Connect with us

පුවත්

කළුතර පාසල් සිසුවිය මැරුවේ සීසර් කෙනෙක්!

Published

on

කළුතර ප්‍රදේශයේ හෝටල් කාමරයකට ගොස් 16 හැවිරිදි බාල වයස්කාර පෙම්වතිය නිරුවත් කර තුන්වන මහලෙන් පහළට තල්ලු කර මරා දැමූ බව කියන 29 හැවිරිදි සැකකරු මෙම දැරිය ටික්ටෝක් මගින් දින දෙකකට පෙර හඳුනාගත් අයකු බව වාර්තා වේ.

මෙරට ප්‍රධාන පෙළේ මූල්‍ය සමාගමක ගෙවීමට අපහසු වාහන අත්පත් කරගන්නා (සීසර්) පුද්ගලයකු වන මෙම සැකකරු විවාහක පුද්ගලයකු බවත් කළුතර දකුණ පොලිසිය සඳහන් කරයි.

මෙලෙස ඝාතනයට ලක්ව ඇත්තේ කළුතර නාගොඩ රෝහල ආසන්නයේ පදිංචි කළුතර ප්‍රධාන පෙළේ බාලිකා විද්‍යාලයක 11 වැනි ශ්‍රේණියේ ඉගෙනුම ලැබූ දැරියකි.

ටික්ටොක් සමාජ මාධ්‍යට වීඩියෝ එක් කරන සිසුවිය මෙම පුද්ගලයා එම සමාජ මාධ්‍ය ඔස්සේම දින දෙකකට පෙර දැන හදුනාගෙන ඇති බවත් ඒ අනුව ඇයට හෝටලයකට යාමට එන්නැයි ඇරයුම් කර තිබෙන බවත් පොලිසිය පවසයි.

මේ අනුව මෙම දැරිය සිය පෙම්වතා සමගින් පෙරේදා (06) සවස 06 ට පමණ කළුතර ගාලු පාරේ පිහිටි හෝටලයකට පැමිණ ඇත. බාලවයස්කාරියක නිසා ඇය කළුතර නාගොඩ ප්‍රදේශයේ පදිංචි තම නිවසට යාබදව පදිංචි 20 හැවිරිදි තරුණියකගේ ජාතික හැඳුනුම්පතක් පෙන්වා හෝටලයේ තුන්වන මහලෙන් වෙන්කරගත් වායු සමීකරණය කළ කාමරයකට ගොස් තිබෙන බවත් විමර්ශන මගින් අනාවරණය වී ඇත.

මෙම යුවළ සමගින් තවත් 19 හැවිරිදි තරුණියක් 22 හැවිරිදි සිය පෙම්වතා සමගින් මෙම හෝටලයේම යාබද වායු සමීකරණ කාමරය වෙන්කරවා ගෙන ඇති බවත් මොවුන් සිවු දෙනාම එක් කාමරයක සිට ජොනිවෝකර් රෙඩ් ලේබල් වර්ගයේ විස්කි බෝතලයක්ද මෙහි සිට පානය කර ඇති බවත් හෝටල් සේවකයකු පොලිසිය හමුවේ සඳහන් කර ඇත.

මත්පැන් පානයෙන් පසු අනෙක් යුවළ යාබද කාමරයට ගොස් මඳ වේලාවක් එතුළ රැඳී සිට පිටව ගොස් ඇත. 

එසේම 16 හැවිරිදි දැරිය සමගින් සිටි පෙම්වතාද දැඩි කලබලයකින් හෝටලයේ සිට දිව යන ආකාරයද එහි සේවකයන් දැක ඇත.

දෙවන මහලේ ජනේලයකින් නිරුවත් කාන්තා මළසිරුරක් දුම්රිය මාර්ගයේ වැටී තිබෙන බවට හෝටලයට ආහාර ගැනීම සඳහා පැමිණි පුද්ගලයකු දැක ඒ බව හෝටල් කාර්ය මණ්ඩලයට පැවසීමෙන් අනතුරුව ඔවුන් 119 හදිසි ඇමතුම් අංශයට ඒ බව දැනුම් දී ඇත. 

අනතුරුව කළුතර දකුණ පොලිසියේ නිලධාරින් 1990 සුව සැරිය ගිලන් රථයක් සමග එම ස්ථානයට පැමිණ පරික්ෂා කිරීමේදී එහි වැටී සිටි දැරිය මිය ගොස් ඇති බවට නිරීක්ෂණය වී ඇත.

