මාතලේ දිස්ත්‍රික්කයේ ඇල්කඩුව වතුයායේ රත්වත්තේ වත්ත තුළ එහි සහකාර කළමනාකරුවෙකු හට ආවේගශීලි ලෙස තමා කතාකරන වීඩියෝ දසුන් සම්බන්ධයෙන් ජල සම්පාදන සහ වතු යටිතල පහසුකම් සංවර්ධන ඇමැති ජීවන් තොන්ඩමන් මහතා පැහැදිලි කිරීමක් සිදුකර තිබේ.
එම සහකාර කළමනාකරුවා විසින් දුප්පත් පවුලක නිවාසයක් බලහත්කාරයෙන් කඩාබිඳ දමමින් ඔවුන්ට හිරිහැර කළ සිද්ධියක් මීට මූලික වී ඇත. තොන්ඩමන් මහතා ඊයේ (20) ගොස් ඇති අතර, ඔහු හා අදාළ නිලධාරීන් අතර කළහකාරී තත්වයක් නිර්මාණය වූ අයුරු වීඩියෝ දසුන් වලින් දැක්වේ.
මෙම හැසිරීමට එරෙහිව පියවර ගන්නා ලෙස වතුයායේ සභාපතිවරයාගෙන් සහ සාමාන්‍යාධිකාරීවරයාගෙන් ලෙස ඉල්ලා සිටි බවත්, එම අවස්ථාවේ වහාම පියවර ගෙන, සහකාර කළමනාකරු සේවයෙන් ඉවත් කර ඇති බවත්, ඇමැතිවරයා සඳහන් කරයි.
තවද, සභාපතිවරයා, සාමාන්‍යාධිකාරීවරයා සහ අදාළ සිද්ධියට වගකිවයුතු සහකාර කළමණාකාරවරයා ද විපතට පත් පවුලෙන් පෞද්ගලිකව සමාව අයැද ඇතැයිද ඇමතිවරයා පවසයි.
මෙම පවුලට වත්ත තුළ ස්ථිර නිවසක් ඉදිකරදීමටද මෙම වතු පාලනාධිකාරිය එකඟ වී ඇති බවද ඇමතිවරයාගේ පැහදිලි කිරීමේ දැක්වේ.
සිද්ධිය සම්බන්ධයෙන් මීට පෙර මනෝ ගනේෂන් මන්ත්‍රීවරයාද වැවිලි කර්මාන්ත අමාත්‍ය රමේෂ් පතිරණ මහතාව දැනුවත් කරමින් ඉල්ලා ඇත්තේ අදාල සහකාර කළමනාකරු සේවයෙන් ඉවත් කරන ලෙසයි.
