අද (19) දිනයේ බස්නාහිර, සබරගමුව සහ මධ්‍යම පළාත්වලත් ගාල්ල සහ මාතර දිස්ත්‍රික්කවලත් විටින්විට වැසි ඇති වෙයි.

කාලගුණ විද්‍යා දෙපාර්තමේන්තුව නිකුත් කළ නවතම නිවේදනයේ දැක්වෙන්නේ, සබරගමුව පළාතේත් නුවරඑළිය, මහනුවර, ගාල්ල සහ මාතර දිස්ත්‍රික්කවලත් ඇතැම් ස්ථානවල මිලිමීටර් 75ට වැඩි තරමක තද වැසි ඇතිවිය හැකි බවය.

උතුරු සහ වයඹ පළාත්වල වැසි වාර කිහිපයක් ඇති වෙයි.

මධ්‍යම කඳුකරයේ බටහිර බැවුම් ප්‍රදේශවලත් බස්නාහිර, සබරගමුව, දකුණු, වයඹ සහ උතුරු-මැද පළාත්වල විටින්විට හමන පැ.කි.මී. 50-60ක පමණ තද සුළං ද ඇතිවිය හැකිය.

තද සුළංවලින් සිදුවන අනතුරු අවම කරගැනීමට අවශ්‍ය පියවර ගන්නා ලෙස ජනතාවගෙන් ඉල්ලීමක් ද කරයි.

ඉදිරි පැය 24ට අදාළව දිවයින වටා වන මුහුදු ප්‍රදේශ සඳහා කාලගුණ අනාවැකිය නිකුත් කරමින් එම දෙපාර්තමේන්තුව පවසන්නේ, පුත්තලම සිට කොළඹ සහ ගාල්ල හරහා මාතර දක්වා වෙරළට ඔබ්බෙන් වන මුහුදු ප්‍රදේශවල තැනින් තැන වැසි ඇති වෙන බවය.

දිවයින වටා වන මුහුදු ප්‍රදේශවල සුළං බස්නාහිර සිට නිරිත දක්වා වන දිශාවලින් හමා එන අතර සුළගේ වේගය පැ.කි.මී. (35-45) පමණ වේ.

පුත්තලම සිට කොළඹ, ගාල්ල සහ හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශවල සුළගේ වේගය විටින් විට පැ.කි.මී. (60-70) පමණ දක්වා ඉහළ යා හැකිය. 

පුත්තලම සිට මන්නාරම, කන්කසන්තුරය සහ ත්‍රිකුණාමලය හරහා වාකරේ දක්වා වෙරළට ඔබ්බෙන් වන මුහුදු ප්‍රදේශවල සුළගේ වේගය විටින්විට පැ.කි.මී. (50-55) පමණ දක්වා ඉහළ යා හැකිය.

පුත්තලම සිට කොළඹ, ගාල්ල සහ හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශ විටින් විට රළු හෝ ඉතා රළු වෙයි. 

ඉදිරි පැය 24 සඳහා මෙම මුහුදු ප්‍රදේශවල යාත්‍රා නොකරන ලෙස කාලගුණ විද්‍යා දෙපාර්තමේන්තුව නාවික සහ ධීවර ප්‍රජාවන්ට  දැනුම්දෙයි.

පුත්තලම සිට මන්නාරම, කන්කසන්තුරය සහ ත්‍රිකුණාමලය හරහා වාකරේ දක්වා වෙරළට ඔබ්බෙන් වන මුහුදු ප්‍රදේශ විටින් විට  රළු  විය හැකිය. 

පුත්තලම සිට කොළඹ, ගාල්ල සහ හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශවල මුහුදු රළ උස මීටර් 2.5 – 3.0ක් පමණ ඉහළ යාමේ හැකියාවක් ද පවතී. (මෙය ගොඩබිමට එන රළ උස නොවේ). 

