අන්තර්ජාලය ඔස්සේ නීතිවිරෝධීව සංවිධානාත්මක අයුරින් මූල්‍ය ගනු-දෙනු මෙහෙයවන මීගමුවේ මධ්‍යස්ථාන දෙකක් අපරාධ පරීක්ෂණ දෙපාර්තමේන්තුවේ නිලධාරීන් විසින් ඊයේ (24) රාත්‍රී කාලයේ වටලා විදේශිකයන් 30 දෙනකු පමණ අත්අඩංගුවට ගෙන ඇතැයි වාර්තා වේ.
මේ විදේශිකයන් අතර චීන, පිලිපීන, මාලදිවයින්, පාකිස්තාන, ඉන්දියා, නේපාලය ඇතුළු රටවල් කිහිපයකම පුරවැසියන් සිටින බව පැවසේ.
මොවුන් මේ වංචාව සිදු කර ඇත්තේ මුහුණු පොත ඇතුළු සමාජ මාධ්‍ය ඔස්සේ බවද වාර්තා වේ.
රුපියල් 5000ක මුදලක් ආයෝජනය කළොත් රුපියල් තුන්දාහක ලාභයක් ලැබෙන බව සඳහන් කරමින් විශාල වශයෙන් මුදල් රැස් කර මේ අය වංචාවල නිරතව සිට ඇති බව පොලිස් පරීක්ෂණවලදී හෙළිව තිබේ.
මේ වැටලීමේදී ඊට අදාල නිවාස දෙකෙහි තිබූ සංනිවේදන උපකරණ විශාල තොගයක්ද අපරාධ පරීක්ෂණ දෙපාර්තමේන්තුව සිය භාරයට ගෙන තිබේ.
ශ්‍රී ලංකාවේ සිට මේ පිරිස වෙනත් රටවල්වලටද මේ ජාවාරම ව්‍යාප්ත කර ඇති බවට සැක කරයි.
අපරාධ පරීක්ෂණ දෙපාර්තමේන්තුවේ අධ්‍යක්ෂ ජ්‍යෙෂ්ඨ පොලිස් අධිකාරි මංගල දෙහිදෙනිය මහතාගෙන් මාධ්‍ය කළ විමසුමකදී ඔහු පවසා තිබුණේ මේ විදේශිකයන් රඳවාගෙන දීර්ඝ ලෙස ප්‍රශ්න කරමින් සිටින බවයි.
මොවුන් බිලියන ගණනක මුදල් වංචා කර ඇතැයි සැක කරන බවද මෙවැනි තවත් ස්ථානයක් ඊයේ රෑම පරික්ෂා කිරීමට මෙහෙයුමක් ක්‍රියාත්මක කර තිබූ බවද මාධ්‍ය වාර්තා වල දැක්වේ.
