75 වැනි නිදහස් උත්සව සැමරීමට එක් නොවීමට කතෝලික සභාව තීරණය කළ බව කතෝලික සභාවේ මාධ්‍ය ප්‍රකාශක සිරිල් ගාමිණී ප්‍රනාන්දු පියතුමා පැවැසුවේය.
අද කොළඹදී පැවැති මාධ්‍ය හමුවකදී පියතුමා මේ බව සඳහන් කළේය.
“විදේශීය ණය වාරික ගෙවා ගන්න බැරි රටක, රටේ ජනතාවගෙන් සියයට 30ක් බඩගින්නේ ඉන්න රටක, අවුරුදු 5ට අඩු ළමයින්ගෙන් සියයට 33.4ක් මන්දපෝෂණයෙන් පෙළෙන රටක, බොහෝ දෙනෙකුට රැකියා අහිමිවෙමින් තිබෙන රටක, කුඩා කර්මාන්ත කඩා වැටෙන රටක, නීතියේ ආධිපත්‍ය දරුණු ලෙස බිදී ඇති රටක, ජනතාවගේ භාෂනයේ ප්‍රකාශනයේ බාධා ඇති රටක, ජනතාවගේ නිදහස දැඩි ලෙස විභාග ලෙස විනාශ කර ඇති රටක, උසස්පෙළ විභාගය පැවැත්වෙන කාලසීමාවේ පැය 24ම විදුලිය දෙන්න බැරි රටක, සෞඛ්‍ය අංශයට ප්‍රමාණවත් ලෙස බෙහෙත් නැති රටක අභිමානවත් ලෙස සැමරිය හැකි නිදහස කුමක්ද කියා අපි ප්‍රශ්න කරනවා.
රුපියල් මිලියන 200ක් වැනි මුදලක් වැය කර මේ සා පුහු නිදහස් උත්සවයක් පැවැත්විම ජනතාවට ඒරෙහිව කරන මහා අපරාධයක් හා නාස්තියක්. 75 වැනි නිදහස් උත්සවය පැවැත්වීමට මේ සා විශාල මුදලක් විනාශ කිරීම අපි දැඩි ලෙස හෙළා දකිනවා.
75 වැනි නිදහස සැමරීමේදී කළ යුතුව තිබුණේ පසුගිය වසර 75ක කාලය තුළ මේ රට කාබාසිනියා කරපු දේශපලාන පක්ෂ නායකයන් රටේ ජනතාවගෙන් සමාව ඉල්ලීමයි.
අපි මේ නිදහස් උත්සවය උත්සවාකරයෙන් සැමරීම ප්‍රතික්ෂේප කරනවා. කතෝලික සභාව නියෝජනය කරන කිසිම කෙනෙක් එයට සහභාගී වෙන්නේ නෑ.”
(අද)
