පෙම්වතියගේ ගෙල කපා මරා දැමුවේ ඇය තමා අතහැර යනු ඇති බවට පැවති බිය නිසා යැයි කොළඹ තුරඟ තරග පිටියේදී සිය පෙම්වතියගේ ගෙල කපා මරා දැමූ පෙම්වතා විසින් පොලිස් ප්‍රශ්න කිරීමේදී ඊයේ (17) පවසා තිබේ.

පෙම්වතා විසින් මෙසේ ගෙල කපා මරා දමා ඇත්තේ කොළඹ සරසවියේ විද්‍යා පීඨයේ තෙවැනි වසරේ අධ්‍යාපනය ලැබූ සිසුවියකගේය.

හෝමාගම කිරිවත්තුඩුව පුබුදු උයනේ පදිංචි චතුරි හංසිකා මල්ලිකාරච්චි (24) නමැති මේ සිසුවිය මෙසේ සිය පෙම්වතාගේ පිහිපහරකින් ඝාතනය වූයේ ඊයේ (17) සවස 1.00ට පමණය.

ඝාතනය වූ සිසුවියගේ මවුපියන් ශ්‍රී ලංකා යුද්ධ හමුදාවේ සේවය කර විශ්‍රාම ලබා සිටින්නන්ය.

කිරිවත්තුඩුව අඹගස් හන්දියේ ඔසුසලක් ඔවුන් මේ විට පවත්වාගෙන යයි.

ඝාතනයට ලක් වූ චතුරි හංසිකා එම පවුලේ වැඩිමල් දරුවා වන අතර ඇයට තවත් නැඟණියක් සිටින බවත් ඇය තවමත් පාසල් යන ශිෂ්‍යයාවක් බවත් ප්‍රදේශවාසීහු පවසති.

නුගේගොඩ අනුලා විද්‍යාලයෙන් අධ්‍යාපනය ලැබූ චතුරි හංසිකා කොළඹ විශ්වවිද්‍යාලයේ විද්‍යා පීඨයට තේරී පත්ව ඇත්තේ උසස් පෙළ ඉහළින්ම සමත්වය.

ඝාතනය වූ මේ සිසුවිය යූටියුබ් නාලිකාවක්ද පවත්වාගෙන යන බවත් එය අධ්‍යාපන නාළිකාවක් බවත් ඇගේ සරසවි මිතුරෝ සඳහන් කරති.

ඇගේ ගෙල කපා මරා දැමූ පෙම්වතාද කොළඹ සරසවියේ ඇය සමඟ තෙවැනි වසරේම අධ්‍යාපනය ලබන සිසුවෙකි. වැල්ලම්පිටිය චිත්තම්පහුවේ පදිංචිකරුවකු වන ඔහු පසිඳු චතුරංග නමැති අයෙකි.

වැල්ලම්පිටිය, කොළොන්නාව, කොටිකාවත්ත, කිරිබත්ගොඩ ආදි ප්‍රදේශවල 9,10,11 ශ්‍රේණි සඳහා උපකාරක පන්ති පවත්වමින් මේ සිසුවා නමක්ද දිනාගෙන සිටින්නකු බව පොලිසිය කියයි.

“මට එයාව ඕනේ. එයා නැතිව බැහැ. මම එයාට අවංකවම හදවතින්මයි ආදරේ කළේ. එයා වෙන කෙනෙක් ගාවට යන්න හැදුවා“ මේ සිසුවාව අත්අඩංගුවට ගැනීමෙන් අනතුරුව ඔහු පොලිස් නිලධාරීන් හමුවේ මෙවැනි දෑ පවසමින් හඬා ඇතැයිද පොලිස් තොරතුරු සඳහන් කළේය.

මේ සිසුවා විසින් සිය පෙම්වතිය වෙනත් තරුණයකු සමඟ පෙම් සම්බන්ධයක් ඇති කර ගනීවි යැයි බියකින් සිට ඇති බවත් ඒ හේතුව නිසා ඇයට දැඩි තහංචි දමා තිබී ඇති බවත් විමර්ශනවලින් පෙනී ගොස් ඇත. ඇයට වෙනත් සිසුන් සහ පිරිමින් සමඟ කථා කිරීමටද ඔහු තහනම් කර තිබී ඇත.

