තම සමාගම සිය අනන්‍යතාව යටතේ ඖෂධ හා රෝග විනිශ්චය කිරීමේ මෙවලම් අපනයනය හා බෙදා හැරීම සඳහා ජාතික ඖෂධ නියාමන අධිකාරියෙන් වලංගු බලපත්‍රයක් ගත් සාමාජික සමාගමක් බව දිවැස ෆාමා සමාගම නිවේදනයක් නිකුත් කරමින් කියා සිටී.
දිවැස ෆාමා සමාගම සම්බන්ධයෙන් පාර්ලිමේන්තුවේදී එල්ල කරන ලද චෝදනාවන් සම්බන්ධයෙන් කරුණු පැහැදිලිට අදාළ නිවේදනය නිකුත් කර ඇත.
එම මාධ්‍ය නිවේදනයේ වැඩිදුරටත් මෙසේ ද සඳහන් වෙයි.
2018 අගෝස්තු 18 වැනිදා සිට සමාගම ජාතික ඖෂධ නියාමන අධිකාරිය (NMRA) විසින් තොග වශයෙන් ඖෂධ අලෙවිය හා බෙදා හැරීම සඳහා බලපත්‍රලාභී සමාගමක් ලෙස ලියාපදිංචි කර ඇති අතර එය අද දක්වා අඛණ්ඩව යාවත්කාලීන කර තිබේ.
ඒ අනුව දිවැස ෆාමා සමාගම කොවිඩ් -19 සඳහා PCR සහ රැපිඩ් ඇන්ටිජන් (RAT) කට්ටල ඇතුළු ජෝර්ජ් සුටුවර්ට් හෙල්ත් පුද්ගලික සමාගමෙන් (GSH) ආනයනය කරන ලද නිෂ්පාදන කීපයක් සඳහා දේශීය බලයලත් බෙදාහරින්නකු බවට පත් විය. දිවැස ෆාමා සමාගම විසින් ජාතික ඖෂධ නියාමන අධිකාරිය මගින් නියම කරන ලද එක් පරීක්ෂණයක් සඳහා වූ මිල නියමයන්ට අනුව එම මිලටම හෝ ඊට අඩු මිලකට සෞඛ්‍ය අමාත්‍යාංශයේ මාර්ගෝපදේශ යටතේ රාජ්‍ය හා පෞද්ගලික සෞඛ්‍ය සේවා ආයතනවලට PCR සහ RAT කට්ටල නීත්‍යානුකූලව අලෙවි කරනු ලැබ ඇත.
කිසිදු අවස්ථාවක දිවැස ෆාමා සමාගම ශ්‍රී ලංකාවට PCR හෝ RAT කට්ටල ආනයනය කර නොමැත.
රජයේ සෞඛ්‍ය සේවා ආයතනයන්ට අවශ්‍ය මෙවලම් සැපයීමේදී අනුගමනය කළ යුතු නීත්‍යානුකූල ප්‍රසම්පාදන ක්‍රියාවලිය නිසියාකාරව පූර්ණය කිරීමෙන් අනතුරුව දිවැස ෆාමා සමාගම දේශීය බලයලත් බෙදාහරින්නකු ලෙස සිය මෙහෙයුම් කටයුතු කර ඇත. දිවැස ෆාමා සමාගම 2012 වර්ෂයේදී සංස්ථාපිත සමාගමකි.
සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස පාර්ලිමේන්තුවේදී පසුගිය බදාදා (18 වැනිදා) ප්‍රකාශ කළේ ජාතික ඖෂධ නියාමන අධිකාරියේ ලියාපදිංචි නොකළ සමාගමකින් ද රැපිඩ් ඇන්ටිජන් කට්ටල ගෙන ඇති බවයි.
සබැඳි පුවත්