කාලගුණ විද්‍යා දෙපාර්තමේන්තුව විසින් මේ සම්බන්ධයෙන් නිකුත් කරනු ලබන ඉදිරි නිවේදන පිළිබඳව අවධානයෙන් පසුවන ලෙස ධීවර හා නාවික ප්‍රජාවගෙන් ඉල්ලීමක් ද කරයි.

ශ්‍රී ලංකා විදුලිබල (සංශෝධන) පනත් කෙටුම්පත ඊයේ (17) රැස්වූ  යටිතල පහසුකම් සහ උපාය මාර්ගික සංවර්ධනය පිළිබඳ ආංශික අධීක්ෂණ කාරක සභාවේ දී සලකා බලන ලද අතර ලබන 24 වැනිදා දෙවැනිවර කියවීම සඳහා පාර්ලිමේන්තුවට ඉදිරිපත් කිරීමට අදාළ අනුමතිය හිමිවිය.  

ඒ එම කාරක සභාව පාර්ලිමේන්තු මන්ත්‍රී එස්. එම්. මරික්කාර් මහතාගේ සභාපතිත්වයෙන් පසුගියදා (17) පාර්ලිමේන්තුවේදී රැස් වූ අවස්ථාවේදීය. 

මෙම කාරක සභා රැස්වීම සඳහා බලශක්ති අමාත්‍යාංශය, නීතිපති දෙපාර්තමේන්තුව, ශ්‍රී ලංකා විදුලිබල මණ්ඩලය ඇතුළු ආයතන ගණනාවක් නියෝජනය කරමින් නිලධාරීහු පැමිණ සිටියහ. මෙහිදී මහජන උපයෝගීතා කොමිෂන් සභාව මෙම පනත් කෙටුම්පත සංශෝධනය කිරීමට අදාළව ඉදිරිපත් කර තිබූ යෝජනා සහ නිර්දේශ කිහිපයක් සම්බන්ධයෙන් සාකච්ඡා වූ අතර එහිදී කරුණු කිහිපයක් සම්බන්ධයෙන් එකඟතාවය පළ විය.

නීතිපති දෙපාර්තමේන්තුවද කමිටුව හමුවේ පනත් කෙටුම්පත සම්බන්ධයෙන් අදහස් දැක්වීම සිදු කළ අතර මීට පෙර කාරක සභාවේදී එකඟවූ සංශෝධනද සමඟ පනත් කෙටුම්පත කාරක සභාවේ අනුමතියට ඉදිරිපත් කර තිබිණි. නව පනත් කෙටුම්පතට අනුව ඉඩම් අයිතිය, පාරිභොගික අයිතීන් ආදි කරුණු ගණනාවක් පිළිබඳව දීර්ඝ ලෙස මෙහිදී සාකච්ඡා කෙරිණි. 

එසේම පනත සම්මත වීමෙන් පසු පාරිභෝගීක අයීතීන් පිළිබඳ රෙගුලාසි සෑදීම සඳහා මසක කාලයක් තුළදී විදුලිබල අමාත්‍යාංශය සහ  මහජන උපයෝගීතා කොමිෂන් සභාව එක්ව කටයුතු කරන ලෙස විදුලිබල අමාත්‍යාංශයේ ලේකම්වරයාට කාරක සභාව විසින් නි‍ර්දේශ කරන ලදී.       

මෙම කාරක සභා රැස්වීමට පාර්ලිමේන්තු මන්ත්‍රීවරුන් වන නලීන් බණ්ඩාර ජයමහ, අජිත් පී පෙරේරා, අසිත නිරෝෂණ එගොඩ විතාන, මංජුල සුරවීර ආරච්චි සහ ශාන්ත පද්ම කුමාර සුබසිංහ යන මහත්වරු ද කාරක සභාවේ සභාපතිවරයාගේ අනුමතිය මත මුදල් කාරක සභාවේ සභාපති පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා ද  සහභාගී වූහ.        

