සිසුන් 17දෙනකු සාමාන්‍ය පෙළට ඉදිරිපත් වී ඔවුන් සියලු දෙනාම විභාගය අසමත් පාසලක් කුරුණෑගල අධ්‍යාපන කලාපයේ ඇති බව වයඹ පළාත් ආණ්ඩුකාර ලක්ෂ්මන් යාපා අබේවර්ධන මහතා කියයි.

එමෙන්ම එම අධ්‍යාපන කලාපයේම සිසුන් සිවුදෙනකු විභාගයට ඉදිරිපත් වී ඔවුන් සියලු දෙනාම අසමත් වූ පාසලක් ද ඇතැයි ඔහු කියා සිටී.

කෙසේවුවද, අදාළ පාසල්වල නම් හෙළිකිරීම ඔහු ප්‍රතික්ෂේප කර තිබේ.

ආණ්ඩුකාරවරයා මේ බව ප්‍රකාශ කළේ කුරුණෑගල මලිය⁣දේව බාලිකා විදුහලේ පසුගියදා පැවති කුරුණෑගල අධ්‍යාපන කලාපයේ විදුහල්පති ප්‍රගති සමාලෝචන රැස්වීමට සහභාගි වෙමින්ය.

පහසුකම් සහිත කුරුණෑගල අධ්‍යාපන කලාපයේ පාසල් කීපයකම සිසුන් මෙලෙස විභාග අසමත් වී ඇති පසුබිමක මහව අධ්‍යාපන කලාපයේ වන අලි ගැවසෙන දුෂ්කර ප්‍රදේශයක පාසලක් වයඹ පළාතේ හොඳම ශිෂ්‍යත්ව ප්‍රතිඵල ලබාගෙන ඇති බවද හෙතෙම කීවේය.

ඔහු වැඩිදුරටත් එහිදී මෙසේද කීය.

“මේක වෙන්න බැරි දෙයක්. සිසුන් හැමදෙනාම අසමත් වෙන්නෙ කොහොමද? අනික කුරුණෑගල කලාපයේ පාසල්. මෙහෙම වුණා කියලා පාසල් වහල දාන්න දෙන්න බැහැ. විදුහල්පතිවරයා තමයි මේ සඳහා නායකත්වය දෙන්න ඕනෑ. මම ආණ්ඩුකාරවරයා ලෙස වයඹ වැඩ භාර ගනිද්දි සාමාන්‍ය පෙළ ලංකාවේ 8 වැනි තැනට තිබුණේ. නමුත් මේ වන විට වයඹ 4වන තැනට ඇවිත් තිබෙනවා.පාලකයෙක් දුර්වල උනොත් රටකට වගේම පාසලකටත් විනාශයක් සිදු වෙනවා. සහතික තිබුණාටම විදුහලක් කරන්න බෑ. කණ්ඩායම් හැඟීම, ඍජු තීරණ ගැනීම කියන මේ සියලුම අංශවලින් විදුහල්පතිවරයකු සන්නද්ධ වෙන්න ඕන.”

කුරුණෑගල පාසලක හතරෙ ළමයි නිල් චිත්‍රපට බලලා

මේ අතර කුරුණෑගල ප්‍රදේශයේ පාසලක 04 වැනි ශ්‍රේණියේ සිසුන් පිරිසක් ජංගම දුරකථන මඟින් නිල් චිත්‍රපට නරඹන බව පන්ති භාර ගුරුවරිය දැනගෙන ඒ බව දෙමාපියන්ට දන්වා ඇතත් ඔවුන් ගුරුවරියගේ ප්‍රකාශයන් ප්‍රතික්ෂේප කිරීමේ සිද්ධියක් ද වාර්තා වී තිබේ.

මෙම පාසලේ 04 ශ්‍රේණියේ ඉගෙනුම ලබන සිසුවකුට නිල් චිත්‍රපට නාළිකාවක අන්තර්ජාල ලිපිනය හමුව ඇතැයි පැවසේ.

පසුව ඔහු නිවසේදී මාර්ගගත ක්‍රමය ඔස්සේ ජංගම දුරකථනය හරහා අධ්‍යාපන කටයුතුවල නිරත වන අවස්ථාවේදී පෙර කී අන්තර්ජාල ලිපිනය භාවිත කර ⁣නිවැසියන්ට හොරෙන් ඒවා නැරඹීමට පුරුදුව ඇත.

ඉන් ප්‍රමෝදයට පත් ඔහු ඒ පිළිබඳව පාසලේ මිතුරන් පිරිසකට දන්වා තිබූ අතර පසුව ඔවුන්ද නිවෙස් වලදී ජංගම දුරකථන ඔස්සේ නිල් චිත්‍රපට බලා ඇතැයි සඳහන්ය.

කෙසේවෙතත් මෙම සිසුන් මෙලෙස නිල් චිත්‍රපට බලන බව‌ට පන්ති භාර ගුරුවරිය විසින් දෙමාපියන් දැනුවත් කළද ඔවුන් විසින් එය ප්‍රතික්ෂේප කර ඇත.