඇත.

මූලාශ්‍රය – දිනමිණ

Continue Reading
Advertisement

Trending

Copyright © 2023 Sri Lanka Mirror. All Rights Reserved