රෝහල්වල හා සෞඛ්‍ය අමාත්‍යාංශයට අයත් ආයතනයන්හි මේ වන විට රුපියල් බිලියන තුනක විදුලි බිලක් එකතු වී ඇතැයිද එය නොගෙවුවහොත් එම ආයතනවල විදුලිය විසන්ධි කිරීමට සිදුවනු ඇතැයි ලංකා විදුලිබල මණ්ඩලය සෞඛ්‍ය අමාත්‍යාංශයට දන්වා ඇත.
සෞඛ්‍ය අමාත්‍යාංශයට අයත් රෝහල් හා ආයතන හාරසීයකට අධික සංඛ්‍යාවක් දිවයින පුරා විසිරී තිබේ.
හිඟ විදුලිබිල ගෙවා අවසන් කිරීමට විදුලිබල හා බලශක්ති අමාත්‍ය කංචන විජේසේකරට දන්වා සහන කාලයක් ලබාගෙන ඇත.
මේ සම්බබන්ධයෙන් කළ විමසීමේ දී සෞඛ්‍ය අමාත්‍යාංශ ලේකම් ජනක ශ්‍රී චන්ද්‍රගුප්ත මහතාද මේ බව තහවුරු කළේය.
ඖෂධ මිලදී ගැනීම සඳහා මසකට රුපියල් බිලයන 13.5ක් අවශ්‍ය බවත් ඉදිරි මාස හයක කාලය සඳහා රුපියල් බිලයන හැට හතක් සෞඛ්‍ය අමාත්‍යාංශය විසින් මුදල් අමාත්‍යාංශයෙන් ඉල්ලා ඇතැයි ජනාධිපති ලේකම් කාර්යාලයේ දී පැවැති සාකච්ඡාවකදී අනාවරණය විය.
කෙසේවුවද මුදල් අමාත්‍යාංශ ලේකම් මහින්ද සිරිවර්ධන මෙහිදී පවසා ඇත්තේ සෞඛ්‍ය අමාත්‍යාංශයට ප්‍රමාණවත් මුදල් මුදා හැර තිබුණත් ඒවායින් කුමක් කරනවාදැයි ගැටලුවක් මතුව ඇති බවයි.
එමෙන්ම ඖෂධ හා වෛද්‍ය උපකරණ මිලදී ගැනීමේ දී ප්‍රසම්පාදන කටයුතුවල ද ගැටලුවක් ඇතැයි මෙම සාකච්ඡාවේ දී අනාවරණය වී තිබිණි.
එමෙන්ම පසුගිය කාලයේදී සෞඛ්‍ය අමාත්‍යාංශයෙන් මිලදී ගත් ඖෂධ හා වෛද්‍ය උපකරණ වෙනුවෙන් අදාළ ආයතනයන්හි හිඟ බිල්පත් වෙනුවෙන් රුපියල් බිලයන තිහක් ගෙවීමට ඇති අතර එම මුදල නොගෙව්වහොත් ඖෂධ සැපයීමට බාධා විය හැකි බවට සෞඛ්‍ය අමාත්‍යාංශයට එම ආයතන විසින් අනතුරු අඟවා තිබේ.
මෙම සාකච්ඡාව සෞඛ්‍ය අමාත්‍ය කෙහෙලිය රඹුක්වැල්ල, ජනාධිපති ලේකම් සමන් ඒකනායක, ජනාධිපති උපදේශක සාගල රත්නායක ඇතුළු සෞඛ්‍ය හා මුදල් අමාත්‍යාංශ නිලධාරින්ගේ සහභාගීත්වයෙන් ජනාධිපති ලේකම් කාර්යාලයේ දී පෙරේදා (07 වැනිදා) පැවැත්විණි.
එමෙන්ම රෝහල්හි අබලන්ව ඇති වෛද්‍ය උපකරණ අලුත්වැඩියා කිරීම සඳහා සෞඛ්‍ය අමාත්‍යාංශය විසින් රුපියල් බිලියන හතරක් මුදල් අමාත්‍යාංශයෙන් ඉල්ලා තිබේ. සෞඛ්‍ය අමාත්‍ය කෙහෙළිය රඹුක්වැල්ල, මුදල් අමාත්‍යාංශය හා ආර්ථික කටයුතු පිළිබඳ ජනාධිපති උපදේශක එස්.එච්.ආර්. සමරතුංග සමග මේ සම්බන්ධයෙන් සාකච්ඡා කර ඇත.
සෞඛ්‍ය අමාත්‍යාංශයේ කිසියම් හෝ නොසැලකිල්ලකින් කවර හෝ රෝගියෙකුට යම් පීඩාවක් සිදු වන්නේ නම් ඒ පිළිබඳව නිදහසට කරුණු ප්‍රකාශ කිරීමෙන් වළකින ලෙස ජනාධිපති කාර්ය මණ්ඩල ප්‍රධානී සාගල රත්නායක මෙහිදී අවධාරණය කර ඇත.
මූලාශ්‍රය – අරුණ