කළුතර දකුණ පොලිස් ස්ථානාධිපති ප්‍රධාන පොලිස් පරීක්ෂක රුවන් විජේසිංහ ගේ මෙහෙයවීම මත සිදුකළ විමර්ශනවලට අනුව මෙම හෝටලයට මොවුන් හා පැමිණි 19 හැවිරිදි තරුණිය සහ ඇයගේ 22 හැවිරිදි පෙම්වතාත්, ඝාතනයට ලක්වූ දැරිය හා සම්බන්ධයක් පවත්වාගෙන ගිය 29 හැවිරිදි පුද්ගලයාගේ බිරිඳත් පොලිසිය භාරයට ගෙන තිබිණි.

තමන් එම කාමරයේ මත්පැන් පානය කර වෙන්කරගත් කාමරයට ගිය බවත් එහි වේලාවක් රැඳී සිට හෝටලයෙන් පිටව ගිය බවත් එහිදී සැකකාර යුවළ පවසා ඇත. 

එසේම ඝාතනයේ ප්‍රධාන සැකකරු වන 29 හැවිරිදි පෙම්වතාගේ විවාහක බිරිඳ ද පවසා ඇත්තේ තම සැමියා මෙවන් සම්බන්ධයක් පවත්වාගෙන ගිය බව නොදන්නා බවය. 

ඔහු පෙරේදා දහවල් නිවසට පැමිණ රුපියල් දෙදහසක මුදලක්ද ඉල්ලාගෙන තමන්ට පරිස්සමෙන් ඉන්න යැයි කියමින් පිටව ගිය බවද ඇය පොලිසිය හමුවේ පාපොච්ඡාරණය කර ඇත.

කෙසේ වෙතත් සිසුවිය හා හෝටලයට ආ මිතුරු යුවළ සිසුවිය වැටී සිටි දුම්රිය පාර අසලට පැමිණ ඇයගේ මළ සිරුර දුම්රිය පාරෙන් මඳක් ඉවත්කර පිටවී ගොස් පැයකට පමණ පසු පොලිසියට පැමිණ භාරවී ඇතැයි උසස් පොලිස් නිලධාරියෙක් පැවැසීය.

ඝාතනය සිදුකළැයි කියන සැකකරු සුදු පාටට හුරු මෝටර් රථයකින් පලාගිය බවට තොරතුරු ලැබී ඇති අතර ඔහු අත්අඩංගුවට ගැනීම සඳහා පරීක්ෂණ පවත්වන බව පොලිසිය කියයි.

මියගිය තරුණිය කළුතර ප්‍රාදේශීය දේශපාලනඥයකුගේ සහෝදරියකගේ දියණියක බවද පොලිස් පරීක්ෂණවලදී අනාවරණය වී ඇත.

මූලාශ්‍රය – අරුණ

පුවත්

අමාත්‍යාංශ ලේකම්වරුන් 4කට අනුමැතිය

Published

on

By

අමාත්‍යාංශ ලේකම්වරුන් සිව් දෙනෙකුගේ පත්කිරීම් සඳහා පාර්ලිමේන්තුවේ උසස් නිලතල පිළිබඳ කාරක සභාවේ අනුමතිය හිමිවී තිබේ.

ඒ, අග්‍රාමාත්‍ය ආචාර්ය හරිනි අමරසූරියගේ ප්‍රධානත්වයෙන් පසුගිය 09දා  එම කාරක සභාව පාර්ලිමේන්තුවේදී රැස් වූ අවස්ථාවේදී යි.

ඒ අනුව, බලශක්ති අමාත්‍යාංශයයේ ලේකම් ලෙස මහාචාර්ය කේ. ටී. එම්. උදයංග හේමපාල මහතාගේ පත්වීම, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයේ ලේකම් ලෙස කේ.එම්.ජී.එස්.එන්. කළුවැව මහතාගේ පත්වීම, කම්කරු අමාත්‍යාංශයයේ ලේකම් ලෙස එස්.එම්. පියතිස්ස මහතාගේ පත්වීම සහ කාන්තා සහ ළමා කටයුතු අමාත්‍යාංශයයේ ලේකම් ලෙස කේ.ඩී.ආර්. ඔල්ගා මහත්මියගේ පත්වීමට පාර්ලිමේන්තුවේ උසස් නිලතල පිළිබඳ කාරක සභාවේ අනුමතිය හිමිවී ඇත.

Continue Reading

පුවත්

කිඹුලාවල උණුසුම් වෙයි (වීඩියෝ) 

Published

on

By

මාර්ග සංවර්ධන අධිකාරියේ පිරිසක් පැමිණ කිඹුලාවල පාර දෙපස ඇති කඩ ඉවත්කිරීමට උත්සාහ කිරීම නිසා එහි උණුසුම් තත්ත්වයක් ඇතිවිය.

