ගුවන් ගමන් ප්රමාද කිරීම මගින් ගොඩනැගෙමින් පවතින සංචාරක ආර්ථිකය යළි බිඳ වැට්ටවීමට සැලසුම් සහගත වැඩපිළිවෙලක් ක්රියාත්මකවේද යන්න පිළිබඳව සොයා බලා අවශ්ය පියවර ගැනීමට බලශක්ති සහ ප්රවාහනය පිළිබඳ ආංශික අධීක්ෂණ කාරක සභා සභාපති, පාර්ලිමේන්තු මන්ත්රී නාලක බණ්ඩාර කෝට්ටේගොඩ මහතා විසින්, ශ්රී ලංකා සිවිල් ගුවන් සේවා අධිකාරියේ නිලධාරීන්ට නිර්දේශ කරන ලදී.
පාර්ලිමේන්තු මන්ත්රීවරයා මේ බව සඳහන් කළේ බලශක්ති සහ ප්රවාහනය පිළිබඳ ආංශික අධීක්ෂණ කාරක සභාව ඊයේ (04) පාර්ලිමේන්තුවේදී රැස්වූ අවස්ථාවේදීය.
තවද, විවිධ අභියෝග පසුකරමින්, ආර්ථික අර්බුදයක් මධ්යයේ වුවද මෙරටට සංචාරකයන් වැඩි වශයෙන් පැමිණීමේ ප්රවණතාවයක් දක්නට ලැබෙන කාලසීමාවක ගුවන් යානා ප්රමාද වීම ගැටලුවක් බව මෙම කාරක සභාවේදී සාකච්ඡාවට ලක් විය.
මේ සම්බන්ධයෙන් ශ්රී ලංකා සිවිල් ගුවන් සේවා අධිකාරියේ නිලධාරීන් සඳහන් කළේ ශ්රී ලංකා ගුවන් සමාගමේ වෘත්තීය සමිති රාශියක් තිබෙන බවත්, විවිධ වෘත්තීය සමිති විසින් විවිධ ඉල්ලීම් හේතු කොට ගෙන සිය කාර්යභාරය නිවැරදි කාලසීමාව ඇතුළත ඉටු නොකරන බවයි. මේ හේතුවෙන් මෙම තත්ත්වය උද්ගතව ඇති බව පැමිණ සිටි නිලධාරීහු පැවසූහ.
මෙම සාකච්ඡාවේදී විශේෂයෙන් ගුවන් යානා ප්රමාදය සහ අනපේක්ෂිත ලෙස ගුවන්ගමන් අවලංගු වීම කෙරෙහි ප්රධාන වශයෙන් අවධානය යොමු විය.
මේ අනුව පවතින ප්රශ්න විසඳගැනීමට සියලු පාර්ශවයන් කටයුතු කළ යුතු බවත්, එය රටට හෝ රටේ ආර්ථිකයට බලපාන මට්ටම දක්වා වර්ධනය වන ලෙස කටයුතු නොකළ යුතු බව සභාපතිවරයා මෙහිදී පෙන්වා දී ඇත.
තවද, සිවිල් ගුවන් සේවා (සංශෝධන) පනත් කෙටුම්පත සලකා බැලීමද මෙහිදී සිදු වූ අතර එයට ආංශික අධීක්ෂණ කාරක සභාවේ එකඟත්වය හිමි විය.
මේ අවස්ථාව සඳහා කාරක සභා සාමාජිකයන වන, පාර්ලිමේන්තු මන්ත්රී කුමාරසිරි රත්නායක, උදයකාන්ත ගුණතිලක මහතා යන මහත්වරුන් මෙන්ම ශ්රී ලංකා සිවිල් ගුවන් සේවා අධිකාරිය නියෝජනය කරමින් රාජ්ය නිලධාරීහු පිරිසක් සහභාගී වුහ.