“එයා මම කියපු දේවල් ඇහුවේ නැහැ. ඒ නිසා මට වෙන කරන්න දෙයක් තිබ්බේ නැහැ“ යැයිද සැකකාර සිසුවා පොලිස් ප්‍රශ්න කිරීමේදී පවසා තිබේ.

සිසුවියගේ ගෙල කැපූ පිහිය ඔහු විසින් වෙළෙඳසලකින් මිලදී ගෙන කල්තියාම ඇයව මරා දැමීමට සැලසුම් කරගෙන ඇති බවද විමර්ශනවලින් පෙනී ගොස් ඇත.

එම පිහිය ඔහු සිය බෑගයේ දමාගෙන ඊයේ (17) ඇය සමඟ තුරඟ තරග පිටියට දහවල් 12.30ට පමණ පැමිණ ඇත.

ඇය සමඟ කථාබහ කරමින් සිට ඇත.

එහිදීද සිසුවා විසින් සිය පෙම්වතියට නීති දමා සිර කිරීමට උත්සාහ දරා ඇති බවත් ඇය එම නීති පිළි ගැනීමටත් ඔහු සමඟ තවදුරටත් මෙසේ ඇසුරු කිරීමට නොහැකි බව පැවසීමත් සමඟ කලබල වී ඇගේ ගෙල කපා ඝාතනය කර ඇති බව විමර්ශනවලින් පෙනී ගොස් තිබේ.

තුරඟ තරග ක්‍රීඩාංගණයේ ලකුණු පුවරුව අසල පඩිපෙළේ අසුන්ගෙන සිටියදී සවස 1.00ට පමණ මේ ඝාතනය සිදුව ඇති බව පොලිසිය කියයි.

සිය පෙම්වතියව ඝාතනය කිරීමෙන් පසු ඔහු සිය ගමන්මල්ලෙහි ලේ තැවුරුණු පිහිය දමාගෙන දෑතේ ගෑවුණු ලේ බෑගයේ පිහිදමින් තුරඟ තරග පිටියේ සිට කොළඹ සරසවිය දෙසට දිවගොස් ඇති බව පොලිස් විමර්ශනවලින් අනාවරණය වී තිබේ.

එම සැකකාර සිසුවා විශ්වවිද්‍යාල දෙසට දිව යන අයුරු ආරක්ෂක කැමරා කිහිපයකම සටහන් වී තිබී ඇත.

විශ්වවිද්‍යාලයට ගිය මේ සිසුවා පසුව එහි සිට වැල්ලම්පිටියේ පිහිටි නිවෙසට ගොස් සිය ජංගම දුරකතනය හා හැඳුනුම්පත නිවෙසේ තබා පිටව ගොස් ඇති බවද පොලිසිය කියයි.

එසේ ඔහු නිවෙසින් පිටව ගියේ කැලණි ගඟට පැන සියදිවි හානිකර ගැනීමේ සූදානමකින්දැයි සැකයක්ද පොලිස් විමර්ශනවලින් මතු වී තිබිණි.

නමුත් ඔහු නැවත නිවෙසට පැමිණ සිටියදී ආරක්ෂක කැමරා දර්ශනවලින් මේ සිසුවාගේ අනන්‍යතාව හඳුනාගත් පොලිස් කණ්ඩායමක් වැල්ලම්පිටියේ නිවෙසට පැමිණ තිබේ.

එම පොලිස් කණ්ඩායම වැල්ලම්පිටියේ නිවෙසට පැමිණෙන විට සැකකාර සිසුවා සාමාන්‍ය ලෙස එහි රැඳී සිටි ඇත.

පොලිස් නිලධාරීන් විසින් ඔහුව අත්අඩංගුවට ගෙන ඔහුගේ ගමන්මල්ල පරීක්ෂා කර තිබේ.

එහි තිබී සිසුවියගේ ගෙල කපා ඝාතනය කිරීමට යොදාගත් ලේ තැවුරුණු පිහියද පොලිසිය විසින් සොයාගෙන ඇත.

සිසුවියගේ ගෙල කැපීමෙන් පසු විසිරුණු ලේ බෑගයේද වැදී තිබෙනු ඇතැයි පොලිසිය කියයි.

මූලාශ්‍රය – දිනමිණ