නොබැඳි ජාතීන්ගේ සමුළුවට සමගාමීව උගන්ඩාවේ කම්පාලා නුවරදී ජනාධිපති රනිල් වික්රමසිංහ මහතා සහ ඉන්දීය විදේශ කටයුතු අමාත්ය එස්. ජයශංකර් මහතා අතර සාකච්ඡාවක් සිදුව ඇතැයි වාර්තා වේ.
ඉන්දීය විදේශ කටයුතු අමාත්යවරයා X පණිවුඩයක් තබමින් සඳහන් කර ඇත්තේ ශ්රී ලංකා ජනාධිපතිවරයා හමුවීමට ලැබීම සතුටක් බවයි.
ඊට අමතරව රනිල් වික්රමසිංහ මහතා අප්රිකා කලාපයේ සිටින ගෝලීය දකුණේ රටවල නායකයින් සහ නියෝජිතයින් කිහිප පළක් සමඟ ද ද්විපාර්ශ්වික සාකච්ඡාවල නිරතවී තිබේ.
එසේම,ජනාධිපති රනිල් වික්රමසිංහ මහතා සහ දකුණු අප්රිකානු ජනාධිපති සිරිල් රමපෝසා (Cyril Ramaphosa) මහතා අතර හමුවක් ද සිදුව ඇත.
මෙහිදී දකුණු අප්රිකානු ජනාධිපතිවරයා ජනාධිපති රනිල් වික්රමසිංහ මහතා ඉතා සුහදශීලිව පිළිගත් බවත්, අනතුරුව නායක දෙපළ ද්විපාර්ශ්වික සාකච්ඡාවලට එක් වූ බවත් ජනපති මාධ්ය අංශය කියා සිටී.
මේ අතර ටැන්සානියාවේ අග්රාමාත්ය කසීම් මජලිවා ( Kassim Majaliwa ) මහතා ද ජනාධිපති රනිල් වික්රමසිංහ මහතා හමු වී දෙරට අතර ද්විපාර්ශ්වික සබඳතා පුළුල් කර ගැනීම පිළිබඳ සාකච්ඡා සිදු කළ බව පැවසේ.
එමෙන්ම බහමාස් අග්රාමාත්ය පිලිප් ඊ. ඩේවිස් ( Philip E. Davis) , ඉතියෝපියාවේ අග්රාමාත්ය අබේ අහමඩ් (Abiy Ahmed) , බෙනින් ජන රජයේ උප ජනාධිපති මාරියම් චාබි තලතා (Mariam Chabi Talata) මහත්ම මහත්මීන් ද ජනාධිපති රනිල් වික්රමසිංහ මහතා හමු වී ද්විපාර්ශ්වික සාකච්ඡා වල නිරත වූ බව වාර්තා වේ.
ටෙලිකොම් ඉන්දියාවට
මේ අතර, දකුණු ආසියාවේ ප්රධානතම දුරකථන සේවා මෙහෙයුම්කරු ලෙස සැලකෙන ඉන්දියාවේ කෝටිපති ව්යාපාරික මුකේෂ් අම්බානිට අයත් J.I.O. සමාගම ශ්රී ලංකා ටෙලිකොම් ආයතනයේ බහුතර කොටස් මිලදී ගැනීම සඳහා සිය අභිලාෂය ලිඛිතව ප්රකාශ කර ඇතැයි වාර්තා වේ.
ඉන්දියාවේ සුප්රකට ‘රිලයන්ස්’ දුරකථන සේවා සැපයුම්කරු වන J.I.O. සමාගම ඇමෙරිකානු ඩොලර් බිලියන 14ක වත්කම් සහිත සමාගමකි. එසේම ඔවුනගේ ආදායම් වාර්තා අනුව 2023 වසරේ සමාගමේ වාර්ෂික ආදායම ඇමෙරිකානු ඩොලර් බිලියන 2.4 කි. (ඩොලර් කෝටි 240 කි.)
එම සමාගම අඩු ගාස්තු යටතේ සේවා සැපයුම ගැන ප්රසිද්ධියක් උසුලයි.
දැනට ශ්රී ලංකා ටෙලිකොම් සමාගම් කොටස්වලින් 51% ක් රජය සතුය. ඉතිරි 49% ක කොටස් මැලේසියාවේ සුප්රකට ව්යාපාරික ජී. ආනන්ද ක්රිෂ්ණන්ට අයත් මැක්සීස් සමාගම සතුය.
J.I.O සමාගම හැර තවත් සමාගම් දෙකක් ශ්රී ලංකා ටෙලිකොම් සඳහා සිය අභිලාෂයන් ප්රකාශ කර ඇති බව සඳහන්ය.