මෙම ඉදිකිරීම් නීති විරෝධී බව පවසමින් අදාළ නිලධාරීන් පිරිස මාර්ග දෙපස ඇති මෙම කඩ ඉවත්කිරීමට පියවර ගෙන තිබේ.

එහිදී ඔවුන් විසින් කඩ කිහිපයක් කඩා ලොරියකට පටවා ගැනීමත් සමග දෙපාර්ශවය අතර උණුසුම් තත්ත්වයක් හට ගැනුණි.

මෙම තත්ත්වය පාලනය කිරීම සදහා පොලීසිය ද පැමිණ තිබේ.

ඇති වූ උණුසුම් තත්ත්වය හමුවේ මාර්ග සංවර්ධන අධිකාරියේ නිලධාරීන් විසින් පටවාගනු ලැබූ භාණ්ඩ නැවත වෙළෙදුන් හට ලබාදීමට කටයුතු කර ඇත.

 

©️ -වීඩියෝ – Madyawediya

Continue Reading

පුවත්

දකුණු ආසියාවේ විශාලතම “වැට් බදු” මුදල් වංචාවේ මහමොළකරුගේ දඬුවම ශ්‍රේෂ්ඨාධිකරණය තහවුරු කරයි

Published

on

By

දකුණු ආසියාවේ විශාලතම “වැට් බදු” මුදල් වංචාවේ මහමොළකරුට බරපතල වැඩ සහිත වසර 20ක සිර දඬුවම් හා දඩ නියම කරමින් අද (11) අධිකරණ තීන්දුවක් ලබාදීම සිදුවිය.

දකුණු ආසියාවේ සිදුවූ විශාලතම වැට් බදු වංචාව ලෙස සැලකෙන 2004 වසරේදී දේශීය ආදායම් දෙපාර්තමේන්තුවේ සිදු වූ රුපියල් බිලියන 3.9ක වැට් බදු වංචාවයි.

මෙම වැට් බදු වංචා නඩුවේ මහ මොළකරු වන අටවන විත්තිකාර  මොහොමඩ් කාමිල් කුතුබ්දීන් (Mohamed Kamil Kuthubdeen)  නම් ව්‍යාපාරිකයාට බරපතල වැඩ සහිත වසර 20ක සිර දඬුවම් හා දඩ නියම කරමින් කොළඹ මහාධිකරණය විසින් ලබා දුන් තීන්දුව අනුමත කරමින්   අභියාචනාධිකරණය විසින් දුන් තීන්දුව ශ්‍රේෂ්ඨාධිකරණය අද (11) තහවුරු කළේය.

දඬුවම් නියම වූ විත්තිකරුවකු වූ මොහොමඩ් කුතුබ්දීන් විසින් ඉදිරිපත් කර තිබෙන අභියාචනා පෙත්සමට එරෙහිව නීතිපතිවරයා විසින් ඉකුත්දා ඉදිරිපත් කළ මෝසමක් සම්බන්ධයෙන්  තීන්දුව දෙමින් ශ්‍රේෂ්ඨාධිකරණය අද මෙම නියෝගය ප්‍රකාශයට පත් කළේය.

අර්ජුන ඔබේසේකර, සෝභිත රාජකරුණා යන විනිසුරුවරුන්ගේ එකඟත්වය ඇතිව ශ්‍රේෂ්ඨාධිකරණ විනිසුරු ජනක් ද සිල්වා මහතා විසින් මෙම තීන්දුව ලබා දෙන ලදී.

ඉකුත්දා මෙම නඩුකරය කැඳවූ අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල්  ශනිල් කුලරත්න මහතා අධිකරණය හමුවේ කරුණු දක්වමින් තමන්ට මහාධිකරණය විසින් පැනවූ දඬුවම තහවුරු කරමින් අභියාචනාධිකරණය විසින් දී තිබෙන තීන්දුව යළි සලකා බලන ලෙස විත්තිකරු විසින් අභියාචනාධිකරණය හමුවේ ගොනු කර තිබෙන ඉල්ලීම පවත්වාගෙන යාමේ හැකියාවක් නොමැති බව පෙන්වා දුන්නේය.

වැට් බදු වංචා කිරීම සම්බන්ධයෙන් වරදකරුවන් වූ මෙම පෙත්සම්කරු ඇතුළු තිදෙනෙකු  අභියාචනාධිකරණයට ගොනු කර තිබූ අභියාචනාවල තීන්දුව අභියාචනාධිකරණය විසින් දැනටමත් ප්‍රකාශයට පත්කර ඇති බවත් ඒ තුළින් විත්තිකරුවන්ට මහාධිකරණය විසින් පැනවූ දඬුවම අනුමත කර තිබෙන බවත් අතිරේක සොලිසිටර් ජනරාල්වරයා පෙන්වා දී තිබුණි.

