නුගේගොඩ දෙල්කඳ හන්දියට ආසන්න ප්‍රදේශයකදී මෝටර් රථයක් නතර කර නීතිය ක්‍රියාත්මක කිරීමට ගිය රථ වාහන පොලිස් නිලධාරීන් දෙදෙනකුට බැණ වැදී ඔවුන්ගේ රාජකාරියට බාධා කළ විදානගමගේ අමේෂ් රුවන්ත නමැත්තා මිරිහාන පොලිසියට පැමිණ ඊයේ (08) භාර වී තිබේ.

පොලිසියට බාරවීමෙන් පසුව මොහු නර්තන ශිල්පියකු ලෙස ද කටයුතු කරන කරණවැමියකු පොලිසිය හඳුනාගෙන ඇත.

මහරගම නල්ලවත්ත පාරේ තාවකාලිකව පදිංචිව සිටින ගාල්ල බටදූව ලුණුවිලවත්තේ පදිංචිකරුවෙක් වන මෙම සැකකරු සිය බිරිය සමඟ එක්ව මහරගම නාවින්න හන්දියේ රූපලාවණ්‍යාගාරයක් පවත්වාගෙන යන බවද විමර්ශනවලින් අනාවරණය වී ඇත.

රථ වාහන අංශයේ නිලධාරීන්ට මෙම සැකකරු බැණ වදිමින් රාජකාරියට බාධාකර ඇත්තේ පසුගිය 05 වැනිදාය.

ඒ සම්බන්ධයෙන් එම නිලධාරීන් පොලිස් පොත්වල සටහන් තබා ඉහළ නිලධාරීන්ව දැනුම්වත්කර තිබේ.

ඒ අනුව පොලිස් නිලධාරීන්ගේ රාජකාරියට බාධා කළ මෙම සැකකරු අත්අඩංගුවට ගැනීමට පොලිසිය පුළුල් මෙහෙයුමක් දියත් කර තිබුණද ඔහු මිරිහාන පොලිසියට පැමිණ බාරවනතෙක් ඔහු අල්ලා ගැනීමට නොහැකිවී තිබිණි.

කෙසේවුවද, පොලිසිය විසින් මෙම පුද්ගලයා අත්අඩංගුවට ගැනීමට ඔහු තාවකාලිකව පදිංචිව සිටි නි‍ෙවසද රූපලාවණ්‍යාගාරයද ගාල්ලේ නි‍ෙවසද පරීක්ෂාවට ලක්කර තිබේ.

මේ පුද්ගලයාගේ ජංගම දුරකතන අංකය සොයා ගත් පොලිසිය එය ජාල පරීක්ෂාවකට ලක්කර කළ විමර්ශනයේදී පෙනී ගොස් ඇත්තේ ඔහු අනුරාධපුරයේ රැඳී සිටින බවකි.

ඒ අනුව ඔහුව අනුරාධපුරයේදී අත්අඩංගුවට ගැනීමටද එහිදී මෙහෙයුමක් දියත් කර තිබේ.

එහිදී අනාවරණය වී ඇත්තේ ඔහු නර්තනයක නිරත වීමට අනුරාධපුරයට ගොස් ඇති බවත් ඒ වන විට කොළඹ බලා පිටත්ව ගොස් ඇති බවය.

පෙරේදා (07) රාත්‍රී කාලයේදී කොළඹට පැමිණ සැඟවී සිටි ඔහු ඊයේ (08) පොලිසියට පැමිණ හඬා වැලපෙමින් පොලිස් නිලධාරීන්ගෙන් සමාව ඉල්ලා තිබේ.

සිය බිරිය සමඟ ගැටුමක් ඇති කරගෙන එදින නි‍ෙවසින් පිටව යමින් සිටියදී එසේ පොලිස් නිලධාරීන්ගේ පරීක්ෂාවට ලක් වූ බැවින් බිරිය සමඟ ඇතිකරගත් ගැටුම හේතුවෙන් ආවේගයට එසේ පොලිස් නිලධාරීන් සමඟ හැසුරුණු බව ද ඔහු පොලිස් නිලධාරීන් හමුවේ හඬමින් පවසා ඇති බව පොලිස් තොරතුරු අනාවරණය කළ බව දිනමිණ පුවත්පත වාර්තා කරයි.

මෙම පුද්ගලයා උත්සව අවස්ථාවන්වලදී නර්තන ඉදිරිපත් කිරීම සිය වෘත්තිය කර ගත් අයෙක් බවත් සමාජ ශාලාවල පවා නර්තන සඳහා ඉදිරිපත් වන්නෙක් බවත් පොලිස් පරීක්ෂණවලින් පෙනීගොස් ඇත.

මෙම සැකකරුව අද (09) නුගේගොඩ අධිකරණයට ඉදිරිපත් කිරීමට නියමිතව ඇත.