ජනාධිපතිවරණ ඡන්ද පත්‍රිකාව අද(16) දිනය තුළ මුද්‍රණය සඳහා රජයේ මුද්‍රණාලයට භාරදෙන බව ජාතික මැතිවරණ කොමිෂන් සභාව පවසයි.
එහි සභාපති ආර්.එම්.ඒ. එල් රත්නායක මහතා සඳහන් කළේ, එය සකස් කිරීමේ කටයුතු සිදුවන බවයි.
මෙවර ජනාධිපතිවරණයට ඉදිරිපත් වන අපේක්ෂකයින් සංඛ්‍යාව 39 කි.
ඒ අනුව 2019 වසරේ පැවති ජනාධිපතිවරණයේදී මුද්‍රණය කළ ඡන්ද පත්‍රිකාවට වඩා මෙවර ඡන්ද පත්‍රිකාව තරමක් දිගු වන බව සභාපතිවරයා ප්‍රකාශ කළේ ය.
එහි ප්‍රමාණය සහ ඒ සඳහා යන වියදම ඉදිරියේදී ප්‍රකාශයට පත් කිරීමට නියමිතයි.
මේ අතර, මැතිවරණයට අදාළ නීතිවිරෝධී පෝස්ටර්, කටවුට්, බැනර් ආදිය ඉවත් කිරීම සඳහා කම්කරුවන් බඳවා ගෙන ඇතැයි පොලීසිය පවසයි.
පොලිස් මැතිවරණ කාර්යංශය භාර නියෝජ්‍ය පොලිස්පති අසංක කරවිට මහතා සඳහන් කළේ, පොලිස් ස්ථාන අදියර තුනක් යටතේ වෙන්කර ඇති බවයි.
ඒ අනුව මූලස්ථාන පොලිසීයකට කම්කරුවන් හතර දෙනෙකු බැගින් බඳවා ගෙන තිබේ.
සෙසු පොලිස් ස්ථාන වලට බදවා ගෙන ඇති කම්කරුවන් සංඛ්‍යාව 3කි.
පොලිස් මැතිවරණ කාර්යංශයේ නියෝජ්‍ය පොලිස්පතිවරයා කැඳවා මැතිවරණ රාජකාරී පිළිබඳ සාකච්ඡා කළ බව, ශ්‍රී ලංකා මානව හිමිකම් කොමිසම පවසයි.
එහි කොමසාරිස් නිමල් පුංචිහේවා මහතා සඳහන් කළේ, පොලිස් නිලධාරීන්ට නිකුත් කර ඇති මාර්ගෝපදේශ සම්බන්ධයෙන් එහිදී දීර්ඝව සාකච්ඡා කළ බවයි.
මේ අතර, නාමයෝජනා භාරදීමෙන් පසු, පැමිණිලි තුනක් ලැබී ඇතැයි මැතිවරණ කොමිසම සඳහන් කළේ ය.
ඒ, නීතිවිරෝධී ප්‍රචාරණ කටයුතු සම්බන්ධයෙන් ය.
ඒ අනුව ජනාධිපතිවරණය ප්‍රකාශයට පත්කළ දා සිට මැතිවරණ කොමිසම වෙත වාර්තා වී ඇති සමස්ත පැමිණිලි සංඛ්‍යාව 437 කි.