එහෙත් අදාළ නඩු තීන්දුව නැවත සලකා බලන ලෙස ඉල්ලා මෙම විත්තිකාර අභියාචකයෙකු වන මොහොමඩ් කුතුබ්දීන් විසින් 2024 වසරේ ජූලි මස අභියාචනාධිකරණයට යළි පෙත්සමක් ගොනු කර ඇති අතර එම  පෙත්සම සම්බන්ධයෙන් නියෝගයක් ලබා දීම අභියාචනාධිකරණය විසින් කල්තබා ඇති බවත් අතිරේක සොලිසිටර් ජෙනරාල්වරයා ඉකුත් නඩු දිනයේ පෙන්වා දී තිබුණි.

අභියාචනාධිකරණය හමුවේ අදාළ පෙත්සම ගොනු කර තිබෙන විත්තිකරු මහාධිකරණ නඩු විභාගය මගහැර රටින් පලා ගොස් සිටි අයෙකු බවත් ඔහුට මෙම තීන්දුව යළි සලකා බලන ලෙස ඉල්ලීමක් ඉදිරිපත් කිරීමට කිසිදු නීතිමය හැකියාවක් නොමැති බවත් අතිරේක සොලිසිටර් ජෙනරාල්වරයා එහිදී තර්ක කර තිබුණි.

එබැවින් විත්තිකරු විසින් අභියාචනාධිකරණය හමුවේ ගොනුකර තිබෙන පෙත්සම නිෂ්ප්‍රභ කිරීමේ නියෝගයක් නිකුත් කරන ලෙසත් අතිරේක සොලිසිටර් ජෙනරාල්වරයා ශ්‍රේෂ්ඨාධිකරණයෙන් ඉල්ලීමක් කර තිබුණි.

එම කරුණු සම්බන්ධයෙන් අද දින සිය තීන්දුව ප්‍රකාශයට පත් කළ ජනක් ද සිල්වා මහතා ප්‍රමුඛ ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල අභියාචනාධිකරණය විසින් තීන්දුවක් ලබාදී තිබියදී එය යළි සලකා බලන ලෙස ඉල්ලීම් ඉදිරිපත් කිරීමට පෙත්සම්කරුට නීතිමය හැකියාවක් නොමැති බව සඳහන් කර සිටියේය.

එය අධිකරණ ක්‍රියාදාමය අව භාවිතාවට ලක් කිරීමක් යැයි චෝදනා කළ ශ්‍රේෂ්ඨාධිකරණය මෙවැනි ක්‍රියා සඳහා නීතියෙන් අවසර හිමි නොවන බවත් සඳහන් කර සිටියේය.

ඒ අනුව මෙම විත්තිකරුට මහාධිකරණය මගින් පනවන ලද සිර දඬුවම් හා දඩ මුදල් තහවුරු කරමින් අභියාචනාධිකරණය විසින් දැනටමත් ප්‍රකාශයට පත් කරන තීන්දුව තහවුරු කරන බවත් මෙම නඩුකරය සම්බන්ධයෙන් තවදුරත් ඉල්ලීම් සලකා බැලීමට අවශ්‍ය නොවන බවත් ශ්‍රේෂ්ඨාධිකරණය අවධාරණය කළේය.

2002 වසරේ නොවැම්බර් මස 15 වනදා සහ 2004 වසරේ දෙසැම්බර් මස 15 වනදා අතර කාලසීමාව තුළ දකුණු ආසියාවේ විශාලතම බදු වංචාව ලෙස සැලකෙන දේශීය ආදායම් දෙපාර්තමේන්තුවට අයවිය යුතු රුපියල් බිලියන 3.9 වැට් බදු මුදල්  වංචා කිරීම සම්බන්ධයෙන් විත්තිකරුවන් තුන්දෙනෙකුට එරෙහිව කොළඹ මහාධිකරණය විසින් බරපතල වැඩ සහිත වසර 20 බැගින් දඬුවම් හා දඩ මුදල් නියම කර තිබුණි.

මෙසේ දඬුවම් නියම වූ විත්තිකරුවන් තුන්දෙනාම අධිකරණය මගහැර පළා ගොස් සිටි අතර පසුව ඔවුන් එම දඬුවමට එරෙහිව අභියාචනාධිකරණයට අභියාචනා පෙත්සම් ඉදිරිපත් කළත් අභියාචනාධිකරණය ඒවා ප්‍රතික්ෂේප කර මහාධිකරණය විසින් පැනවූ දඬුවම තහවුරු කර තිබුණි.

Continue Reading
Advertisement

Trending

Copyright © 2023 Sri Lanka Mirror. All Rights Reserved