ගාල්ල ජාතික රෝහලේ වකුගඩු ඒකකයේ වකුගඩු රෝගීන් සඳහා ලබාදෙන අත්‍යවශ්‍ය ඖෂධ හිඟ වීමෙන් තමන් දැඩි පීඩාවට පත්වී ඇතැයි රෝගීහු පවසති.

ඔවුන් පවසන්නේ වකුගඩු රෝගීන්ට රුධිර වර්ධනය සඳහා ලබාදෙන Erythropoietin 4000iu එන්නත මේ වන විට රෝහලේ නොමැති බවත් ඒවා ලැබෙන දිනයක් පිළිබඳව ද තමන් නොදන්නා බවය.

එබැවින් මෙම එන්නත පිටත ෆාමසිවලින් රුපියල් 4000ත් 5000ත් අතර මිලකට මිලදී ගැනීමට සිදුව ඇති බව ඔවුහු පවසති. ඔවුන් පවසන්නේ බහුතර පිරිසකට එම අධික මිල ගණන් වැය කරමින් මෙම එන්නත මිළදී ගැනීමේ හැකියාවක් නොමැති බැවින් තමන් දැඩි පීඩාවට පත්ව ඇති බවය. 

තවද වකුගඩු රෝගීන් හට ලබා දෙන ඖෂධවල අඩුවක් ද පවතින අතර දැඩි සත්කාර ඒකකයේ ප්‍රතිකාර රෝගීන් සඳහා ලබාදෙන ප්‍රතිජීවක ඖෂධ වර්ග හිඟතාවයක් ද පවතින බව එහි පැමිණෙන රෝගීහු පවසති.

වකුගඩු රෝගීන් සඳහා ඉදිකරන ලද ගාල්ල ජාතික රෝහලේ වකුගඩු ඒකකයේ බාහිර රෝගී ප්‍රතිකාර අංශයේ පවතින අඩුපාඩු රැසක් හේතුවෙන් වෛද්‍ය හා සෞඛ්‍ය කාර්ය මණ්ඩලයට ද දුෂ්කරතාවයන්ට මුහුණ දීමට සිදුව ඇතිබව වාර්තා වේ.

2021 වසරේ විවෘත කරන ලද රුපියල් මිලියන 794ක වියදමින් ඉදිකළ මෙම නව වකුගඩු ඒකකය මහල් 09කින් යුක්ත වන අතර මෙහි බිම් මහළ වකුගඩු ඒකකයේ බාහිර රෝගී ප්‍රතිකාර සායන සඳහා යොදා ගනු ලබයි.

ගාල්ල ජාතික රෝහලක් වූ නමුත් දැනට වකුගඩු සායනයේ පවතින සෞඛ්‍ය කාර්ය මණ්ඩලයේ හිඟකම හේතුවෙන් තමන්ට සායනවල දිගු වේලාවක්  රැඳී සිටීමට රෝගීන්ට සිදුව ඇති අතර සායනයේ අවම කාර්ය මණ්ඩලය, වෛද්‍යවරු ඇතුළු සෞඛ්‍ය කාර්ය මණ්ඩලය උපරිමයෙන්ම සිය රාජකාරිය ඉටු කරන බවද රෝගීහු පවසති.

වකුගඩු රෝගීන් වන තමන්ට ජලය පානය කිරීම සීමා කර ඇති බැවින් මෙලෙස දිගු වෙලාවක් පෝලිම්වල රැඳී සිටීම දැඩි අපහසු ක්‍රියාවක් බවත් ඒ හේතුවෙන් තමන් ශාරීරිකව හා මානසිකව පීඩාවට පත්වන බවට රෝගීහු මැසිවිලි නගති.

මෙම රෝගීන් විසින් සෞඛ්‍ය බලධාරීන් වෙතින් ඉල්ලා සිටින්නේ මේ සම්බන්ධයෙන් අවධානය යොමුකර මෙම අත්‍යවශ්‍ය ඖෂධ ගැටලුව ඇතුළු මෙම ඒකකයේ පවතින ගැටලු කඩිනමින් විසඳීමට පියවර ගන්නා ලෙසය.