ජනාධිපතිවරණය ඉලක්ක කරගෙන රථවාහනවල අලවා ඇති අපේක්‍ෂක ප්‍රවර්ධන ස්ටිකර් ගලවා ඉවත් කිරීමට හදිසි පරීක්‍ෂා කිරීම් දිවයින පුරා ක්‍රියාත්මක කර ඇතැයි පොලිසිය පවසයි.

මැතිවරණ කොමිසමේ උපදෙස් මත මෙම වැඩපිළිවෙළ ක්‍රියාත්මක වේ.

මැතිවරණ නීති උල්ලංඝණය කරමින් පෞද්ගලික බස් රථ, ත්‍රිරෝද රථ ඇතුළු රථ වාහනවල අපේක්‍ෂකයන් ප්‍රවර්ධනය වන අයුරින් වැකි, සලකුණු, ඡායාරුප ඇතුළත් ස්ටිකර් හා කොඩි ප්‍රදර්ශනය කිරීම පිළිබඳව මැතිවරණ කොමිෂන් සභාවට පැමිණිලි රැසක් ලැබී ඇත.

එවැනි ක්‍රියාවක් 1981 අංක 15 දරන ජනාධිපතිවරයා තෝරා පත්කර ගැනීමේ පනතේ 74 වගන්තිය යටතේ වරදක් වන බැවින් මෙම නියෝගය ලබා දුන්නේ යැයි මැතිවරණ කොමිසම ඊයේ (සැප්. 9) නිවේදනය කළේ ය

5 ශ්‍රේණිය 2024 ශිෂ්‍යත්ව විභාගය ඉලක්ක කරගත් සියලුම උපකාරක පන්ති, දේශන හෝ වැඩමුළු එළඹෙන 11 වැනිදා මධ්‍යම රාත්‍රියේ සිට නතර කළ යුතු බව විභාග දෙපාර්තමේන්තුව නිවේදනය කරයි.

එමෙන්ම විභාග ප්‍රශ්න පත්‍රවල ප්‍රශ්න ලබාදෙන බවට හෝ ඒ හා සමාන ප්‍රශ්න ලබාදෙන බවට පෝස්ටර්, බැනර්, අත් පත්‍රිකා ප්‍රසිද්ධ කිරීම හෝ එවැනි දෑ ළඟ තබා ගැනීම තහනම් වෙයි.

මෙවර ශිෂ්‍යත්ව විභාගය ලබන 15 වැනිදා විභාග මධ්‍යස්ථාන 2849කදී පැවැත්වීමටයි කටයුතු සූදානම් කර ඇත.

තමා රටේ නායකත්වය භාරගත්තේ වෙනත් අයෙක් නොසිටි නිසා බව ස්වාධීන ජනාධිපති ධුර අපේක්ෂක රනිල් වික්‍රමසිංහ මහතා පවසයි.

ජනතාව දුකසේ සිටින විට සජිත් ප්‍රේමදාස සහ අනුර කුමාර දිසානායක ජනතාව වෙනුවෙන් අත් නොඉස්සු බව ද වික්‍රමසිංහ මහතා පෙන්වා දුන්නේය.

වික්‍රමසිංහ මහතා පවසන්නේ ඔවුන් දැන් බලය ලබාගැනීමට ඉදිරිපත් වී ඇත්තේ කෑදරකමට බවය.

ඔහු එසේ පැවසුවේ කොස්ගම පැවති ජනහමුවකදී ය.

“අනිත් අය කියන්න මොකක්ද කළේ කියලා. අපිට වේදනාවක් තිබුණා. වේදනාව තිබෙන නිසා ක්‍රියා කළා. ඒ අයට වේදනාව තිබුණේ නැත්ද? ඔබේ දුක දැක්කේ නැත්ද? දරුවෝ පාසල් නොයන එක දැක්කේ නැත්ද? අන්න ඒවාට පිළිතුරු දෙන්න ඕනේ. මම මෙතෙන්ට ආවේ වේදනාව නිසා. මම ආවේ රාජපක්ෂලා ආරක්ෂා කරන්නලු. ඒ ගොල්ලන්ව ආරක්ෂා කළා නම් ඒ අය මේ වේදිකාවේ ඉන්න එපැයි. ඒ වෙලාවේ වේදනාව දැකලා ආවේ නැති අය ඇයි දැන් එන්නේ? කෑදරකමට.”