රත්නපුර ඓතිහාසික මහ සමන් දේවාලය ආසන්නයේ කළු ගඟේ මැණික් පතල් සහ වැලි කැණීම් තහනම් කර ඇති කලාපය තුළ මැණික් ගැරීමට භාවිත කළ සබ්මැරිනයක ආකාරයෙන් පත්ලේ මෙන් ම ගොඩබිම ද ගමන් කළ හැකි නව නිර්මාණාත්මක යන්ත්‍රයක් අත්අඩංගුවට ගැනීමට රත්නපුර පොලිසිය සමත්ව ඇත.

මෙම යන්ත්‍රය භාවිතයෙන් මැණික් ගරමින් සිටි පස් දෙනෙකු ගඟේ පිහිනා පැන ගොස් ඇති අතර ඔවුන් අත්අඩංගුවට ගැනීමට මේ වනවිට විමර්ශන ආරම්භ වී ඇත.

ඓතිහාසික සබරගමු මහ සමන් දේවාලය ආසන්නයෙන් ගලා බසිනා කළු ගඟේ වැලි ගොඩ දැමීම, අනවසර පතල් කැපීම තහනම් කලාපයක් කර ඇත.

එම කලාපය තුළ නවීන තාක්ෂණයෙන් නව නිර්මාණයක් ලෙස ඝනකම යකඩ තහඩු උපයෝගී කර ගනිමින් තැනූ බෝට්ටුවක් භාවිත කරමින් කළු ගං පතුලේ මැණික් ඉල්ලම් ගනිමින් තිබූ දිය ගොඩ දෙකේ ම ගමන් කළ හැකි බෝට්ටුව පොලිස් නිලධාරීන් පැන අත්අඩංගුවට ගනිද්දී මැණික් ජාවාරම් කළ පුද්ගලයන් ගඟේ පිහිනා පැන ගොස් තිබේ.

දිගු කාලයක සිට රාත්‍රී කාලයේදී මෙම ජාවාරම සිදුවෙමින් පැවැති බව ගම්වාසීන් මෙන් ම පොලිසිය ද පැවැසූ අතර, මෙම බෝට්ටුව තැනින් තැනට ගමන් කළ හැකි ජංගම සකර් යන්ත්‍රයක් ලෙස හඳුනා ගෙන ඇත.

මෙම යකඩ බෝට්ටුව ඇතුළේ අධිබලැති එන්ජිමක් සවිකර එය නොපෙනෙන ලෙසට යකඩ තහඩුවලින් ආවරණය කර තිබූ අතර, බැලූ බැල්මට මෙම යකඩ බෝට්ටුව පසුගිය එල්ටීටීඊ යුද සමයේ කොටි සාමාජිකයන් විසින් තැනූ සබ්මැරීනයකට සමානව නිර්මාණය කර ඇති බව ද මෙවැනි යන්ත්‍රයක් පොලිසිය විසින් අත්අඩංගුවට ගත්තේ, ප්‍රථම වතාවට බව ද වැටලීමට එක් වූ පොලිස් නිලධාරීහු පැවැසූහ.

මෙම බෝට්ටුවේ සවිකර තිබෙන යන්ත්‍රය මගින් පැයක් ඇතුළත බෝට්ටු දෙකක් පිරෙන්න ඉල්ලම් ගං පතුලෙන් ලබා ගන්නා බව අනාවරණය වූ අතර මෙය වෙනත් සකර් මැෂින් මෙන් නොව කළු ගඟේ තැනින් තැනට ගමන් කළ හැකි යන්ත්‍රයක් වන අතර, හදිසි අවස්ථාවක සුදුසු ස්ථානයකින් ගොඩට ගෙන පාරේ ගමන් කරවීම සඳහා රෝද ද සවිකර ඇති අයුරු දක්නට ඇත.

සබරගමුව පළාත භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න මහතාගේ නියෝගයකට අනුව, රත්නපුර මූලස්ථාන ප්‍රධාන පොලිස් පරීක්ෂක කමල් අබේසිරි මහතාගේ උපදෙස් මත මෙම වැටලීම සිදුකරනු ලැබුවේ ගොඩකවෙල, ඇඹිලිපිටිය, සූරියකන්ද, කොළොන්න සහ රත්නපුර යන පොලිසිවලින් සමන් දේවාලයේ පොලිස් මුරපොළ වෙත විශේෂ රාජකාරී සඳහා අනුයුක්ත කර තිබෙන පොලිස් නිලධාරීන් කණ්ඩායමක් විසිනි.

මෙම වැටලීම ඉකුත් 3 වන දින රාත්‍රී කාලයේ සිදුකරන අවස්ථාවේ සමන් දේවාලය පිටුපසින් කළු ගඟ හරහා ඉදිකර තිබෙන වැල් පාලම ආසන්නයේ පාලම ද අනතුරේ හෙළමින් ඉල්ලම් ගොඩ අදිමින් සිට ඇත.

පොලිසිය මෙම වැටලීම සිදුකරද්දී සැකකරුවන් ගඟේ කිමිඳී පළා ගොස් ඇති අතර ලක්ෂ ගණනාවක් වටිනා එම යන්ත්‍රය පොලිස් අත්අඩංගුවට ගෙන ඇත.

අධික බරකින් යුත් මෙම යන්ත්‍රය ගඟෙන් ගොඩ ගැනීම සඳහා පහසු ස්ථානයක් සොයා ගඟ පහළට ගෙන යෑමට සිදුවූ අතර එය ගඟෙන් ගොඩ ගැනීමට ‍දොඹකරයක් භාවිත කරමින් විශාල වෙහෙසක් දැරීමට පොලිසියට සිදු විය.

ගමේ තරුණ පිරිස් ද ඊට සහාය වී ඇති අතර දොඹකරේ යකඩ රැහැනක් ද මෙහි අධික බර නිසා කැඩී යෑමකට ලක්විය.

බෝට්ටුව රත්නපුර පොලිසියට රැගෙන ගිය අතර එය අධිකරණයට ඉදිරිපත් කිරීමට කටයුතු කර ඇත.

සබරගමුව පළාත භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න මහතාගේ නියෝගයකට අනුව, රත්නපුර මූලස්ථාන ප්‍රධාන පොලිස් පරීක්ෂක කමල් අබේසිරි මහතාගේ උපදෙස් මත ගොඩකවෙල පොලිසියේ පො.සැ. ධර්මරත්න (50331), සූරියකන්ද පොලිසියේ පො.කො. රුක්ෂාන් (104502) ඇතුළු නිලධාරීහු මෙම වැටලීම සිදු කළහ.

(මව්බිම )