වාහන ආනයනය ඇතුළු ක්ෂේත්‍ර 03ක් වෙනුවෙන් ප්‍රතිපත්ති සම්පාදනය සඳහා කමිටු තුනක් පත් කිරීමට ජනාධිපති කාර්ය මණ්ඩල ප්‍රධානී සාගල රත්නායක මහතාගේ ප්‍රධානත්වයෙන් පැවති සාකච්ඡාවක තීරණය කර ඇත.

මෙයට ඒ ඒ ක්ෂේත්‍රයන්ට අදාල නිලධාරීන්ගේ සහභාගීත්වය සිදුව ඇති අතර පරිසර ප්‍රතිපත්තිය හා මත්ද්‍රව්‍ය නිවාරණ ප්‍රතිපත්තියක් ද ඒ අනුව හඳුන්වා දි ඇත.

වාහන ආනයනයේදී රටේ විදේශ විනිමය තත්ත්වය, මාර්ග තදබදය,පරිසරයට වන බලපෑම් මෙන්ම මෙරට වාහන එකලස් කරන ආයතන වල නිෂ්පාදන ධාරිතාවය වැඩි කිරීම ආදී කරුණු ගැන සලකා බැලීමට මෙහිදි නියමිතය.

තවද සිංගප්පූරුවේ වාහන සම්බන්ධයෙන් පවතින ක්‍රමවේදය මෙන් වාහන සඳහා තත්ත්ව සහතිකයක් නිකුත් කිරීම සම්බන්ධයෙන් ද අදාළ කමිටුව සලකා බලනු ඇත.

පරිසර ප්‍රතිපත්ති සැකසීමේ කමිටුව මඟින් වනාන්තර විනාශ කිරීම, ඛනිජ සම්පත් හැරීම ආදිය පිළිබඳව ආරක්ෂණ වැඩපිළිවෙලක් සැකසීමට නියමිත අතර ඒ සඳහා ඩ්‍රෝන තාක්ෂණය හා ආරක්ෂක හමුදා සහායද ලබා ගැනීමට අවධානය යොමු වී ඇත.

මත්ද්‍රව්‍ය නිවාරණ ප්‍රතිපත්ති සැකසීමේදී මහජන ආරක්ෂක අමාත්‍යාංශයේ සහය ඇතිව මත්ද්‍රව්‍ය රටට පැමිණීමේ මහා පරිමාණ ජාවාරම් මැඩලීම ද මෙම කමිටුව ක්‍රියා කරනු ඇත.

(මුලාශ්‍රය – ලංකාදීප)