විදේශගතවන ශ්‍රී ලාංකිකයන්ට ලබාදෙන කහ උණ එන්නත සෞඛ්‍ය අමාත්‍යාංශය සතුව නොමැති වීම හේතුවෙන් විදේශගතවන්නන් දැඩි අපහසුතාවට පත්ව ඇතැයි වාර්තා වේ.
මෙම එන්නත් බොරැල්ල වෛද්‍ය පර්යේෂණ ආයතනයේ ජාත්‍යන්තර සෞඛ්‍ය ඒකකයේ දැනට මාස කිහිපයක සිට නොමැති වීම නිසා කහ උණ පැතිරයාමේ අවදානමක් මතුව ඇති බව වෛද්‍ය හා සිවිල් අයිතිවාසිකම් පිළිබඳ වෛද්‍යවරුන්ගේ වෘත්තීය සමිති සන්ධානයේ සභාපති විශේෂඥ වෛද්‍ය චමල් සංජීව කොළඹ ඊයේ (29දා) පැවැති මාධ්‍ය හමුවකදී ප්‍රකාශ කළේය.
ලෝක සෞඛ්‍ය සංවිධානයේ ජාත්‍යන්තර සෞඛ්‍ය රෙගුලාසිවලට අනුව කහ උණ රෝග තත්ත්වය වළක්වා ගැනීම සඳහා එන්නත්කරණය කිරීම සාමාජික රටවල වගකීමක් බවද වෛද්‍යවරයා පෙන්වා දුන්නේය.
ශ්‍රී ලාංකිකයන් විදේශගත වීමේදී සහ නැවත පැමිණීමේදී කහ උණ පැතිර යාමේ අවදානමක් මතුව ඇති බැවින් ලක් රජය ජාත්‍යන්තර රෙගුලාසි උල්ලංඝනය කිරීම බරපතළ කරුණක් බවද ඔහු සඳහන් කළේය.
මේ අතර, සෞඛ්‍ය අමාත්‍යංශයේ නියෝජ්‍ය අධ්‍යක්ෂ ජනරාල් වෛද්‍ය ජී. විජේසූරිය පවසා ඇත්තේ කහ උණ සඳහා එන්නත් ලබාදීම සඳහා ගිවිසුම්ගතව සිටි සැපයුම්කරු නියමිත ලෙස එන්නත් නොදීම හේතුවෙන් මෙම තත්වය උද්ගත වි ඇති බවයි.
තවද, මෙනින්ජයිටීස් රෝගය සඳහා ප්‍රතිශක්තීකරණ එන්නත් ලෙස මැදපෙරදිග කලාපයේ සංචාරකයින් හට ලබාදෙන අතර එම එන්තත් ද මේ වනවිට මෙරට ගබඩාවල නොමැති බවද සෞඛ්‍ය අමාත්‍යංශය පවසා ඇත.
අදාළ එන්නත් මේ වනවිට ඇණවුම් කර ඇති අතර ඉදිරි සතිය ඇතුළත දිවයිනට ලැබිමට නියමිත බව වාර්තා වේ.
