සිය රාජකාරි ගිනි අවිය (ටී 56) අස්ථානගත කරමින් රටින් පලාගිය ගල්කිස්ස පොලිසියේ සේවයේ නිරතව සිටි ආධුනික පොලිස් කොස්තාපල්වරයා ඩුබායි හි රැඳී සිටින පාතාලයේ ප්‍රබල මත්කුඩු ජාවාරම්කරුවෙක් වන බඩෝවිට අසංකගේ රැකවරණය ලබාගෙන ඇති බවට මාධ්‍ය වාර්තා පලව තිබේ.
මෑත කාලයේදී ගල්කිස්ස සහ කොහුවල ආශ්‍රිතව සිදු වූ වෙඩි තැබීම් සිද්ධිවලට බඩෝවිට අසංක සම්බන්ධ බව පැවසේ.
මෙසේ රටින් පලාගිය පොලිස් කොස්තාපල්වරයාගේ මිතුරාවන පොලිස් කොස්තාපල්වරයෙකු ද ගල්කිස්ස පොලීසිය විසින් පෙරේදා (10) අත්අඩංගුවට ගෙන තිබුණි.
ගිනි අවිය රැගෙන පලායෑමට මෙම කොස්තාපල්වරයා ආධාර හා අනුබලදී කුමන්ත්‍රණය කර ඇතැයි පොලීසිය සැකකරයි.
අත්අඩංගුවට ගත් කොස්තාපල්වරයාද ගල්කිස්ස පොලිස් ස්ථානයේ සේවයේ නිරතව සිටින්නෙකි.
ඔහුව රැඳවුම් නියෝගයකින් රඳවාගෙන විමර්ශන පවත්වන බව පොලීසිය කියයි.
මේ හැරුණු කොට පලාගිය ආධුනික පොලිස් කොස්තාපල්වරයාගේ මව සහ පියා ගල්කිස්සෙන් අනුරාධපුර මහවිලච්චියට ගිය පොලිස් කණ්ඩායමක් පෙරේදා (10) අත්අඩංගුවට ගෙන ඇත.
ඔවුන් දෙදෙනාව පැය 48ක් රඳවාගෙන ප්‍රශ්න කරන බව උසස් පොලිස් නිලධාරියෙක් පැවසීය.
සිය පොලිස් පුතා රටින් පලා යන බව ඔවුන් දෙදෙනා දැන සිටියේ දැයි විමර්ශනයට ලක්වන බවද එම නිලධාරියා කීය.
රටින් පලාගිය සැකකාර ආධුනික පොලිස් කොස්තාපල් පරිහරණය කරන ලද යතුරුපැදිය, ඔහුගේ නිල ඇඳුම තනිකඩ භට නිවාසය තුළ තිබී පොලිස් භාරයට ගෙන ඇත.
කොස්තාපල්වරයා රටින් පලායන්නේ පසුගිය 08 වැනිදා රාත්‍රී කාලයේදීය.
මෙතෙක් ගිනි අවියට සිදුවූ දෙයක් සොයා ගැනීමට නොහැකි වී තිබේ.
ඔහු සිය පෙම්වතිය වන රාත්‍රී සමාජ ශාලාවක සේවයේ නිරතව සිටින විවාහක කාන්තාවක්ද එදින රාත්‍රී කාලයේ හමුවී ඇත.
අත්තිඩියේ කුලී නි‍ෙවසක රැඳී සිටින එම කාන්තාවගේ නිවස ඉදිරිපිට යතුරුපැදිය තබා ඔහු කුලී මෝටර් රථයක නැඟී ගුවන්තොටුපොළට ගොස් ඇති බව අනාවරණය වී තිබේ.
එම යතුරුපැදිය පොලිස් බැරක්කය වෙත රැගෙනවිත් ඇත්තේ පෙරේදා (10) අත්අඩංගුවටගත් කොස්තාපල්වරයාය.
ප්‍රශ්න කිරීමේදී ඔහු පවසා ඇත්තේ එම යතුරුපැදිය පොලිස් බැරක්කයට ගෙන එන ලෙස පලාගිය කොස්තාපල්වරයා පැවසූ බව සැකාකර කොස්තාපල්වරයා පවසා තිබේ.
දුරකතන ජාල විමර්ශනයකදී හෙළිවී ඇත්තේ මෙම කොස්තාපල්වරු දෙදෙනා අතර එදින අසාමාන්‍ය ලෙස දුරකතන ඇමතුම් හුවමාරුවී ඇති බවය.
ඩුබායි රාජ්‍යයට පලාගිය කොස්තාපල්වරයා පාතාල සාමාජිකයකු සහ මත්ද්‍රව්‍යජාවාරම්කරුවකු වන ‘අයි ඩී’ නමැති ජාවාරම්කරු සහ ඔහුගේ සමීපතමයන් සමග whatsApp තාක්ෂණය ඔස්සේ සබඳතා පවත්වා ඇතැයි ද අනාවරණය වී ඇතැයි පොලීසිය කියයි.
ඩුබායි රාජ්‍යයට පලාගිය කොස්තාපල්වරයා මෝටර් රථයක් පවා මිලදීගෙන ඇතැයිද පොලිස් විමර්ශනවලදී අනාවරණය වී ඇත.
මේ වන විට ඔහුගේ හැඳුනුම්පත් අංකය ඉදිරිපත් කර දුරකතන දත්ත වාර්තා ලබා ගැනීම සඳහා කටයුතු කරමින් පවතින අතර මේ වන විට එක් සමාගමකින් පමණක් එම වාර්තා ලැබී ඇතැයිද උසස් පොලිස් නිලධාරියෙක් අනාවරණය කර ඇත.
මූලාශ්‍රය – දිනමිණ
