ශ්‍රේෂ්ඨාධිකරණය විසින් නියෝග කළ සංශෝධන සහ මාර්ගෝපදේශ” මාර්ගගත ක්‍රමවල සුරක්ෂිතභාව පිළිබඳ පනත් කෙටුම්පතට ඇතුළත්ව ඇත්දැයි තහවුරු කරගන්නා තෙක් ඊට අත්සන් නොතබන ලෙස සිවිල් සංවිධාන හා මාධ්‍ය සංවිධාන රැසක එකතුවක් කථානායක – මහින්ද යාපා අබේවර්ධන මහතාගෙන් ඉල්ලා තිබේ.

කථානායකවරයාට ලිපියක් යොමු කරමින් ඔවුන් පවසා ඇත්තේ ‘අදහස් ප්‍රකාශ කිරීමේ අයිතිය මුළුමනින්ම අනතුරට ලක්කෙරෙන මාර්ගගත ක්‍රමවල සුරක්ෂිතභාව පිළිබඳ පනත් කෙටුම්පත සහමුලින්ම ප්‍රතික්ෂේප කළ යුතු බව’ සිය මතය වන බවයි.

එම ලිපියේ මෙලෙසද දැක්වේ : 

පනත් කෙටුම්පත පාර්ලිමේන්තුවේ විවාදයට ගෙන එය අනුමත කරනු ලැබුවේ ශ්‍රේෂ්ඨාධිකරණය විසින් ඉදිරිපත් කළ ඇතැම් සංශෝධන පවා එයට නිසි ලෙස අන්තර්ගත කිරීමකින් තොරව බව විපක්ෂයේ මංත්‍රීවරු මේ වනවිට පැහැදිලිව පෙන්වා දී තිබේ. පනත් කෙටුම්පතට එරෙහිව ඉදිරිපත් වූ වාර්තාගත පෙත්සම්  52 ක් විභාගයට ගැනීමෙන් පසු ශ්‍රේෂ්ඨාධිකරණය විසින් මෙම නියෝග සහ සංශෝධන (නිකුත්) යෝජනා කරන ලදී.

පනත සම්මත කරගැනීමේ දී එවැන්නක් සිදු වී ඇත්නම්, එය පැහැදිලිවම ආණ්ඩුක්‍රම ව්‍යවස්ථාව උල්ලංඝනය කිරීමක් සහ ජනතාවගේ පරමාධිපත්‍යයට පහර ගැසීමක්  වන අතර අධිකරණයටද  අපහාස කිරීමක් බව අපගේ  විශ්වාසයයි. එමෙන්ම එමගින් පනතේ සුජාතභාවයද අභියෝගයට ලක්වන බව අපි විශ්වාස කරමු.

ඔබතුමන් වෙත යොමු කරන මෙම ලිපිය මගින් අප යළි යළිත් තහවුරු කරනුයේ  පාර්ලිමේන්තුව මගින් මෙය පනතක් ලෙස සම්මත කරනු ලැබූවද ජනතාවගේ අදහස් ප්‍රකාශ කිරීමේ අයිතිය මුලිනුපුටා දැමෙන,දරදඩු රෙගුලාසීන්ට එරෙහි අපගේ සටන මෙයින් නතර නොකරන බවය. මෙම ලිපියේ අරමුණ වන්නේ අපගේ විරෝධය නොතකා ක්‍රියාත්මක කිරීමට යන රෙගුලාසි මගින් අදහස් ප්‍රකාශ කිරීමේ අයිතියට පමණක් නොව රටේ ආර්ථිකයට ද සිදුවිය හැකි හානිය හැකිතාක් දුරකට හෝ අවම කර  ගැනීම සඳහා වන අපගේ ප්‍රයත්නය ඉදිරියට ගෙන යෑමය.

 ආණ්ඩුව මෙලෙස කඩිමුඩියේ ‘ඔන්ලයින්’ පනත් කෙටුම්පත නීතියක් බවට පත් කිරීමට උත්සාහ ගනු ලබන්නේ ඉදිරි මැතිවරණයට පෙර ආණ්ඩුවට එරෙහිව එල්ලවන විරෝධතා මැඩ පවත්වාගැනීමේ පටු අරමුණු  සහිතව බවද පැහැදිලිව පෙනෙන්නට තිබේ. 

එබැවින්, පාර්ලිමේන්තුවේ කාර්යභාරය නිසි ලෙස ඉටුවීම  සම්බන්ධයෙන්  භාරකාරීත්වය දරන  ප්‍රධානියා වන ඔබ, පනත් කෙටුම්පතට අදාළ සංශෝධන නිසි ලෙස ඇතුළත් වී ඇත්දැයි පරීක්ෂා කර බලා ඒ සම්බන්ධයෙන් සහතිකවීම, ගරු කතානායකවරයා වශයෙන් ඔබතුමන් සතු වගකීමක් බව අපි විශ්වාස කරමු.

එබැවින්, ශ්‍රේෂ්ඨාධිකරණය විසින් ඔබ තුමන් වෙත එවන ලද නියෝග හා මාර්ගෝපදේශ සංශෝධන නිසි ලෙස පනත් කෙටුම්පතට ඇතුළත්ව ඇත්දැයි සහතික කර ගන්නා තෙක් ඊට ඔබතුමන්ගේ අනුමැතිය ලබා නොදෙන ලෙස ප්‍රජාතන්ත්‍රවාදය ගරුකරන පුරවැසියන් සහ පුරවැසි ක්‍රියාකාරිකයින් වශයෙන් මෙයින් ඉල්ලා සිටිමු.