ජාතික ජන බලවේගය විසින් මහරගම ජාතික තරුණ සේවා සභාවේදී ඊයේ (29) පැවැත්වූ හෙද සමුළුවට රජයේ හෙද හෙදියන් නිල ඇඳුමින් සහභාගී වීම මේ වන විට විවිධ පාර්ශව වලින් විවේචන එල්ල වී තිබේ.
මේ සම්බන්ධව මැතිවරණ කොමිසම වෙත ලිපියක් යොමු කරමින් නිදහස් හා සාධාරණ මැතිවරණයක් සඳහා වූ ජනතා ව්යාපාරය පවසන්නේ එම ක්රියාව මැතිවරණ නීති උල්ලංගණය කිරීමක් බවය.
මහජන බදු මුදල් වැය කර ලබා දෙන නිල ඇඳුම දේශපාලන කාර්යන් සඳහා යොදා ගැනීම ආයතන සංග්රහය අනුවත්, මැතිවරණ නීතිය අනුවත් වැරදි ක්රියාවක් බව එම සංවිධානය සිය ලිපියේ සඳහන් කර තිබේ.
ඔවුන් සිය ලිපිය මගින් පෙන්වා දෙන්නේ වර්ෂ 1981 අංක 15 දරණ ජනාධිපතිවරණ පනතේ ප්රතිපාදන අනුව මැතිවරණයක් ප්රකාශයට පත් කර ඇති මෙවැනි අවස්ථාවක මැතිවරණ වැරදි ඝනයේ විෂමාචාර ක්රියාවක් මෙහි සිදුව ඇති බවය.
මේ හේතුවෙන් ඉක්මනින් අමාත්යාංශ ලේකම්වරයා මගින් ඒකී තත්ත්වය පිළිබඳ වාර්තාවක් කැඳවන මෙන්ද, මෙවැනි අත්තනෝමතික ක්රියාවන් පාලනය කිරීම සඳහා නිසි ක්රියාමාර්ග ගන්නා මෙන් සහ මැතිවරණ කොමිෂන් සභාවට ඇති අධිකාරී බලය ප්රකාර කටයුතු කරමින් මැතිවරණ නීතිය ආරක්ෂා කර ගැනීමට කටයුතු සම්පාදනය කරන ලෙසත් ඔවුන් සිය ලිපියේ වැඩිදුරටත් සඳහන් කර ඇත.
මේ අතර මෙකී සිදුවීම සම්බන්ධව පැෆරල් සංවිධානය මෙන්ම ප්රජාතන්ත්රීය ප්රතිසංස්කරණ සහ මැතිවරණ අධ්යනය ආයතනයද සිය විරුද්ධත්වය ප්රකාශ කර තිබෙනවා.
