ජපානයේ සේවය කිරීමට, නිශ්චිත පුහුණු කම්කරුවන් (Specified Skilled Worker /SSW). සඳහා ඉදිකිරීම් ක්ෂේත්‍රයේ නව නිපුණතා පරීක්ෂණයක් අද (01) දින සිට ශ්‍රී ලංකාවට අලුතින් හඳුන්වා දී තිබේ.
මේ බව ප්‍රකාශ කෙරුණේ මෙරට සිටින ජපන් තානාපති මිසුකෝෂි හිදෙඅකි මහතා, කම්කරු හා විදේශ රැකියා අමාත්‍ය – මනූෂ නානායක්කාර මහතා සහ ශ්‍රී ලංකා විදේශ සේවා නියුක්ති කාර්යාංශයේ සභාපති – ඒ.ඒ ඒම් හිල්මි මහතා විසින් පැවති ඒකාබද්ධ මාධ්‍ය හමුවකදීය.
මේ අනුව පසුගිය වසරේ සිට දැනටමත් ක්‍රියාත්මක වන හෙද සත්කාර, ආහාර සේවා සහ කෘෂිකර්ම යන ක්ෂේත්‍රවල නිපුණතා පරීක්ෂණ සමඟ එක්ව ක්ෂේත්‍ර හතරක නිපුණතා පරීක්ෂණ දැන් ශ්‍රී ලංකාව තුළ ක්‍රියාත්මක වේ.
ජපානයේ ඉදිකිරීම් ක්ෂේත්‍රයේ දියුණුවට මෙන්ම ශ්‍රී ලංකාවට විදේශ විනිමය උපයා ගැනීමට මෙය ඉතාමත් හොඳ අවස්ථාවක් වන බැවින් ජපානයේ සේවය කිරීමට හැකි දක්ෂ ශ්‍රී ලාංකිකයන් මෙම නව අවස්ථා‌වෙන් උපරිම ප්‍රයෝජනය ගනු ඇතැයි ජපන් තානාපතිවරයා මෙහිදී පැවසීය.
පසුගිය වසරේ ශ්‍රී ලංකාවේ SSW සඳහා වූ පරීක්ෂණය ආරම්භයත් සමඟ ජපන් භාෂාව ඉගෙනීමට ඇති උනන්දුව සීඝ්‍රයෙන් ව්‍යාප්ත වීම පිළිබඳවද ඔහු අදහස් දැක්වූ අතර, ශ්‍රී ලංකාවේ ජපන් භාෂා අධ්‍යාපනයට සහය දැක්වීමට ගන්නා ක්‍රියාමාර්ග ද පැහැදිලි කළේය.
තවද ශ්‍රී ලංකාවේ ජනතාවට සහය වීමට සහ ශ්‍රී ලංකාව සමඟ ජපානයේ ඇති දිගුකාලීන මිත්‍රත්වය තවදුරටත් පුළුල් කිරීමට අඛණ්ඩව සහය ලබාදීමට ජපන් රජයේ ඇති දැඩි කැපවීම ද මිසුකෝෂි මහතා මෙහිදී යළිත් අවධාරණය කළේය.
මේ සම්බන්ධයෙන් ස්තූතිය පළ කරමින් අමාත්‍ය මනුෂ නානායක්කාර මහතා, ආහාර සැකසුම් ක්ෂේත්‍රය සහ ඔටෝ මොබිල් ක්ෂේත්‍රය සදහා පුහුණු ශ්‍රමිකයින් යැවීම සදහා වන අවස්ථාව කඩිනමින් ලබාදෙන ලෙසද ජපන් තානාපතිවරයාගෙන් ඉල්ලා සිටියේය.
මෙම වැඩසටහන යටතේ ලියාපදිංචි වීමට හා ඒ පිළිබඳ වැඩි විස්තර සඳහා, SSW සඳහා පරීක්ෂණ පවත්වන Prometric හි වෙබ් අඩවියට පිවිසෙන්න.
