අධිකාරියට අයත් ගොඩනැගිල්ල ප්‍රතිසංස්කරණය නොකොට රුපියල් බිලියන 2ක පමණ මුදලක් වැය කරමින්, කුලියට වෙනත් ගොඩනැගිල්ලක තවදුරත් රැඳී සිටීමට හේතු කෝප් කාරක සභාව විසින් මැණික් හා ස්වර්ණාභරණ අධිකාරියේ නිලධාරීන්ගෙන් ප්‍රශ්න කරනු ලැබීය.

අධිකාරියට යාබදව ඉදිකිරීම් ආරම්භ කළ සාප්පු සංකීර්ණ හේතුවෙන් අධිකාරියට අයත් ගොඩනැගිල්ල රැඳී සිටීමට නුසුදුසු තත්ත්වයකට පත් වූ
බවත්,

සිදුව ඇති හානියට වන්දි ලෙස මාසිකව රුපියල් මිලියන 3ක කුලී පදනමක් සහිතව වෙනත් ගොඩනැගිල්ලක් එම සමාගම විසින් අධිකාරියට ගෙවීමට යෝජනා කර තිබුනද, එය ප්‍රතික්ෂේප කරමින් 2021 වසරේ සිට රුපියල් බිලියන 2ක පමණ කුලී මුදලක් වැය කරමින් වෙනත් ගොඩනැගිල්ලක අධිකාරියේ කටයුතු පවත්වා යනු ලබන බවටත් මෙහිදී අනාවරණය විය.

මධ්‍යම ඉංජිනේරු උපදේශන කාර්යාංශය (CECB) මගින් රුපියල් මිලියන 21ක් වැනි මුදලකින් අධිකාරියට අයත් ගොඩනැගිල්ල ප්‍රතිසංස්කරණය කළ හැකි බවට තක්සේරු කොට තිබියදී එම ප්‍රතිසංස්කරණ ක්‍රියාවලියද මග හරිමින්, අදාළ සමාගම විසින් යෝජනා කළ මාසික වන්දි මුදල ද ලබා නොගනිමින්, රු. බිලියන 2ක පමණ මුදල් ප්‍රමාණයක් වැය කිරීම සම්බන්ධයෙන් කෝප් කාරක සභාව සිය අප්‍රසාදය පළ කර සිටියහ.

මේ සියලු මුදල් ජනතා බදු මුදල් බවත්, වගකීමකින් තොර වූ මෙවන් ක්‍රියාකාරකම් ඔස්සේ රජයට විශාල පාඩුවක් සිදුවන බවත් කෝප් කාරක සභාව මෙහිදී අවධාරණය කරන ලදී.

මේ පිළිබඳ සාකච්ඡා කෙරුණේ මැණික් හා ස්වර්ණාභරණ අධිකාරියේ 2023 වර්ෂයන්ට අදාළ විගණකාධිපති වාර්තා සහ වර්තමාන කාර්ය සාධනය පරීක්ෂා කිරීමට පාර්ලිමේන්තුවේ පොදු ව්‍යාපාර පිළිබඳ කාරක සභාව (කෝප්) එහි සභාපති  පාර්ලිමේන්තු මන්ත්‍රී (වෛද්‍ය) නිශාන්ත සමරවීර මහතාගේ  සභාපතිත්වයෙන් 05.03.2025 සහ 27.03.2025 පාර්ලිමේන්තුවේදී රැස්වූ අවස්ථාවේදීය.