නව සුරාබදු බලපත්‍ර 22 ක් නිකුත් කිරීමට අදාළව නිරීක්ෂණ සහ වැඩිදුර නිර්දේශ ලබාදෙන ලෙස ඉල්ලා ජනාධිපති ලේකම් කාර්යාලයේ අධ්‍යක්ෂ ජනරාල් (රජයේ ආදායම්) විසින් සුරාබදු කොමසාරිස් ජනරාල්වරයාට ලිපියක් මගින් දැනුම්දී ඇත.
ජනාධිපති ලේකම් කාර්යාලයේ අධ්‍යක්ෂ ජනරාල් (රජයේ ආදායම්) එම්.ජේ. ගුණසිරි විසින් ඉකුත් 13 වැනිදා මෙම ලිපිය යවා තිබේ.
සිල්ලර මත්පැන් අලෙවිසලක් විවෘත කිරීම සඳහා සුරාබදු බලපත්‍ර ලබාගැනීම සඳහා අනුමැතිය ලබා ගැනීම සම්බන්ධයෙන් අදාළ ලිපියේ සඳහන්කර තිබේ.
යාපනය, මාන්කුලම, කිරන්, මුලතිව්, කිලිනොච්චිය, කිතුල්ගල, බෙලිඅත්ත, හම්බන්තොට, තිස්ස, කන්නන්තොට, කොඩිකාමම්, මුල්ලියාවලෛ, මුතූර්, දෙහිවල, අමිතිරිගල, ගාල්ල, වීරකැටිය, ආයිත්තිමලේ, ඇතිලිවැව, වඳුරඹ සහ මාපලගම යන ප්‍රදේශවල සිල්ලර මත්පැන් අලෙවිසල් විවෘත කිරීමට අදාළව මෙම නිර්දේශයන් ඉල්ලුම්කර ඇත.
මෙම සුරාබදු බලපත්‍ර ලබා ගැනීමට අදාළ ඉල්ලුම්පත් සුරාබදු දෙපාර්තමේන්තුව විසින් නිකුත් කර ඇති අතර, එම ඉල්ලුම්පත්වල සුරාබදු දෙපාර්තමේන්තුවේ ආදායම් මෙහෙයුම් කොමසාරිස්වරයා විසින් ද අත්සන් කර තිබේ.
මේ සම්බන්ධයෙන් සුරාබදු කොමසාරිස් ජනරාල් සමන් ජයසිංහ මහතාගෙන් කරන ලද විමසීමකදී කියා සිටියේ අලුතින් සුරාබදු බලපත්‍ර නිකුත් කිරීම නවතා තිබෙන බවත්, අලුතින් සුරාබදු බලපත්‍ර නිකුත් කිරීමට අදාළ ලිපියක් ජනාධිපති ලේකම් කාර්යාලයෙන් මෙතෙක් ලැබී නොමැති බවත්ය.
අදාළ ලිපිය පිළිබඳව හිටපු සුරාබදු කොමසාරිස් ජනරාල්, ජනාධිපති ලේකම් කාර්යාලයේ අධ්‍යක්ෂ ජනරාල් (රජයේ ආදායම්) එම්.ජේ. ගුණසිරිගෙන් කරන ලද විමසීමකදී ඔහු කියා සිටියේ සුරාබදු බලපත්‍රයක් ලබා ගැනීම සම්බන්ධයෙන් යම් අයෙකු ඉල්ලීමක් කළහොත් අදාළ ලිපිය සුරාබදු කොමසාරිස් ජනරාල්වරයාට යොමු කිරීම පමණක් සිදු කරන බවත්, ඊට අදාළව නිර්දේශ කිරීම සම්බන්ධව බලපෑමක් සිදු නොකරන බවත්ය.
එමෙන්ම, සුරාබදු බලපත් නිකුත් කිරීමේ බලය ඇත්තේ සුරාබදු කොමසාරිස් ජනරාල්වරයාට පමණක් බවද ඔහු පැවසීය.
ජනාධිපති ලේකම් කාර්යාලයේ අධ්‍යක්ෂ ජනරාල්වරයකුට සුරාබදු බලපත් නිකුත් කිරීමට නොහැකි බවත්, එය ලබාදීමේ බලය ඇත්තේ මුදල් ඇමැතිවරයාගේ නිර්දේශයට යටත්ව සුරාබදු කොමසාරිස් ජනරාල්වරයාට පමණක් වුවත්, ඇතැමුන් රුපියල් කෝටි ගණනින් මුදල් ලබාගෙන බලපත්‍ර ලබාදීමේ කටයුතු සිදුකෙරෙමින් පවතින බව සමස්ථ ලංකා බලපත්‍රලාභී මත්පැන් අලෙවිකරුවන්ගේ සංගමයේ සභාපති අජිත් උඩුගම කීවේය.
සුරාබදු බලපත්‍රය ජනතාවට ලබාදෙන විශේෂ වරප්‍රසාදයක් බවත්, එය ලබාදීම සාධාරණ ක්‍රමවේදයක් යටතේ සිදුවියයුතු වුවත්, දැන් සිදුවන්නේ මුදලට බලපත්‍ර ලබාදීම බවත් ඔහු පැවසීය.
මෙලෙස වැරදි ආකාරයෙන් බලපත්‍ර ලබාදීමට එරෙහිව අධිකරණ ක්‍රියාමාර්ගයක් ගැනීමට කටයුතු කරන බවද සභාපතිවරයා වැඩිදුරටත් සඳහන් කළේය.
මූලාශ්‍රය – අරුණ
